రూ.50వేలు తీసుకుంటూ పట్టుబడ్డ వైనం
వికారాబాద్, వెలుగు: భూమి రిజిస్ట్రేషన్ రద్దు కోసం ఓ రిజిస్ట్రార్ రూ.లక్ష డిమాండ్ చేయగా.. రూ.50వేల లంచం తీసుకుంటూ ఏసీబీకి చిక్కాడు. వివరాల్లోకి వెళితే.. వికారాబాద్ జిల్లా యాలాల మండలం దౌల్తాబాద్ కు చెందిన హీర్యా నాయక్.. మూడేండ్ల కింద తన భూమిని తాండూర్ టౌన్కు చెందిన ఈర్షద్ వద్ద కుదవపెట్టి రూ.5లక్షలు అప్పుగా తీసుకున్నాడు. ఇటీవల హీర్యా నాయక్ సదరు అప్పును ఈర్షద్కు చెల్లించాడు.
అయితే ఆ భూమి ఈర్షద్ పేరు మీదనే ఉండడంతో దాని రిజిస్ట్రేషన్ రద్దు కోసం సబ్ రిజిస్ట్రార్ వద్దకు వెళ్లాడు. రద్దు చేయాలంటే రూ.లక్ష చెల్లించాలని ఈర్షద్ను సబ్రిజిస్ట్రార్ జమిరోద్దీన్ డిమాండ్ చేశాడు. తన అనుచరుడైన జహిరోద్దీన్ కు ఈ మొత్తాన్ని ఇవ్వాలని కోరాడు. దీంతో ఆయన ఏసీబీని ఆశ్రయించాడు. ప్లాన్ ప్రకారం రూ.50వేల లంచం తీసుకుంటూ సబ్ రిజిస్ట్రార్ అనుచరుడు జహిరోద్దీన్ ఏసీబీకి చిక్కాడు. ఇద్దరినీ ఏసీబీ ఆఫీసర్లు కస్టడీలోకి తీసుకున్నారు.
