విద్యుత్ శాఖకు బడ్జెట్లో రూ.16,825 కోట్లు కేటాయించామని ఆర్థిక శాఖ మంత్రి భట్టి విక్రమార్క ప్రకటించారు. గృహజ్యోతి స్కీమ్ కోసం రూ.2,418 కోట్లు కేటాయించామని తెలిపారు. ప్రస్తుత అంచనా ప్రకారం గృహజ్యోతి పథకానికి నెలకు రూ.360 కోట్ల వరకు ఖర్చు అవుతుందని అంచనా వేస్తున్నామని చెప్పారు. ఈ స్కీమ్ ద్వారా అర్హులందరికీ 200 యూనిట్ల వరకు ఉచిత విద్యుత్ సరఫరా చేస్తామని ప్రకటించారు. రానున్న వేసవి కాలాన్ని దృష్టిలో పెట్టుకుని విద్యుత్ కొరత లేకుండా చూసుకుంటామన్నారు. డిమాండ్కు అనుగుణంగా విద్యుత్ ఉత్పత్తి చేస్తామన్నారు. సోలార్ పవర్ జనరేషన్లోనూ కీలక నిర్ణయాలు తీసుకుంటామని ప్రకటించారు. వ్యవసాయానికి ఫ్రీ కరెంట్, స్పిన్నింగ్ మిల్లులకు సబ్సిడీల కోసం ఈ కేటాయింపులు చేసినట్టు స్పష్టమవుతున్నది. గతేడాది బీఆర్ఎస్ సర్కార్ విద్యుత్ శాఖకు రూ.12,727 కోట్లు కేటాయించింది.
