- ఎన్నికల ప్రక్రియ ప్రారంభమైనందున జోక్యం చేసుకోలేమని స్పష్టీకరణ
- డెడికేటెడ్‌ కమిషన్‌ నివేదికను అందజేసేందుకూ నిరాకరణ
- విచారణ ఆరు వారాలకు వాయిదా
హైదరాబాద్, వెలుగు: గ్రామ పంచాయతీల ఎన్నికలను ఆపలేమని హైకోర్టు స్పష్టం చేసింది. ఎన్నికల ప్రక్రియ మొదలైనందున జీవో 46పై స్టే ఇవ్వలేమని తేల్చి చెప్పింది. ప్రభుత్వం జారీ చేసిన జీవో 46ను సవాలు చేస్తూ వికారాబాద్‌కు చెందిన మడివాల మచ్చదేవ రజకుల సంఘం తరఫున ఎస్‌.లక్ష్మి, మరో ఆరుగురు దాఖలు చేసిన పిటిషన్లపై చీఫ్‌ జస్టిస్‌ అపరేశ్‌ కుమార్‌ సింగ్, జస్టిస్‌ జీఎం మొహియుద్దీన్‌ తో కూడిన బెంచ్‌ శుక్రవారం విచారణ చేపట్టింది. పిటిషనర్‌ తరఫు న్యాయవాది వాదనలు వినిపిస్తూ.. ఏ ప్రాతిపదికన రిజర్వేషన్లు కేటాయించారో తెలుసుకోవడానికిగాను ఆధారమైన డెడికేటెడ్‌ కమిషన్‌ నివేదికను అందజేసేలా ఆదేశాలు జారీచేయాలని కోరగా ధర్మాసనం నిరాకరించింది. అడ్వకేట్‌ జనరల్‌ ఎ.సుదర్శన్రెడ్డి వాదనలు వినిపిస్తూ.. ఎన్నికల నోటిఫికేషన్‌ ఇప్పటికే జారీ అయిందని.. నామినేషన్‌లు స్వీకరణ జరుగుతోందని కోర్టుకు తెలిపారు. ఇరు పక్షాల వాదనలను విన్న కోర్టు.. ఎన్నికల ప్రక్రియ మొదలైనందున జోక్యం చేసుకోలేమని తెలిపింది. అలాగే, 6 వారాల్లో కౌంటర్లు దాఖలు చేయాలని ప్రతివాదులైన రాష్ట్ర ప్రభుత్వంతోపాటు ఎన్నికల సంఘానికి నోటీసులు జారీ చేసింది. ఆ తరువాత 2 వారాల్లో పిటిషనర్‌ రిప్లయ్‌ కౌంటర్ దాఖలు చేయాలని ఆదేశించింది. కౌంటర్తోపాటు డెడికేటెడ్‌ కమిషన్‌ నివేదికను సమర్పించాలని ఆదేశిస్తూ.. విచారణను 8 వారాలకు వాయిదా వేసింది.
ఎన్నికల ప్రక్రియలో కోర్టుల జోక్యానికి వీల్లేదు: ఏజీ
వికారాబాద్‌ జిల్లా నవాబ్‌‌‌‌‌‌‌‌పేట మండలం అత్తాపూర్‌‌‌‌‌‌‌‌కు చెందిన జి.రమేశ్‌ గౌడ్‌ దాఖలు చేసిన మరో పిటిషన్‌‌‌‌‌‌‌‌లోనూ స్టే ఇవ్వడానికి హైకోర్టు నిరాకరించింది. జీవోపై స్టే ఇస్తే ఎన్నికల ప్రక్రియలో జోక్యం చేసుకున్నట్టే అవుతుందని తెలిపింది. ఈ పిటిషన్‌‌‌‌‌‌‌‌పై జస్టిస్‌ టి.మాధవీదేవి విచారణ చేపట్టగా.. పిటిషనర్‌ తరఫున సీనియర్‌ న్యాయవాది బీఎస్‌ ప్రసాద్, న్యాయవాది ఎ.సంతోశ్ కుమార్‌ వాదనలు వినిపిస్తూ రిజర్వేషన్ల ప్రక్రియ చట్టవిరుద్ధంగా ఉందన్నారు. గతంలో కూడా 42 శాతం రిజర్వేషన్లు కల్పిస్తూ ప్రభుత్వం జీవో జారీ చేసిందని.. అప్పటికే ఎన్నికల నోటిఫికేషన్‌ జారీ అయినప్పటికీ ఇదే హైకోర్టు జీవోను రద్దు చేసిందన్నారు. ఈ దశలో జీవో అమలును నిలిపివేయకపోతే ఎన్నికలు పూర్తవుతాయన్నారు. స్టే మంజూరు చేయకపోతే ఎన్నికలను వాయిదా వేయాలని ఆదేశాలివ్వాలని కోరారు. అడ్వకేట్‌ జనరల్‌ ఎ.సుదర్శన్రెడ్డి వాదనలు వినిపిస్తూ.. ఎన్నికల ప్రక్రియ మొదలైందని చెప్పారు. రాజ్యాంగంలోని అధికరణ 243ఒ ప్రకారం ఎన్నికల షెడ్యూల్‌ వెలువడ్డాక కోర్జుల జోక్యానికి వీల్లేదన్నారు.
సుప్రీంకోర్టు తీర్పుల ప్రకారం.. ఎలాంటి మధ్యంతర ఆదేశాలు జారీ చేయొద్దని కోరారు. నోటిఫికేషన్‌ తర్వాత లేవనెత్తే అంశాలు ఎన్నికల పిటిషన్లు అవుతాయన్నారు. గతంలో కూడా రిజర్వేషన్లు 50 శాతం దాటడంతో రిజర్వేషన్లకు సంబంధించిన జీవోను హైకోర్టు డివిజన్‌ బెంచ్‌ కొట్టివేసిందేగానీ.. ఎన్నికల షెడ్యూల్‌ జోలికి వెళ్లలేదని గుర్తుచేశారు. బీసీ రిజర్వేషన్ల పెంపును కొట్టివేసినా మిగిలిన సీట్లను ఓపెన్‌ కేటగిరీ కింద కేటాయించి ఎన్నికలను కొనసాగించుకోవచ్చని అనుమతించిందని అన్నారు. కాబట్టి, గతంలో కూడా ఇదే హైకోర్టు ఎన్నికల ప్రక్రియలో జోక్యం చేసుకోలేదన్నారు. సీల్డ్‌ కవర్‌‌‌‌‌‌‌‌లో వాల్యూమ్‌-3 కూడా ఉందన్నారు. బీసీ రిజర్వేషన్లు 42 శాతానికి పెంచాలనే అంశం వాల్యూమ్‌-3లో ఉందని, మొత్తం రిజర్వేషన్లు 50 శాతానికి మించరాదని ఇదే హైకోర్టు డివిజన్‌ బెంచ్‌ తీర్పు చెప్పడంతో జీవో 46కు అనుగుణంగా రిజర్వేషన్లు అంశం వాల్యూమ్‌-3(ఎ)లో ఉందని వివరించారు. రాష్ట్ర ఎన్నికల సంఘం తరఫున సీనియర్‌ న్యాయవాది జి.విద్యాసాగర్‌ వాదనలు వినిపిస్తూ.. గతంలో ఎన్నికల నోటిఫికేషన్‌ జారీ చేసినా.. 42 శాతం రిజర్వేషన్‌‌‌‌‌‌‌‌లను రద్దు చేయడంతో నోటిఫికేషన్‌ అమలును పక్కనపెట్టామన్నారు.
డెడికేటెడ్‌ కమిషన్‌ నివేదికను సమర్పించాల్సిందే..
విచారణ మధ్యలో న్యాయమూర్తి జోక్యం చేసుకొని డెడికేటెడ్‌ కమిషన్‌ నివేదికను సమర్పించాల్సిందేనని.. ఆ తర్వాత ఒక నిర్ణయం తీసుకుంటామని తెలిపారు. దీంతో సాయంత్రం ప్రభుత్వం సీల్డ్‌ కవర్‌‌‌‌‌‌‌‌లో నివేదికను సమర్పించింది. దాన్ని పరిశీలించిన న్యాయమూర్తి అసంతృప్తి వ్యక్తం చేస్తూ కమిషన్‌ అధ్యక్షుడి సంతకం కూడా లేకుండా నివేదిక సమర్పించడంపై ప్రశ్నించారు. నివేదిక పేరుతో సమాచారం ఇచ్చారని, నివేదిక సారాంశం కూడా ఇవ్వలేదన్నారు. ఆ తర్వాత ఇక్కడ దాఖలు చేసిన పిటిషన్‌‌‌‌‌‌‌‌లోని అభ్యర్థనలతోనూ చీఫ్‌ జస్టిస్‌‌‌‌‌‌‌‌తో కూడిన బెంచ్‌ ముందు మరో పిటిషన్‌ పెండింగ్‌‌‌‌‌‌‌‌లో ఉన్నందున ఇక్కడ ఎలాంటి ఉత్తర్వులు జారీ చేయలేమన్నారు. పిటిషన్‌‌‌‌‌‌‌‌లో కౌంటర్లు దాఖలు చేయాలంటూ ప్రతివాదులను ఆదేశిస్తూ విచారణను 4 వారాలకు వాయిదా వేశారు.
