- బజార్హత్నూరు అడవుల్లో గుర్తించిన కొత్త తెలంగాణ చరిత్ర బృందం
హైదరాబాద్, వెలుగు: ఈ రాతి స్తంభాలు.. శిల్పులు చెక్కినవి కావు. పోతపోసిన స్తంభాలు అంతకన్నా కావు. అడవిలో సహజంగా ప్రకృతిసిద్ధంగా ఏర్పడిన రాతి స్తంభాలివి. ఆదిలాబాద్ జిల్లా బజార్ హత్నూర్ అడవుల్లో తాజాగా వెలుగు చూశాయివి. అగ్నిపర్వతాలు బద్దలై లావా ఎగిసి ఇలా స్తంభాల్లా మారాయని, వాటిని ‘కాలమ్నార్ బసాల్ట్’ అని పిలుస్తారని రీసెర్చర్లు చెప్తున్నారు. గతంలో మధ్యప్రదేశ్, గుజరాత్, మహారాష్ట్ర, కర్నాటకలో మాత్రమే కనిపించిన ఈ బసాల్ట్ రాతి స్తంభాలు.. మన రాష్ట్రంలో కనిపించడం ఇదే మొదటిసారని కొత్త తెలంగాణ చరిత్ర బృందం కన్వీనర్ శ్రీరామోజు హరగోపాల్ చెప్పారు. సుమారు 6 కోట్ల ఏళ్ల క్రితం అగ్నిపర్వతం పేలి.. ప్రవహించిన లావా చల్లారి సెంట్రల్ ఇండియా, వెస్ట్ ఇండియాలోని అనేక చోట్ల వివిధ రూపాల్లో లావా శిలల్లా మారిపోయాయని చెప్పారు. రాష్ట్రంలో ఇలాంటి శిలా రూపాలు కనిపించడం ఇదే తొలిసారని జీఎస్ఐ రిటైర్డ్ డిప్యూటీ డైరెక్టర్ జనరల్ చకిలం వేణుగోపాల్ అన్నారు. ఉత్తర టర్కీలోని సైనప్ ప్రావిన్స్లో ఈ కాలమ్నార్ బసాల్ట్ శిలలు కనిపిస్తాయని, ప్రపంచంలో అనేక దేశాల్లో ఇలాంటి ప్రాంతాలను జియో టూరిజం కేంద్రాలుగా అభివృద్ధి చేశారని ఆయన చెప్పారు.
