న్యూఢిల్లీ, వెలుగు: ఉపాధి హామీ పథకాన్ని సమర్థంగా అమలు చేస్తున్నందుకు రాష్ట్రానికి ఐదు అవార్డులు వచ్చాయి. గురువారం కేంద్ర గ్రామీణాభివృద్ధి శాఖ ఈ అవార్డులను ప్రకటించింది. ఢిల్లీలో నిర్వహించిన కార్యక్రమంలో కేంద్ర మంత్రి నరేంద్ర సింగ్ తోమర్ అవార్డులను వివిధ రాష్ట్రాలకు అందించారు. 2018–19కి ప్రకటించిన అవార్డుల్లో రాష్ట్రానికి రెండు రాష్ట్రస్థాయి, రెండు జిల్లాస్థాయి, ఒక గ్రామస్థాయి అవార్డులు లభించాయి. మిషన్ వాటర్ కన్జర్వేషన్ అమలులో రాష్ట్రం జాతీయ స్థాయిలో రెండో స్థానాన్ని దక్కించుకుంది. శ్యాంప్రసాద్ ముఖర్జీ రూర్బన్ మిషన్లో భాగంగా జియోస్పేషియల్ ప్లానింగ్ను దేశంలోనే వేగంగా పూర్తి చేసినందుకు మరో అవార్డు వచ్చింది. ఆ రెండు అవార్డులను రాష్ట్ర ప్రభుత్వం తరఫున గ్రామీణాభివృద్ధి శాఖ కమిషనర్ రఘునందన్రావు అందుకున్నారు. లక్ష్యాలను చేరుకున్న జిల్లాల్లో రాజన్న సిరిసిల్ల నాలుగో స్థానంలో నిలవగా, సిద్దిపేట ఐదో స్థానాన్ని దక్కించుకుంది. ఈ అవార్డులను ఆయా జిల్లాల కలెక్టర్లు కృష్ణ భాస్కర్, పి. వెంకటరామి రెడ్డిలు తీసుకున్నారు. ఉపాధి హామీ ద్వారా అభివృద్ధి చెందిన గ్రామాల జాబితాలో వికారాబాద్ జిల్లాలోని నవాబ్పేట మండలం లింగంపల్లికి అవార్డు వచ్చింది. ఆ ఊరి సర్పంచ్ ఎస్. నర్సింహులు అవార్డును అందుకున్నారు.
