- వచ్చే నెల 8, 9 తేదీల్లో నిర్వహణకు
- అంతర్జాతీయ స్థాయిలో ఏర్పాట్లు
- ‘తెలంగాణ రైజింగ్–2047’ పేరుతో రాష్ట్ర భవిష్యత్తు ప్రణాళిక ఆవిష్కరణ
- 3 వేల మంది జాతీయ, అంతర్జాతీయ ప్రముఖులకు సీఎం ఆహ్వాన లేఖలు
- ‘కమ్.. జాయిన్ ది రైజ్’ అంటూ దిగ్గజ రాజకీయ, పారిశ్రామికవేత్తలు,
- టెక్‌ రంగ ప్రముఖులకు పిలుపు.. ప్రధాని మోదీ హాజరయ్యే చాన్స్
- దిగ్గజ ఫుట్బాల్ ప్లేయర్ మెస్సీ మ్యాచ్‌తో వేడుకల ముగింపు
హైదరాబాద్, వెలుగు: భారీ పెట్టుబడులను ఆకర్షించడమే ప్రధాన ఎజెండాగా ‘తెలంగాణ రైజింగ్ గ్లోబల్ సమిట్–2025’ నిర్వహణకు రాష్ట్ర సర్కారు సిద్ధమైంది. వచ్చేనెల 8, 9 తేదీల్లో హైదరాబాద్‌లోని భారత్ ఫ్యూచర్ సిటీ వేదికగా ఈ మెగా ఈవెంట్జరగనున్నది. అంతర్జాతీయస్థాయిలో ఈ వేడుకలను నిర్వహించేందుకు ప్రభుత్వం అన్ని ఏర్పాట్లు చేస్తున్నది. ‘తరలి రండి.. ఉజ్వల తెలంగాణలో పాలుపంచుకోండి (కమ్ జాయిన్ ది రైజ్)’ అనే నినాదంతో ప్రముఖులకు ఆహ్వానాలు పంపుతున్నది. కేవలం పెట్టుబడుల సదస్సుగానే కాకుండా, తెలంగాణ బ్రాండ్ ఇమేజ్‌ను ప్రపంచవ్యాప్తం చేసేలా ఈ కార్యక్రమాన్ని నిర్వహించాలని ప్రభుత్వం నిర్ణయించింది.
రాష్ట్ర అభివృద్ధికి రోడ్మ్యాప్
ఈ సమిట్‌లో చర్చలకే పరిమితం కాకుండా, రాబోయే రెండున్నర దశాబ్దాల తెలంగాణ ప్రస్థానాన్ని తెలియజేసేలా ‘తెలంగాణ రైజింగ్ 2047’ పేరుతో కీలక డాక్యుమెంట్‌ను ఆవిష్కరించనున్నారు. జాతీయ వృద్ధి లక్ష్యాలకు తగ్గట్టుగా, వికసిత్ భారత్ 2047 స్ఫూర్తితో ఈ రోడ్మ్యాప్ రూపొందిస్తున్నారు. రాష్ట్రంలో ఆర్థిక వృద్ధిని పరుగులు పెట్టించడం, అన్ని రంగాల్లో సమాన ప్రగతి సాధించడం, సమ్మిళిత వృద్ధి ద్వారా ప్రజలందరికీ సంక్షేమ ఫలాలు అందించడమే ఈ విజన్ డాక్యుమెంట్ లక్ష్యమని అధికారులు చెప్తున్నారు. డిసెంబర్ 9న సీఎం రేవంత్‌‌‌‌రెడ్డి చేతుల మీదుగా ఈ డాక్యుమెంట్ ఆవిష్కరణ జరగనుంది. భవిష్యత్ తెలంగాణ ముఖచిత్రం ఎలా ఉండబోతున్నది? పెట్టుబడిదారులకు ఎలాంటి అవకాశాలు ఉండబోతున్నాయి? అనేది ఈ డాక్యుమెంట్ ద్వారా ప్రపంచానికి చాటిచెప్పనున్నారు. మరోవైపు తెలంగాణ ఘనమైన సాంస్కృతిక వైభవాన్ని కూడా విదేశీ ప్రతినిధులకు పరిచయం చేయాలని ప్రభుత్వం నిర్ణయించింది. పెట్టుబడులంటే కేవలం వ్యాపారం మాత్రమే కాదు, ఇక్కడి జీవన విధానం, సురక్షితమైన వాతావరణం కూడా ముఖ్యమేనని వెల్లడించబోతున్నది. భారత్‌‌‌‌లో ఎవరైనా పెట్టుబడులు పెట్టాలనుకుంటే తెలంగాణే.. వారి మొదటి చాయిస్ కావాలనే లక్ష్యంతో ఈ సమిట్ డిజైన్ చేశారు. గ్లోబల్ ఇన్నోవేషన్ హబ్‌‌‌‌గా రాష్ట్రాన్ని తీర్చిదిద్దేందుకు అవసరమైన అన్ని వనరులు ఇక్కడ పుష్కలంగా ఉన్నాయని ప్రపంచానికి తెలియజెప్పడమే ప్రధాన ఉద్దేశంగా సదస్సును ప్రభుత్వం నిర్వహిస్తున్నది.
పెట్టుబడులకు డెస్టినేషన్‌‌‌‌గా తెలంగాణ
తెలంగాణ రాష్ట్రం పెట్టుబడులకు స్వర్గధామంగా ఎలా మారిందో వివరించేలా ప్రత్యేక ప్రదర్శనలు ఈ సదస్సులో ఏర్పాటు చేయనున్నారు. ఇక్కడి ఫార్మా ఎకో సిస్టమ్ ప్రపంచంలోనే అత్యుత్తమమైనదిగా గుర్తింపు పొందింది. అలాగే ఐటీ, లైఫ్ సైన్సెస్, ఏరోస్పేస్ రంగాల్లో హైదరాబాద్‌‌‌‌కు ఉన్న సానుకూలతలను ప్రభుత్వం ప్రముఖంగా ప్రస్తావించనుంది. విస్తారమైన భూములు అందుబాటులో ఉండటం, అనుకూలమైన వాతావరణ పరిస్థితులు, నాణ్యమైన రోడ్లు, మౌలిక వసతులు, 24 గంటల విద్యుత్ సరఫరాలాంటి అంశాలను ఇన్వెస్టర్ల ముందుంచనున్నది. ప్రభుత్వం తరఫున అందించే రాయితీలు, సులభతర వాణిజ్య విధానాలులాంటివి, పారిశ్రామికవేత్తలను ఆకర్షించేలా రూపొందించిన ప్రజెంటేషన్లు సదస్సులో హైలైట్‌‌‌‌గా నిలవనున్నాయి. అన్ని శాఖల నుంచి రెండేండ్ల సక్సెస్ స్టోరీస్‌‌‌‌తోపాటు రాబోయే 22 ఏండ్ల ప్రగతి ప్లాన్‌‌‌‌ను వివరించేలా పవర్ పాయింట్ ప్రజెంటేషన్స్ ఇవ్వనున్నారు.
సీఎం పేరిట ఆహ్వానాలు
దేశ, విదేశాలకు చెందిన దాదాపు 3 వేల మందికిపైగా దిగ్గజ పారిశ్రామికవేత్తలు, వాణిజ్య ప్రముఖులకు రాష్ట్ర ప్రభుత్వం నుంచి ఆహ్వానాలు వెళ్లాయి. సీఎం రేవంత్‌‌‌‌రెడ్డి పేరుతో ఈ ఆహ్వాన లేఖలను పంపించారు. ప్రపంచవ్యాప్తంగా వివిధ రంగాల్లో రాణిస్తున్న రాజకీయ నాయకులు, టెక్‌ దిగ్గజాలు, భారీ కంపెనీల సీఈవోలను ఈ జాబితాలో చేర్చారు. బ్రిటన్ మాజీ ప్రధాని టోనీ బ్లెయిర్‌ మొదలుకొని.. ట్రంప్ మీడియా అండ్ టెక్నాలజీ గ్రూప్ డైరెక్టర్ ఎరిక్ స్విడర్, భారతీయ పారిశ్రామిక దిగ్గజం ఆనంద్ మహీంద్రా, యునైటెడ్ అరబ్ ఎమిరేట్స్ రాయల్ ఫ్యామిలీ సభ్యుల వరకు ఎందరో ప్రముఖులను ఈ వేదికపైకి తీసుకువచ్చేందుకు ప్రభుత్వం గట్టి ప్రయత్నాలే చేస్తున్నది. ఈ అంతర్జాతీయ వేదికకు మరింత వన్నె తెచ్చేలా ప్రధాని నరేంద్ర మోదీ కూడా హాజరయ్యే అవకాశాలు కనిపిస్తున్నాయి. ఒకవేళ ప్రధాని వస్తే ఈ సదస్సు ప్రాధాన్యత జాతీయ స్థాయిలో మరింత పెరగనున్నది. కేంద్ర, రాష్ట్ర ప్రభుత్వాల సమన్వయంతో తెలంగాణను పారిశ్రామిక హబ్‌‌‌‌గా మార్చే దిశగా ఈ సమిట్ దోహదపడుతుందని విశ్లేషకులు భావిస్తున్నారు. దీని ద్వారా రాష్ట్రానికి వచ్చే పెట్టుబడులు, కుదుర్చుకోబోయే ఒప్పందాలు తెలంగాణ ఆర్థిక గతిని మారుస్తాయని ప్రభుత్వం విశ్వసిస్తున్నది. కేవలం రెండు రోజుల కార్యక్రమంగా కాకుండా, దీర్ఘకాలిక ప్రయోజనాలను దృష్టిలో ఉంచుకొని వ్యూహాత్మకంగా అడుగులు వేస్తున్నది.
13న మెస్సీతో ఫుట్బాల్ మ్యాచ్!
వేడుకల ముగింపు ఘట్టం గ్రాండ్‌గా ప్లాన్ చేశారు. ప్రపంచ ఫుట్బాల్ రారాజు, అర్జెంటీనా దిగ్గజం లియోనల్ మెస్సీ హైదరాబాద్ గడ్డపై అడుగుపెట్టనున్నారు. సదస్సు అనంతరం డిసెంబర్ 13న మెస్సీ పాల్గొనే ప్రత్యేక కార్యక్రమంలో ఒక ఎగ్జిబిషన్ ఫుట్బాల్ మ్యాచ్‌ను నిర్వహిస్తున్నారు. మెస్సీ రాకతో తెలంగాణ బ్రాండ్ ఇమేజ్ అంతర్జాతీయ క్రీడా వేదికలపై కూడా మార్మోగుతుందని భావిస్తున్నారు. పెట్టుబడుల సదస్సుకు, క్రీడా సంబురానికి ముడిపెడుతూ ప్రభుత్వం చేస్తున్న ఈ ప్రయత్నం ‘తెలంగాణ రైజింగ్’కు ప్రత్యేక ఆకర్షణగా, అద్భుతమైన ముగింపుగా నిలుస్తుందని నిపుణులు పేర్కొంటున్నారు.
‘టీజీ-ఐపాస్ 2.0’.. పరిశ్రమలకు జీరో టచ్ అనుమతులు
పరిశ్రమల స్థాపన అనుమతుల ప్రక్రియను మరింత సులభం చేసేలా విప్లవాత్మక మార్పులకు ప్రభుత్వం శ్రీకారం చుట్టింది. ‘టీజీ -ఐపాస్ 2.0’ పేరుతో తీసుకురానున్న కొత్త విధానంలో మానవ ప్రమేయం లేని ఆటోమేటిక్ అనుమతుల వ్యవస్థను అందుబాటులోకి తేబోతున్నది. బ్లాక్-చైన్‌‌‌‌లాంటి అత్యాధునిక సాంకేతికతను ఉపయోగించి 2039 నాటికి సంపూర్ణంగా ఆటోమేటెడ్ క్లియరెన్స్ ఇచ్చే స్థాయికి చేరుకోవాలని ప్రభుత్వం లక్ష్యంగా పెట్టుకున్నది. అలాగే వాణిజ్యపరమైన వివాదాల పరిష్కారం కోసం అంతర్జాతీయ ప్రమాణాలతో ‘మధ్యవర్తిత్వ కేంద్రం’ (ఆర్బిట్రేషన్ సెంటర్)ను ఏర్పాటు చేయబోతున్నది. దీని ద్వారా వర్చువల్ విధానంలోనే సమస్యలను పరిష్కరించి.. పెట్టుబడిదారుల్లో నమ్మకాన్ని పెంచాలని యోచిస్తున్నది. రాష్ట్ర ఆర్థిక వ్యవస్థకు వెన్నెముకగా ఉన్న సూక్ష్మ, చిన్న, మధ్య తరహా పరిశ్రమలకు (ఎంఎస్ఎంఈ) ఆర్థిక ఇబ్బందులు లేకుండా చూసేందుకు సరికొత్త రుణ విధానాన్ని అమల్లోకి తేబోతున్నారు. ఇందుకోసం ప్రభుత్వం ప్రత్యేకంగా ‘సమాచార మార్పిడి వేదిక’ను ఏర్పాటు చేయనుంది. అలాగే అధిక వృద్ధి రేటు ఉన్న స్టార్టప్‌‌‌‌లు, చిన్న పరిశ్రమల కోసం ‘ఈక్విటీ గ్యారెంటీ పథకాన్ని’ ప్రవేశపెట్టనున్నారు. ఇందులో పెట్టుబడి పెట్టే సంస్థలకు నష్టం వాటిల్లితే కొంత మొత్తాన్ని ప్రభుత్వమే భరించేలా భరోసా కల్పిస్తారు. ఈ విధానం వల్ల చిన్న పరిశ్రమలు అంతర్జాతీయ స్థాయి సంస్థలుగా ఎదిగేందుకు, మరిన్ని ఉద్యోగాలు కల్పించేందుకు మార్గం సుగమం అవుతుంది.
