- రాజ్ భవన్ ముట్టడికి ప్రయత్నించిన స్టూడెంట్లు
- అడ్డుకున్న పోలీసులు.. 40 మంది విద్యార్థులకు గాయాలు
మణిపూర్లో మళ్లీ ఉద్రిక్తత నెలకొంది. డీజీపీ, స్టేట్ సెక్యూరిటీ అడ్వైజర్ను తొలగించాలని డిమాండ్ చేస్తూ ఇంఫాల్లో స్టూడెంట్లు చేపట్టిన రాజ్ భవన్ ముట్టడి హింసాత్మకంగా మారింది. ఈ ఘటనలో 40 మంది స్టూడెంట్స్ గాయపడ్డారు.
న్యూఢిల్లీ: మణిపూర్లో మళ్లీ ఉద్రిక్తత నెలకొంది. ఇంఫాల్లో స్టూడెంట్లు చేపట్టిన రాజ్భవన్ ముట్టడి హింసాత్మకంగా మారింది. రాష్ట్రంలో లా అండ్ ఆర్డర్ను కంట్రోల్ చేయడంలో డీజీపీ, స్టేట్ సెక్యూరిటీ అడ్వైజర్ విఫలమయ్యారని.. వాళ్లిద్దరినీ తొలగించాలని డిమాండ్ చేస్తూ స్టూడెంట్లు మంగళవారం రాజ్ భవన్ ముట్టడికి ప్రయత్నించారు. ఈ క్రమంలో స్టూడెంట్లను పోలీసులు అడ్డుకున్నారు. దీంతో పోలీసుల పైకి స్టూడెంట్లు రాళ్లు రువ్వారు. స్టూడెంట్లను కంట్రోల్ చేసేందుకు పోలీసులు టియర్ గ్యాస్ ప్రయోగించారు. ఈ ఘటనలో 40 మందికి పైగా స్టూడెంట్లకు గాయాలయ్యాయి. వాళ్లందరినీ ఆస్పత్రిలో చేర్పించి, ట్రీట్మెంట్ అందిస్తున్నారు. కాగా, మణిపూర్లో మళ్లీ ఉద్రిక్త పరిస్థితులు నెలకొనడంతో రాష్ట్రవ్యాప్తంగా ఇంటర్నెట్ను ఐదు రోజుల పాటు బంద్ చేస్తూ ప్రభుత్వం ఆదేశాలిచ్చింది. ఈ నెల 15 వరకు ఇంటర్నెట్ సేవలను నిలిపివేస్తున్నట్టు తెలిపింది. అలాగే ఇంఫాల్ ఈస్ట్, ఇంఫాల్ వెస్ట్, థౌబల్ జిల్లాల్లో కర్ఫ్యూ విధించింది. మరోవైపు అల్లర్ల నేపథ్యంలో కేంద్ర ప్రభుత్వం కూడా అలర్ట్ అయింది. 2 వేల మంది సీఆర్ పీఎఫ్ జవాన్లను మణిపూర్కు పంపించాలని ఆదేశాలిచ్చింది. తెలంగాణలోని వరంగల్ నుంచి ఒక బెటాలియన్, జార్ఖండ్ నుంచి మరో బెటాలియన్ను పంపిస్తున్నది.
ప్రధాని మోదీపై కాంగ్రెస్ ఫైర్..
మణిపూర్లో మళ్లీ అల్లర్లు చెలరేగడంతో కేంద్ర ప్రభుత్వంపై కాంగ్రెస్ మండిపడింది. ‘‘ప్రధాని మోదీ ప్రపంచమంతటా పర్యటిస్తున్నారు. కానీ ఆయనకు మణిపూర్కు రావడానికి మాత్రం టైమ్ లేదా? మణిపూర్లో అల్లర్లు చెలరేగి ఏడాది దాటింది. కానీ అక్కడ ఇంకా ఉద్రిక్త పరిస్థితులే ఉన్నాయి. మణిపూర్ మండిపోవాలని ప్రధాని మోదీ కోరుకుంటున్నారు. అందుకే ఆయన పట్టించుకోవడం లేదు” అని కాంగ్రెస్ జనరల్ సెక్రటరీ జైరాం రమేశ్ మండిపడ్డారు.
