- మే 9, 10, 11 తేదీల్లో ఇంజనీరింగ్ స్ట్రీమ్కు ఎగ్జామ్స్
- మే 12న ఎడ్సెట్.. 13, 14 తేదీల్లో ఐసెట్
హైదరాబాద్, వెలుగు: రాష్ట్రంలో వచ్చే విద్యా సంవత్సరం (2026–27) వివిధ ప్రొఫెషనల్ కోర్సుల్లో అడ్మిషన్ల కోసం నిర్వహించే కామన్ ఎంట్రెన్స్ టెస్టుల (టీజీ సెట్స్–2026) షెడ్యూల్ రిలీజ్ అయింది. మే 4 నుంచి 11 వరకు టీజీ ఎప్ సెట్ పరీక్షలు ఉంటాయని అధికారులు ప్రకటించారు. మంగళవారం తెలంగాణ హయ్యర్ ఎడ్యుకేషన్ కౌన్సిల్ ఆఫీసులో టీజీసీహెచ్ఈ చైర్మన్ ప్రొఫెసర్ బాలకిష్టారెడ్డి, సెక్రటరీ శ్రీరామ్ వెంకటేశ్ సెట్స్ షెడ్యూల్ను రిలీజ్ చేశారు.
మే నెలలోనే దాదాపు అన్ని ప్రవేశ పరీక్షలు ఉండేలా షెడ్యూల్ రెడీ చేశారు. బీటెక్, బీఈ, బీఫార్మసీ, ఫార్మసీ, అగ్రికల్చర్ తదితర కోర్సుల్లో ప్రవేశాల కోసం టీజీ ఎప్ సెట్ లో భాగంగా అగ్రికల్చర్, ఫార్మసీ స్ట్రీమ్కు మే 4, 5 తేదీల్లో.. ఇంజనీరింగ్ స్ట్రీమ్కు మే 9, 10, 11 తేదీల్లో పరీక్షలు నిర్వహించనున్నారు.
ఈసారి కూడా టీజీ ఎప్ సెట్ నిర్వహణ బాధ్యతను జేఎన్టీయూహెచ్ కే అప్పగించారు. పూర్తిస్థాయి నోటిఫికేషన్లు, రిజిస్ట్రేషన్ వివరాలను త్వరలోనే ఆయా ప్రవేశపరీక్షల కన్వీనర్లు ప్రకటిస్తారని బాలకిష్టారెడ్డి తెలిపారు. ప్రవేశ పరీక్షలన్నీ ప్రశాంతంగా నిర్వహించేలా అన్ని ఏర్పాట్లు చేస్తున్నామని వివరించారు. ఈ ఏడాది కూడా ఎప్ సెట్ మాక్ కౌన్సెలింగ్ నిర్వహిస్తామని చెప్పారు.
