హైదరాబాద్, వెలుగు: ఏపీ సర్కారు మాట మార్చింది. త్రీమెన్ కమిటీ మీటింగ్కు ముందు వస్తామన్న ఏపీ.. ఆ తెల్లారే రాలేమంది. భారీ స్థాయిలో తరలించుకుపోయిన నీటి లెక్కలు చెప్పాల్సివస్తుందన్న భయంతోనే మీటింగ్కు రాకుండా డుమ్మా కొడుతోంది. వాటర్ రిలీజ్ ఆర్డర్తో పాటు ఇంకొన్ని విషయాలపై చర్చించేందుకు ఈ నెల 20న త్రీమెన్ కమిటీ మీటింగ్ పెట్టాలని కృష్ణా రివర్ మేనేజ్మెంట్ బోర్డు (కేఆర్ఎంబీ) నిర్ణయించింది. ఏపీ, తెలంగాణ ఈఎన్సీలతో మాట్లాడిన తర్వాతే బోర్డు మెంబర్ సెక్రటరీ హరికేశ్ మీనా మీటింగ్ను కన్ఫర్మ్ చేశారు. ఈ సమాచారాన్ని అధికారికంగా తెలియజేస్తూ రెండు రాష్ట్రాలకూ లేఖ రాశారు. అయితే, మీటింగ్కు వచ్చేందుకు ముందు ఏపీ ఈఎన్సీ ఒప్పుకున్నా.. ఆ తెల్లారే మాట మార్చేశారు. వరదలు భారీగా వస్తుండడంతో పరిస్థితిని సమీక్షించాల్సి ఉందని, సమావేశానికి రాలేనని చెబుతూ లేఖ రాశారు.
వాడుకున్నదెంతో చెప్పకుండనే
జూరాల నుంచి పులిచింతల వరకు ప్రాజెక్టుల నుంచి సముద్రంలోకి నీటిని వదులుతున్న రోజుల్లో (సర్ప్లస్ డేస్) వాడుకున్న నీటిని లెక్కించొద్దని ఏపీ కోరుతోంది. దీనిపై సెంట్రల్ వాటర్ కమిషన్ (సీడబ్ల్యూసీ) ఏర్పాటు చేసిన టెక్నికల్ కమిటీ పరిశీలన చేస్తోంది. అయితే, కమిటీకి ఏపీ సరైన వివరాలేవీ ఇవ్వట్లేదు. అంతేకాదు.. డిసెంబర్ వరకు ఇంకో 216 టీఎంసీల నీటిని కేటాయించాలని కోరుతూ కృష్ణాబోర్డుకు కొన్ని రోజుల కిందటే మరో ఇండెంట్ కూడా పంపింది. ఆ ఇండెంట్లోనూ అప్పటికే వాడుకున్న నీటి లెక్కలను చెప్పకుండానే సర్ప్లస్ డేస్లో తీసుకున్న నీటిని మినహాయించాలని పేర్కొంది. ఈ ప్రతిపాదనను మన రాష్ట్రం తీవ్రంగా వ్యతిరేకించింది. దానిపై చర్చించేందుకు త్రీమెన్ కమిటీ మీటింగ్ పెట్టాలని బోర్డుకు లేఖ రాసింది. రెండు రాష్ట్రాలతో మాట్లాడిన బోర్డు.. మీటింగ్ డేట్ ఫిక్స్ చేసింది.
ఫ్లడ్, యుటిలైజేషన్ డేటా ఇవ్వండి
ఏపీకి కృష్ణా బోర్డు తాజా లెటర్
జూరాల నుంచి నాగార్జునసాగర్ వరకు అన్ని ప్రాజెక్టుల వరద, వాడుకున్న నీటి లెక్కలు ఇవ్వాల్సిందిగా ఏపీని కృష్ణా బోర్డు ఆదేశించింది. గురువారం ఏపీ ఈఎన్సీకి బోర్డు మెంబర్ సెక్రటరీ హరికేశ్ మీనా లెటర్ రాశారు. జూరాల నుంచి నాగార్జునసాగర్ వరకు ప్రాజెక్టులు నిండి నీటిని సముద్రంలోకి వదులుతున్న రోజుల్లో ఏపీ, తెలంగాణ ఉపయోగించుకున్న నీటి లెక్కలు తేల్చేందుకు ఏర్పాటు చేసిన టెక్నికల్ కమిటీ సమావేశం కోసం వివరాలు ఇవ్వాలని కోరారు. జూరాల, శ్రీశైలం, నాగార్జునసాగర్ రిజర్వాయర్లకు గత 20 ఏళ్లలో వచ్చిన వరద వివరాలను నెల, సంవత్సరాల వారీగా ఇవ్వాలని సూచించారు. రెండు రాష్ట్రాల మధ్య తాత్కాలికంగా చేసుకున్న నీటి వాటాల ప్రకారం ఏ రాష్ట్రం ఎంత నీటిని ఉపయోగించుకుందో ఆ వివరాలు ఇవ్వాలన్నారు. ఈ ఏడాది మే 13న నిర్వహించిన టెక్నికల్ కమిటీ తొలి సమావేశంలో పాల్గొన్న ఏపీ ఇంటర్ స్టేట్ సీఈ ఆ వివరాలు ఇచ్చేందుకు ఒప్పుకున్నారని గుర్తు చేశారు. వీలైనంత త్వరగా వివరాలు ఇస్తే టెక్నికల్ కమిటీ మరోసారి సమావేశమై సర్ప్లస్ నీటి వాటాలను తేల్చుతుందని చెప్పారు.
145 టీఎంసీలు తీసుకుంది
17 టీఎంసీల నీటిని మాత్రమే తీసుకునేందుకు ఏపీకి కృష్ణా బోర్డు రిలీజ్ ఆర్డర్ ఇచ్చింది. కానీ, బుధవారం వరకు వివిధ ఔట్లెట్ల నుంచి దాదాపు 145 టీఎంసీలను తరలించుకుపోయింది. పోతిరెడ్డిపాడు హెడ్ రెగ్యులేటర్ నుంచి 86.70 టీఎంసీలు, కృష్ణా డెల్టా సిస్టంకు 35, నాగార్జునసాగర్ కుడి కాలువకు 15, ముచ్చుమర్రి ద్వారా 7.60 టీఎంసీల నీటిని తరలించుకుంది. ఇందులో 120 టీఎంసీల వరకు ప్రాజెక్టులు సర్ప్లస్ అయ్యే రోజుల్లోనే ఏపీ తరలించుకుపోయినట్టుగా తెలంగాణ ఇంజనీర్లు చెప్తున్నారు. మొదటి రిలీజ్ ఆర్డర్ తర్వాత 71 టీఎంసీలు ఇవ్వాలని ఒకసారి, 216 టీఎంసీలు కావాలని ఇంకోసారి ఏపీ ఇండెంట్లు పంపింది. మొత్తంగా డిసెంబర్ వరకు 304 టీఎంసీలు ఇవ్వాలంది. అయితే, వరద ఎక్కువగానే వస్తున్నా మన రాష్ట్రం ఇప్పటిదాకా వాడుకుంది కేవలం 30.5 టీఎంసీలే. నాగార్జునసాగర్ ఎడమ కాలువ నుంచి 13 టీఎంసీలు, ఏఎమ్మార్పీ నుంచి 7.7, కల్వకుర్తి నుంచి 5, హైదరాబాద్ తాగునీటికి 4.8 టీఎంసీలు తీసుకుంది. కరోనా కారణంగా కల్వకుర్తి పంపులను బంద్పెట్టింది. ఆ మోటార్లను నడిపి ఉంటే మరో 10 టీఎంసీలకుపైగానే తీసుకునే అవకాశం ఉండేది. సర్ప్లస్ డేస్లో ఏపీ వాడుకున్న నీటితో పోలిస్తే.. మనం వాడుకుంది జస్ట్ ఆరో వంతే.
