- పెద్దపల్లి జిల్లా మడకలో మానేరు చెక్ డ్యామ్పరిస్థితి ఇది
- తాజా వరదలతోబయటపడ్డ క్వాలిటీ లోపం
- 50 ఎకరాల్లో పంట నష్టం
- ఆదుకోవాలంటున్న రైతులు
పెద్దపల్లి, వెలుగు: పెద్దపల్లి జిల్లా ఓదెల మండలం మడకలో మానేరు నదిపై కట్టిన చెక్డ్యామ్కట్టిన ఏడాదికే కొట్టుకు పోయింది. లోయర్ మానేరు డ్యామ్ నుంచి ఇటీవల నీళ్లు విడుదల చేయడంతో ఆ ప్రవాహానికి చెక్డ్యామ్ కొట్టుకుపోగా.. దాని కారణంగా ఊరిలో 50 ఎకరాల్లో పంట దెబ్బతింది. ఆఫీసర్లు మాత్రం చెక్ డ్యామ్ 30 శాతమే కొట్టుకుపోయిందని, కాంట్రాక్టర్తో మళ్లీ కట్టిస్తామని చెబుతున్నారు.ఇటీవల వరుసగా ప్రాజెక్టుల్లో క్వాలిటీ లోపాలు బయటపడుతున్నాయి. మిడ్మానేరు కట్ట తెగడం, కొండపోచమ్మ సాగర్ఆనకట్ట కుంగడం, వాక్ఓవర్బ్రిడ్జి కూలడం, కాళేశ్వరం మెయిన్ కెనాల్ లైనింగ్ ఊడిపోవడం, గతేడాది జంపన్నవాగు వద్ద చెక్డ్యామ్లు కొట్టుకుపోవడం తెలిసిందే.
ఇప్పుడు.. మానేరు నదిపై రూ.10 కోట్లతో నిర్మించిన చెక్డ్యామ్ కూడా కొట్టుకుపోయింది. భూగర్భ జలాలను పెంచేందుకు మానేరు నదిపై పెద్దపల్లి జిల్లా ఓదెల మండలంలోని మడక, రూఫ్ నారాయణపేట, గుంపుల గ్రామశివారులో మూడు చెక్ డ్యామ్ల నిర్మాణం చేపట్టాలని నిర్ణయించిన ప్రభుత్వం.. 2016లో ఫండ్స్కేటాయించగా టెండర్లు పూర్తి అయి 2018లో పనులు ప్రారంభించారు. 800 మీటర్ల పొడవు ఉన్న మానేరు నదిపై ఒక చెక్ డ్యాం నిర్మాణానికి రూ. 10 కోట్ల అంచనాతో పనులు చేపట్టారు. మూడు చోట్ల గతేడాదే చెక్డ్యామ్ల పనులు పూర్తి అయ్యాయి. గడిచిన వారం రోజులుగా కురుస్తున్న వర్షాలతో లోయర్ మానేరు డ్యామ్గేట్లు ఎత్తి నీటిని దిగువకు వదులుతున్నారు. సుమారు లక్ష క్యూసెక్యుల నీరు మానేరు నదిలోకి రావడంతో ఓదెల మండలం మడకలోని చెక్ డ్యామ్ మూడురోజుల కింద కొట్టుకుపోయింది.
90 శాతమే నిర్మాణం పూర్తయిందట!
విషయం తెలిసి ఇరిగేషన్ ఆఫీసర్లు మాటమారుస్తున్నారు. క్వాలిటీపై ప్రభుత్వానికి ఎక్కడ చెడ్డపేరు వస్తుందోనని చెక్డ్యామ్ నిర్మాణం 90శాతం మాత్రమే పూర్తయిందని చెబుతున్నారు. 30 శాతం మాత్రమే కొట్టుకుపోయిందని, కొట్టుకుపోయిన చోట కాంట్రాక్టర్తోనే తిరిగి నిర్మిస్తామంటున్నారు. చెక్డ్యామ్ ఎన్నడో పూర్తయిందని, నిర్మాణంలో క్వాలిటీ పాటించకపోవడం వల్లే కొట్టుకుపోయిందని స్థానిక రైతులు అంటున్నారు.
50 ఎకరాల్లో పంట నష్టం
మడక గ్రామంలోని చెక్డ్యామ్కొట్టుకుపోవడంతో చుట్టుపక్కల పంట పొలాల్లోకి వరద నీరుపోటెత్తిందని రైతులు చెబుతున్నారు. దీంతో 50 ఎకరాల్లో వరి పంట పనికిరాకుండా పోయిందని ఆవేదన వ్యక్తం చేస్తున్నారు. చెక్ డ్యాం ఒక్కసారిగా తెగిపోవడంతో ఆ ధాటికి మానేరు ఒడ్డు చాలామేర కోతకు గురైంది. పొలాల్లో మట్టి, ఇసుక మేటలు వేశాయి. మానేరు తీరంలో కరెంట్ మోటర్ల కోసం ఏర్పాటు చేసుకున్న ఐదు ట్రాన్స్ఫార్మర్లు పడిపోయాయి. కరెంట్ మోటర్లు, పైపులు కొట్టుకుపోయాయి. తమకు పరిహారం ఇప్పించాలని బాధితులు వేడుకుంటున్నారు.
పరిహారం చెల్లించాలి
మడకలో చెక్ డ్యామ్ ఒక్కసారిగా కొట్టుకుపోవడంతో నాకున్న రెండు ఎకరాల పొలం పూర్తిగా కోతకు గురైంది. మిగిలిన పొలం కూడా పనికి రాకుండా పోయింది. నాతోపాటు ఊర్లో మస్తు మంది రైతుల పొలాలు అక్కరకు రాకుండపోయినయ్. కాంట్రాక్టర్ క్వాలిటీతో డ్యామ్ కట్టకపోవడంతోనే నా పొలం ఇట్లయింది. నష్టపోయిన రైతులందరికి సర్కార్ పరిహారం చెల్లించాలి.
– ఎల్కపల్లి సురేశ్‌, రైతు, మడక
క్వాలిటీ లేకపోవడం వల్లే..
మడక గ్రామంలో మానేరుపై చెక్డ్యామ్ నిర్మాణ సమయంలో క్వాలిటీ పాటించకపోవడంతోనే కొట్టుకు పోయింది. ఒక ప్రణాళిక లేకుండా హడావుడిగా పనులు చేయడంతో ప్రజాధనం వృథా అయింది. మానేరు నదిలో ఎన్ని నీళ్లు వస్తాయి అనే అంచనా లేకుండా కట్టడం వల్లే ఇలా జరిగింది. టీఆర్ఎస్ ప్రజాప్రతినిధులకు, ఆఫీసర్లకు కమీషన్లపై ఆశే తప్ప పనులపై ధ్యాస లేకపోవడం వల్లే ఇలా జరిగింది.
– గంట రాములు, ఓదెల జడ్పీటీసీ
