వేములవాడ, వెలుగు : ఒరిజినల్ ఆధార్ కార్డు లేదని ఆర్టీసీ బస్సులో నుంచి యువతిని కండక్టర్ మధ్యలోనే దించేశారు. తిప్పాపూర్ పట్టణానికి చెందిన జస్విని వేములవాడలో హైదరాబాద్ వెళ్తున్న ఆర్టీసీ బస్సు ఎక్కింది. 3 కిలోమీటర్లు వెళ్లిన తర్వాత కండక్టర్ చెకింగ్ చేశాడు. ఆమె తన ఆధార్ కార్డు కలర్ జిరాక్స్ చూపించింది. ఇందుకు తమ రూల్స్ ఒప్పుకోవని, ఒరిజినల్ కార్డు చూపాలని చెప్పి కండక్టర్ ఆమెను నంది కమాన్ వద్ద ప్రాంతంలో దించారు.
దీంతో ఆ యువతి తన కుటుంబ సభ్యులకు విషయం చెప్పడంతో వారు డిపో మేనేజర్తో వాగ్వాదానికి దిగారు. మధ్యలో ఎలా దింపుతారని సదరు కండక్టర్పై ఫిర్యాదు చేశారు. ఆమె కలర్ జిరాక్స్ చూపినందుకు దింపేశారని మేనేజర్ తెలిపారు. బస్సులో ప్రయాణించే మహిళలు ఒరిజినల్ ఆధార్ కార్డు చూపించాలని ఆయన పేర్కొన్నారు.
