- ప్రజలు కోరిన చోట క్యాంటీన్లు ఏర్పాటు చేస్తం
- సుందరయ్య పార్క్, కవాడిగూడలో క్యాంటీన్లు ప్రారంభం
ముషీరాబాద్, వెలుగు: ఆకలి బాధల్లేని హైదరాబాదే లక్ష్యంగా ఇందిరమ్మ క్యాంటీన్లు ఏర్పాటు చేసి, పేదల కడుపు నింపుతున్నామని మంత్రి పొన్నం ప్రభాకర్ తెలిపారు. ప్రజలు కోరిన చోట జీహెచ్ఎంసీ సౌజన్యంతో క్యాంటీన్లు ఏర్పాటు చేస్తామన్నారు. శుక్రవారం సుందరయ్య పార్క్, కవాడిగూడలో ఏర్పాటు చేసిన క్యాంటీన్లను మేయర్ గద్వాల్ విజయలక్ష్మి, ఎంపీ అనిల్ కుమార్ యాదవ్, ఎమ్మెల్యే ముఠా గోపాల్, డిప్యూటీ మేయర్ మోతే శ్రీలతా శోభన్ రెడ్డితో కలిసి ఆయన ప్రారంభించారు.
ఈ సందర్భంగా మాట్లాడుతూ.. మౌలిక సదుపాయాలు, సంక్షేమానికి ప్రజాప్రభుత్వం ప్రాధాన్యత ఇస్తోందని, బడుగు బలహీనుల కోసం ఇందిరాగాంధీ పేరిట రూ.5కే నాణ్యమైన అల్పాహారం, భోజనం అందిస్తున్నామని తెలిపారు. హరే కృష్ణ మూమెంట్ చారిటబుల్ ఫౌండేషన్ నిర్వహణ బాధ్యత చూస్తుందన్నారు.
ఇందిరమ్మ క్యాంటీన్లతో ప్రతి లబ్ధిదారునికి నెలకు సగటున సుమారు రూ.3 వేల వరకు ఆర్థిక ప్రయోజనం కలుగుతుందన్నారు. మేయర్ మాట్లాడుతూ.. ఇందిరమ్మ కాంటీన్లకు ప్రజల నుంచి స్పందన బాగుందని, బ్రేక్ ఫాస్ట్ కు రూ.14 , భోజనానికి రూ.24. 83ను జీహెచ్ఎంసీ కంట్రిబ్యూషన్ చేస్తుందన్నారు. ఈ కార్యక్రమంలో కార్పొరేటర్లు రవి చారి, రచనశ్రీ, జీహెచ్ఎంసి అధికారులు పాల్గొన్నారు.
