బడ్జెట్కు ఆమోదంపై ఇంకా నిర్ణయం తీసుకోని తమిళిసై
3 నుంచి అసెంబ్లీ సమావేశాలు
జాయింట్ సెషన్ ఎందుకు పెడ్తలేరని ప్రశ్నించిన గవర్నర్
నేడు హైకోర్టులో పిటిషన్ వేయనున్న రాష్ట్ర ప్రభుత్వం
హైదరాబాద్, వెలుగు : రాష్ట్ర ప్రభుత్వానికి గవర్నర్ షాక్ ఇచ్చారు. వరుసగా రెండో సారి తన ప్రసంగం లేకుండానే అసెంబ్లీ బడ్జెట్ సమావేశాలు ఏర్పాటు చేస్తే బడ్జెట్కు ఎట్లా ఆమోదం తెలపాలని ప్రశ్నిస్తూ ప్రభుత్వానికి గవర్నర్ తమిళిసై లేఖ రాసినట్లు రాజ్భవన్ వర్గాలు తెలిపాయి. అసెంబ్లీ, కౌన్సిల్ జాయింట్ సెషన్ను ఎందుకు నిర్వహించడం లేదని ఆమె ప్రశ్నించారు. సమావేశాలకు టైమ్దగ్గరపడుతుండటం, బడ్జెట్కు గవర్నర్ ఆమోదం లభించకపోవడంతో ప్రభుత్వం హైకోర్టుకు వెళ్లేందుకు సిద్ధమైంది. సోమవారం లంచ్ మోషన్ పిటిషన్ వేసి బడ్జెట్కు గవర్నర్ ఆమోదం తెలిపేలా ఆదేశించాలని కోరనుంది. ఫిబ్రవరి 3 నుంచి అసెంబ్లీ బడ్జెట్ సమావేశాలు నిర్వహించాలని ప్రభుత్వం ఇప్పటికే నిర్ణయించింది.
మొదటి రోజే బడ్జెట్ను ప్రవేశపెట్టనున్నట్లు ప్రకటించింది. అసెంబ్లీని ప్రొరోగ్ చేయనందున ఈ సెషన్ సందర్భంగా గవర్నర్ ప్రసంగం ఏర్పాటు చేయడం లేదంటూ ఈ నెల 21న గవర్నర్ కు ప్రభుత్వం నుంచి బడ్జెట్ ఫైల్ను పంపారు. నిరుడు కూడా ఇదే తరహాలో గవర్నర్ స్పీచ్ లేకుండానే ప్రభుత్వం బడ్జెట్ సమావేశాలు పెడితే ప్రజలకు ఇబ్బంది తలెత్తకూడదనే ఉద్దేశంతో గవర్నర్ అప్పుడు బడ్జెట్ కు ఆమోదం తెలిపారు. వరుసగా రెండో ఏడాది రాష్ట్ర ప్రభుత్వం తన స్పీచ్ లేకుండా చేయడంతో గవర్నర్ బాహాటంగానే తప్పుబట్టారు. రెండేండ్లుగా తనకు ప్రభుత్వం ప్రొటోకాల్ ఇవ్వడం లేదని, రిపబ్లిక్ డే వేడుకలను కూడా పరేడ్ తో నిర్వహించలేదని ఎట్ హోం సందర్భంగా గవర్నర్ ప్రస్తావించారు. ప్రస్తుతం బడ్జెట్కు ఆమోదంపై గవర్నర్ ఇంకా నిర్ణయం తీసుకోలేదు. దీంతో రాష్ట్ర ప్రభుత్వం సోమవారం హైకోర్టు లో లంచ్ మోషన్ పిటిషన్ దాఖలు చేయనుంది. ఆదివారమే ఈ పిటిషన్ డ్రాఫ్ట్ కు సీఎం కేసీఆర్ ఆమోదం తెలిపినట్టు సమాచారం. రాష్ట్ర ప్రభుత్వం తరఫున సుప్రీంకోర్టు సీనియర్ అడ్వకేట్ దుష్యంత్ దవే వాదనలు వినిపించే అవకాశం ఉంది. ప్రభుత్వం హైకోర్టును ఆశ్రయిస్తే.. కోర్టు ఎలాంటి ఆదేశాలు ఇవ్వబోతుందనేది ఆసక్తికరంగా మారింది.
