ప్రేమ వ్యవహారం ఒక జంట ప్రాణాలు తీసింది. ఈ ఘోరం మధ్యప్రదేశ్ లో జరిగింది. పోలీసులు తెలిపిన వివరాల ప్రకారం.. మొరెనా జిల్లాలోని రతన్ బసాయి గ్రామానికి చెందిన శివాని తోమర్(18), బలుపురా కు చెందిన రాధేశ్యామ్(21) లు ప్రేమించుకున్నారు. వారి ప్రేమను శివాని కుటుంబ సభ్యులు అంగీకరించలేదు. ఈ క్రమంలో ఇరువురిని చంపాలని నిర్ణయించుకున్నారు.
వారిద్దరినీ తుపాకితో కాల్చి, బరువైన రాళ్లకు కట్టి మొసళ్లు సంచరించే నదిలోకి విసిరేశారు.
ఈ క్రమంలో రాధేశ్యామ్ కనిపించట్లేదని ఆయన తండ్రి పోలీసులకు ఫిర్యాదు చేశాడు. మొదట వారిద్దరూ పారిపోయి ఉంటారని భావించిన పోలీసులు, వారు వెళ్లిపోవడాన్ని గ్రామంలోని వారెవరూ చూడలేదనడంతో కేసును సీరియస్గా తీసుకున్నారు. అనంతరం యువతి తండ్రి, బంధువులను విచారించగా వారిద్దరిని తామే హత్య చేసినట్లు అంగీకరించారు. జూన్3 న ఈ ఘటన జరిగినట్లు పోలీసులు తెలిపారు. బరువైన రాళ్లను వారికి కట్టి చంబల్ నదిలో పడేసినట్లు వారు వెల్లడించారు. మృతదేహాలు వెలికి తీసేందుకు రెస్క్యూ టీం సాయం తీసుకున్నట్లు పోలీసులు వెల్లడించారు. చంబల్ ఘరియాల్ అభయారణ్యంలో 2000 కంటే ఎక్కువ ఎలిగేటర్లు, 500లకు పైగా మంచి నీటి మొసళ్లు ఉన్నాయి.