కెనడాలో ఓ పెద్ద భవంతి. అందులో బాగా డబ్బున్న ఒక కుటుంబం ఉంటోంది. అది కెనడాలోనే బాగా సంపన్న కుటుంబాల్లో ఒకటి. అందుకే వాళ్లింట్లో కుక్క చనిపోయినా.. మరుసటి రోజు ఆ వార్త చక్కర్లు కొడుతుంటుంది. కానీ.. ఒకరోజు అదే మాన్షన్లోని ఒక బెడ్రూమ్లో ఆ ఫ్యామిలీలోని ఇద్దరు చనిపోయారు. ఎలా చనిపోయారు? ఎందుకు చనిపోయారు? అనేది ఎవరికీ తెలియదు. ఆ కుటుంబీకులు కూడా దీని గురించి ఎప్పుడూ మాట్లాడలేదు. వాళ్ల చావుకు కారణాలేంటనేది ఇప్పటికీ రహస్యమే.
కెనడాలోని మాంట్రియల్.1065 షెర్బ్రూక్ స్ట్రీట్లో ఉన్న పెద్ద భవంతిలో రెడ్పాత్ ఫ్యామిలీ ఉండేది. జూన్ 13, 1901. సాయంత్రం ఆరు గంటలు. ఆ భవంతిలో ఒక పెద్ద బెడ్రూమ్లో ఇద్దరి శవాలు రక్తపు మడుగులో పడి ఉన్నాయి. మామూలుగా ఇలాంటి కుటుంబాల్లో ఏం జరిగినా చాలా హడావిడి ఉంటుంది. కానీ.. ఆ రోజు ఎవరూ ఈ విషయాన్ని పెద్దగా పట్టించుకోలేదు. పోలీసులకు కూడా చెప్పలేదు. మరుసటి రోజు కరోనర్(జ్యుడిషియల్ ఎంక్వైరీ ఆఫీసర్) వచ్చి రెండు గంటలపాటు ఒక ఎంక్వైరీ చేశాడు. ఏం జరిగిందనేది బయటికి చెప్పలేదు. తర్వాత 48 గంటల్లో శవాలను ఖననం చేశారు. రెడ్పాత్ మాన్షన్లో ఆ రోజు ఏం జరిగిందనేది ఈ రోజు వరకు ఎవరికీ తెలియదు.
ఆ భవంతిలో జాన్ జేమ్స్ రెడ్పాత్, అతని భార్య అడా, వాళ్ల ఐదుగురు పిల్లలతో కలిసి ఉండేవాళ్లు. వాళ్లతో పాటు ఒక కుక్క కూడా ఉండేది. రెడ్పాత్ కుటుంబం 1816లో కెనడాకు వలస వచ్చింది. అక్కడే స్థిరపడి, చాలా బిజినెస్లు చేశారు. మాంట్రియల్లోని లాచిన్ కెనాల్, ఒట్టావాలోని రైడో కెనాల్ను కూడా వాళ్లే ఏర్పాటుచేశారు. మౌంట్ రాయల్ ఏరియాలో 235 ఎకరాల భూమిని కొన్నారు. ఆ తర్వాత 1854లో కెనడా షుగర్ రిఫైనింగ్ కంపెనీ పెట్టారు. ఈ కంపెనీ ఇప్పటికీ ఉంది. తర్వాత మాంట్రియల్, క్యూబెక్, టొరంటోల్లో వేల ఎకరాల భూమి కొన్నారు. అప్పట్లో రెడ్పాత్ ప్రపంచంలోని అతిపెద్ద షుగర్ ప్రొడక్షన్ కంపెనీల్లో ఒకటిగా ఉండేది.
ఆ రోజు ఏం జరిగింది?
జాన్ రోజూ ఆఫీస్కు వెళ్లి, వస్తుండేవాడు. అడా పిల్లలను చూసుకునేది. అప్పుడప్పుడూ అందరూ కలసి చర్చికి వెళ్లేవాళ్లు. సంతోషంగా ఉండే ఆ కుటుంబంలో ఒకేసారి ఇద్దరు చనిపోవడంతో పరిస్థితులు మారిపోయాయి. వాళ్లు చనిపోయిన రోజు సాయంత్రం.. అందరూ కలసి భోజనం చేశారు. తర్వాత ఎవరి గదుల్లోకి వాళ్లు వెళ్లారు. కొద్దిసేపటికే మేడ మీద ఉన్న బెడ్రూమ్ నుంచి తుపాకి పేలిన శబ్దం వినిపించింది. దాంతో జాన్ పెద్ద కొడుకు పీటర్ పరిగెత్తుకెళ్లి చూశాడు. ఆ గదిలో తల్లి అడా రక్తపు మడుగులో పడి ఉంది. పక్కనే తమ్ముడు క్లిఫోర్డ్(25ఏండ్లు) గోడకు ఆనుకుని నిలబడ్డాడు.
ఎవరూ రాలేదు
ఆ ఇంటి నిండా ఎప్పుడూ పనివాళ్లు ఉంటారు. కానీ, తుపాకీ శబ్దం వినిపించినా ఒక్కరు కూడా ఆ గది వైపు వెళ్లలేదు. ఏడుస్తున్న పీటర్ను ఎవరూ ఓదార్చలేదు. ఆ తర్వాత ఎవరూ పోలీసులకు ఫోన్ చేయలేదు. కాల్పులు జరిగిన అరగంట తర్వాత క్లిఫోర్డ్ను దగ్గర్లోని హాస్పిటల్కి తీసుకెళ్లాడు పీటర్. అతని ప్రాణాలు కాపాడలేకపోయారు డాక్టర్లు. అదే రోజు అర్ధరాత్రి అతను చనిపోయాడు. అప్పటికీ ఈ విషయం పోలీసులకు చెప్పలేదు పీటర్. హాస్పిటల్ సిబ్బంది పీటర్ని ఒప్పించి పోలీసులకు చెప్పారు. దాంతో పోలీసులు, కరోనర్ వచ్చారు. పోలీసుల్ని ఇంట్లోకి రానిచ్చేందుకు పీటర్ ఒప్పుకోలేదు.
ఆత్మహత్యా?
ఆ బిల్డింగ్లో చాలామంది ఉంటారు. కాబట్టి, బయటి వ్యక్తి వచ్చి చంపే అవకాశమే లేదు. ఆ కుటుంబం కూడా దీనిపై ఎప్పుడూ మాట్లాడలేదు. కాబట్టి అడా, క్లిఫోర్డ్కు ఏమి జరిగిందనేది ఇప్పటికీ ఎవరికీ తెలియదు. పైగా దీనిపై ఎంక్వైరీ చేయడానికి కూడా ఆ ఫ్యామిలీ ఒప్పుకోలేదు. కాబట్టి క్లిఫోర్డ్ ముందుగా తన తల్లిని కాల్చి, తర్వాత తాను కాల్చుకుని చనిపోయాడని కొంతమంది చెప్పారు. కారణం.. క్లిఫోర్డ్కు ఉన్న మూర్ఛ వ్యాధి. దాంతో అతను చాలా డిప్రెస్ అయ్యాడు. అతని తల్లి కూడా చనిపోయే కొన్ని రోజుల ముందు నుంచి అనారోగ్యంతో బాధపడింది. అందుకే ఇద్దరూ డిప్రెషన్తో ఆత్మహత్య చేసుకున్నారని కొందరన్నారు.
క్లిఫోర్డ్కి మూర్ఛ వ్యాధి ఉన్నా దాని గురించి అతనెప్పుడు బాధపడలేదట. క్లిఫోర్డ్ ఒక మంచి లా స్టూడెంట్. అతను చనిపోవడానికి కొన్ని రోజుల ముందు బార్ ఎగ్జామ్ రాయడానికి అప్లికేషన్ కూడా పెట్టుకున్నాడు. అలాంటివాడు ఆత్మహత్య చేసుకోవాలని ఎందుకు అనుకుంటాడు? అనేది కొందరి వాదన.
అమ్మంటే ప్రాణం
తల్లిని ప్రాణంగా చూసుకునేవాడు క్లిఫోర్డ్. ఆమె అనారోగ్యంతో ఉంటే దగ్గరుండి సేవలు చేసేవాడు. ఒకసారి న్యూయార్క్ ట్రిప్కు వెళ్లాల్సి వస్తే... ఆమెను కూడా తనతో తీసుకెళ్లాడు. అలాంటిది అతనే తన తల్లిని ఎలా చంపుతాడు? అలా జరగడానికి అవకాశం లేదని ఈ కేసును స్టడీ చేసినవాళ్లు చెప్తున్నారు.