చిన్నవైనా పెద్ద పనులే చేస్తయ్..​ సింగరేణి ఓసీపీలో మినీ షావల్స్​దే ‘కీ’ రోల్

• మట్టి వెలికితీత, బొగ్గు ఉత్పత్తికి అనుకూలం

• పెద్దవాటికంటే.. చిన్నవాటితోనే ఎక్కువ పని

• భవిష్యత్​లో వీటి వినియోగంపైనే అధికారులు ఇంట్రెస్ట్

కోల్​బెల్ట్, వెలుగు: సింగరేణి బొగ్గు ఉత్పత్తిలో ఓపెన్​కాస్ట్​ గనులు కీలకం. ఓసీపీల్లో మట్టి (ఓవర్​బర్డెన్​) వెలికితీత, బొగ్గు ఉత్పత్తికి భారీ మెషీన్లు ఎంతో అవసరం. ప్రస్తుతం వినియోగించే షావల్స్ మెషీన్ల పనితీరుపై సంస్థ అధికారులు ప్రత్యేక దృష్టి సారించారు. 11,12 క్యూబిక్​ మీటర్ల భారీ షావల్స్​కంటే 5  క్యూబిక్​ మీటర్లున్న షావల్స్ తోనే ఎక్కువగా.. చురుగ్గా పనులు జరుగుతుండటంతో భవిష్యత్ లోనూ వాటికే ఎక్కువ ప్రయారిటీ ఇచ్చేందుకు ఇంట్రెస్ట్ చూపుతున్నారు. 

కొంతకాలం కింద కొత్తగూడెంలో జరిగిన సమీక్ష సమావేశంలోనూ షావల్స్​పనితీరుపై ఏరియా జీఎంలు, ప్రాజెక్టు ఆఫీసర్లు, ఇంజనీర్ల అభిప్రాయాలను తీసుకున్న ఆపరేషన్, ఈఅండ్ఎం విభాగాల ఉన్నతాధికారులు, షావల్స్ పనితీరుపై సుదీర్ఘంగా చర్చించారు. పెద్ద షావల్స్​తో సమానంగా చిన్నవి​పని చేస్తున్నాయి. ఇక ప్రైవేటు ఓబీ వెలికితీసే కాంట్రాక్టర్లు సైతం 5 క్యూబిక్​ మీటర్ల షావల్స్​ను ఎక్కువగా వాడుతున్నారు. దీంతో తక్కువ ఖర్చుతో ఎక్కువ పని జరిగేలా చిన్న షావల్స్​కే ప్రాధానం ఇవ్వాలనే నిర్ణయానికి వచ్చారు. 

పెద్ద షావల్స్ రూ.14 కోట్లు కాగా.. చిన్నవి రూ. 6 కోట్లు  మాత్రమే. ఇక సింగరేణి వ్యాప్తంగా 22 ఓపెన్​కాస్ట్​గనుల్లో 11,12 మీటర్ల భారీ షావల్స్​తో పాటు 5 క్యూబిక్​మీటర్ల షావల్స్ ను నడుపుతుంది. మొత్తంగా 894 ఉన్నాయి. వీటిలో అత్యంత కీలకమైన షావల్స్​104 ఉండగా.. వీటి ద్వారానే ఓబీ(మట్టి), బొగ్గును వెలికితీసి 445 డంపర్ల ద్వారా ఓబీని డంప్​యార్డ్​కు, బొగ్గును సీహెచ్​పీలకు రవాణా చేస్తుంటారు.