-has-received-a-lot-of-applications-this-time_qbcngPhxfX.jpg)
- సోషల్ స్టడీస్కు 1,28,574 దరఖాస్తులు
- పేపర్ 2 కోసం 2,77,884 అప్లికేషన్లు
హైదరాబాద్,వెలుగు : టీచర్ ఎలిజిబులిటీ టెస్ట్(టెట్)కు ఈ సారి భారీగా అప్లికేషన్లు వచ్చాయి. గతేడాదితో పోలిస్తే పేపవర్ 1, పేపర్ 2లో దరఖాస్తుల సంఖ్య పెరిగింది. పేపర్ 1 అందరికీ కామన్ గా ఉంటుండగా.. పేపర్ 2లో మాత్రం మ్యాథ్స్ అండ్ సైన్స్, సోషల్ స్టడీస్, లాంగ్వేజ్ పండిట్స్ కు వేర్వురుగా ఉంటాయి. ఈ సారి పరీక్ష రాసే వారి సంఖ్య పెరగడంతో అధికారులు పకడ్బందీగా ఏర్పాట్లు చేస్తున్నారు. జూన్ 12న జరిగే టెట్ పరీక్షకు 6,29,352 అప్లికేషన్లు వచ్చాయి. దీంట్లో పేపర్ 1 కోసం 3,51,468 , పేపర్ 2 కోసం 2,77,884 దరఖాస్తులు అందాయి. పేపర్ 2లో మ్యాథమెటిక్స్ అండ్ సైన్స్ సబ్జెక్టుకు చెందిన అభ్యర్థులు 1,49,310 మంది, సోషల్ స్టడీస్, లాంగ్వేజీ పండిట్ కేటగిరీలో 1,28,574 మంది అప్లై చేశారు. అయితే 2017లో జరిగిన టెట్లో మ్యాథ్స్, సైన్స్ పేపర్ రాసిన అభ్యర్థుల కంటే సోషల్, లాంగ్వేజీ పండిట్ పేపర్ రాసిన అభ్యర్థులు ఎక్కువ మంది ఉన్నారు. కానీ ఈ సారి మ్యాథ్స్ అండ్ సైన్స్ పేపర్ రాసే అభ్యర్థులే ఎక్కువగా ఉండటం గమనార్హం. మరోవైపు టెట్ నిర్వహణ కోసం సెంటర్ల ఎంపిక ప్రక్రియ కొనసాగుతోంది. ఇప్పటికే 1500లకు పైగా సెంటర్లను గుర్తించారు. ఆ సెంటర్లలో డ్యూటీ చేసేందుకు నాన్ టీచింగ్ సిబ్బంది కోసం వెతుకుతున్నారు. ఆయా జిల్లాల్లో అభ్యర్థులకు అనుగుణంగా సిబ్బందిని ఎంపిక చేస్తున్నారు.
పలు భాషల్లో పరీక్ష నిర్వహణ
ఈ సారి టెట్ను పది భాషల్లో నిర్వహిస్తున్నారు. అభ్యర్థులకు బైలింగ్వల్ క్వశ్చన్ పేపర్లు ఇవ్వనున్నారు. అంటే ఒకే పేపర్లో తెలుగు/ఇంగ్లీష్, తెలుగు/ సంస్కృతం, ఇంగ్లీష్/ఉర్దూ... ఇలా రెండు లాంగ్వేజీల్లో క్వశ్చన్లుంటాయి. ఇంగ్లీష్, హిందీ, ఉర్దూ, బెంగాలీ, గుజరాతి, హిందీ, కన్నడ, మరాఠీ, తమిళం, తెలుగు, సంస్కృతం భాషల్లో టెట్ నిర్వహించనున్నారు. తెలుగు/ఇంగ్లీష్లో అత్యధికంగా 5,71,986 మంది రాయనుండగా, దీంట్లో పేపర్ 1లో 3,26,288 మంది, పేపర్ 2లో 2,45,698 మంది ఉన్నారు. ఇంగ్లీష్/హిందీలో మొత్తం 31,058 మంది, ఇంగ్లీష్/ఉర్దూలో 25,108 మంది రాయనున్నారు. బెంగాలీ/ఇంగ్లిష్లో 13 మంది, గుజరాతి/మరాఠీలో ఇద్దరు, కన్నడ/ఇంగ్లీష్లో 617, ఇంగ్లీష్/ మరాఠీలో 416 మంది, ఇంగ్లీష్/తమిళ్లో 54 మంది, తెలుగు/ సంస్కృతంలో 98 మంది రాయనున్నారు. దీనికి సంబంధించిన పేపర్ల తయారీ ప్రక్రియ కొనసాగుతోంది.
