- కుక్కల నుంచి కాపాడండి
- భువనగిరి మున్సిపల్ సమావేశంలో మహిళా కౌన్సిలర్ల ఆందోళన
యాదాద్రి, వెలుగు : కుక్కల దాడి నుంచి ప్రజలను కాపాడాలంటూ మహిళా కౌన్సిలర్లు ఆందోళనకు దిగారు. యాదాద్రి జిల్లా భువనగిరి మున్సిపాలిటీ సాధారణ సమావేశం బుధవారం జరిగింది. హెచ్ఎండీఏ నిధులను అన్ని వార్డులకు సమానంగా కేటాయించాలని కౌన్సిలర్లు డిమాండ్ చేశారు. తర్వాత కుక్కల గురించి పలువురు కౌన్సిలర్లు చర్చ లేవనెత్తారు. కుక్కల కారణంగా కొందరు ప్రాణాపాయ స్థితికి చేరుకున్నారని చెప్పారు.
కుక్కలు వెంటపడడంతో పారిపోతూ కిందపడి కాళ్లు విరిగిన ఘటనలు సైతం ఉన్నాయన్నారు. కుక్కల సంఖ్య పెరగకుండా ఆపరేషన్లు చేయించాలని డిమాండ్ చేశారు. దీనిపై మున్సిపల్ చైర్మన్ ఆంజనేయులు, కమిషనర్ నాగిరెడ్డి నుంచి సరైన సమాధానం రాకపోవడంతో పార్టీలకు అతీతంగా మహిళా కౌన్సిలర్లు పోడియం ఎదుట బైఠాయించారు. కుక్కల సమస్య పరిష్కరించాల్సిందేనని పట్టుబట్టారు. మూడు నాలుగు రోజుల్లో సమస్యను పరిష్కరిస్తామని చైర్మన్ హామీ ఇవ్వడంతో కౌన్సిలర్లు ఆందోళన విరమించారు.
బాధితుల ధర్నా
భువనగిరిలోని 32వ వార్డులో యాసిన్అనే చిన్నారిని కుక్క కరిచింది. దీంతో గాయపడ్డ చిన్నారినితో కుటుంబసభ్యులు మున్సిపాలిటీ ఆఫీసు వద్ద ఎదుట బుధవారం ధర్నా చేశారు. దీంతో కమిషనర్ నాగిరెడ్డి అక్కడికి చేరుకొని 15 రోజుల్లో కుక్కలకు కుటుంబ నియంత్రణ సెంటర్ ఏర్పాటు చేస్తామని చెప్పారు. గాయపడ్డ యాసిన్కు పరిహారం కోసం కలెక్టర్ దృష్టికి తీసుకువెళ్లినట్టు చెప్పారు.
కుక్కల దాడిలో విద్యార్థికి గాయాలు
పాల్వంచ, వెలుగు : భద్రాద్రి కొత్తగూడెం జిల్లా పాల్వంచ పట్టణంలోని శివనగర్ కు చెందిన చెందిన మూడో తరగతి విద్యార్థి పై బుధవారం వీధికుక్కలు దాడి చేసి గాయపరిచాయి. స్థానిక వికలాంగుల కాలనీ ప్రభుత్వ స్కూల్లో చదువుతున్న వహీద్ పరీక్షకు వెళ్లి మధ్యాహ్నం ఇంటికి వస్తున్నాడు. అక్కడే ఉన్న వీధి కుక్కలు అతడిని వెంబడించాయి. భయపడ్డ అతడు ఉరుకుతుండగా దాడి చేసి ఎడమ చేయి, ఎడమ కాలిపై కరిచి గాయపరిచాయి. గమనించిన స్థానికులు కుక్కలను తరమడంతో పారిపోయాయి. వహీద్ను స్థానిక ప్రభుత్వ హాస్పిటల్లో చేర్పించారు.
