డిచ్ పల్లి, వెలుగు: ఉమ్మడి జిల్లా వ్యాప్తంగా వేర్వేరుగా జరిగిన ప్రమాదాల్లో నలుగురు మృతి చెందాడు. చేపలు పట్టేందుకు వెళ్లి వ్యక్తి, రైలు కిందపడి యువకుడు, పెన్షన్ తీసుకొని వస్తుండగా వృద్ధుడు, బైక్ అదుపుతప్పి మరో యువకుడు దుర్మరణం చెందారు. డిచ్పల్లి ఎస్ఐ మహేశ్ తెలిపిన వివరాల ప్రకారం.. ధర్పల్లి మండలం చల్లగర్గెకు చెందిన మీసాల సాయిలు(54) డిచ్పల్లి బస్టాండ్సమీపంలో చేపలు పట్టేందుకు వెళ్లాడు. ప్రమాదవశాత్తు చెరువులో పడి మృతి చెందాడు. ఈ ఘటనపై కేసు నమోదు చేసిన పోలీసులు దర్యాప్తు చేపట్టారు.
బైక్ అదుపుతప్పి ..
నందిపేట : బైక్ అదుపుతప్పి కిందపడడంతో యువకుడు మృతి చెందాడు. నందిపేట మండలం ఉమ్మెడ శివారులోఆదివారం రాత్రి ఈ ఘటన జరిగింది. ఎస్ఐ రాహుల్తెలిపిన ప్రకారం.. నిర్మల్ జిల్లా లోస్రా గ్రామానికి చెందిన ధర్మపురి సూర్య కిరణ్(29) నందిపేట మండలం తల్వేదలోని బంధువుల ఇంటికి పండుగకు వచ్చాడు. రాత్రి బైక్ పై తిరిగి వెళ్తుండగా మూలమలుపు వద్ద అదుపుతప్పి కిందపడ్డాడు. బైంసా ప్రభుత్వాస్పత్రికి తరలించగా, సూర్య కిరణ్అప్పటికే మృతి చెందినట్లు వైద్యులు నిర్ధారించారు. కుటుంబసభ్యుల ఫిర్యాదు మేరకు కేసు నమోదు చేసి దర్యాప్తు చేస్తున్నట్లు ఎస్ఐ తెలిపారు.
పెన్షన్ తీసుకొని వస్తుండగా..
ఎడపల్లి: ఎడపల్లి మండలంలోని ఎంఎస్సీ ఫారం గ్రామంలో సోమవారం జరిగిన రోడ్డు ప్రమాదంలో మెట్టు భూమయ్య(62) అక్కడికక్కడే మృతి చెందాడు. వృద్ధాప్య పెన్షన్ తీసుకోవడానికి తన స్వగ్రామమైన తానాకలాన్నుంచి ఎడపల్లి పోస్టు ఆఫీస్ కు భూమయ్య మోపెడ్ పై వెళ్లాడు. తిరుగు ప్రయాణంలో రోడ్డు క్రాస్ చేస్తుండగా కారు ఢీ కొనడంతో మృతి చెందాడు. ఘటనాస్థలిని పరిశీలించిన పోలీసులు మృతదేహాన్ని పోస్టు మార్టం నిమిత్తం బోధన్ ఏరియా ఆస్పత్రికి తరలించారు.
రైలు కిందపడి యువకుడు
నిజామాబాద్ క్రైమ్: నిజామాబాద్ నగరంలోని రైల్వే స్టేషన్ సమీపంలో యువకుడు రైలు కిందపడి ఆత్మహత్యకు పాల్పడ్డాడు. ఈ ఘటన ఆదివారం అర్ధరాత్రి జరిగింది. అజంతా ఎక్స్ప్రెస్స్టేషన్ వద్దకు యువకుడు హఠాత్తుగా అడ్డంగా వెళ్లి ఆత్మహత్యకు పాల్పడినట్లు రైల్వే ఎస్ఐ సాయరెడ్డి తెలిపారు. యువకుడు వైలెట్ కలర్ షర్టు, బ్లూ కలర్ జీన్ పాయింట్ ధరించినట్లు చెప్పారు.
డిచ్పల్లి: రోడ్డుపై పోసిన వడ్ల కుప్పను ఢీకొట్టిన వ్యక్తికి తీవ్ర గాయాలైన ఘటన డిచ్ పల్లి మండలంలోని అమృతాపూర్ లో జరిగింది. గ్రామానికి చెందిన కుందేటి శ్రీకాంత్ ఆదివారం రాత్రి డిచ్పల్లి నుంచి స్వగ్రామానికి బైక్ పై వెళ్తున్నాడు. చీకట్లో రోడ్డు పై పోసిన వడ్లకుప్పను ఢీకొని కింద పడ్డాడు. తీవ్ర గాయాల కావడంతో జిల్లా కేంద్రంలోని ఆస్పత్రికి తరలించి చికిత్స అందిస్తున్నారు. రోడ్లపై ధాన్యాన్ని ఆరబోస్తే చట్టరీత్య చర్యలు తీసుకుంటామని ఎస్ఐ మహేశ్ హెచ్చరించారు.
