సరే... అందరూ చెప్తున్నారు కదా అని ఎటువంటి డిస్టర్బెన్స్ లేకుండా ఒక గదిలో కూర్చుని, కళ్లు మూసుకుంటే.. బుర్రలో ఆలోచనల సునామి. ఇదేందబ్బా! ఆలోచనల్ని అదుపులో పెట్టేందుకు ట్రై చేస్తుంటే... ఇంత గందరగోళం ఏంటని అనుకునే వాళ్లలో మీరూ ఉన్నారా? అయితే ఈ నాన్ ట్రెడిషనల్ మెడిటేటివ్ ఐడియాస్ ట్రై చేయాల్సిందే అంటున్నాడు మైండ్ఫుల్నెస్ ప్రాక్టీషనర్, రచయిత జాయ్ రెయిన్స్. అందుకు ఏడు పద్ధతులు కూడా చెప్పాడు.
నడకతో బుర్ర శుభ్రం
ఫ్రెష్ ఎయిర్లో వాకింగ్ చేస్తే మూడ్ బూస్ట్ అవుతుందనేది తెలిసిందే. వాకింగ్ చేసేటప్పుడు దృష్టంతా నడక మీదే ఉంటుంది. అలాగని ఆలోచనలు రావని కాదు. అవి వస్తుంటాయి. వాటిని బలవంతంగా ఆపేయొద్దు. ఆలోచనలు ఇబ్బంది పెడుతున్నప్పుడు మైండ్కి ఒక సిగ్నల్ ఇవ్వాలి... అదెలాగంటే వాకింగ్ చేస్తున్న మీ పాదాల చప్పుడు వినమనాలి. శ్వాసని గమనించాలి. మార్నింగ్ వాక్లో శరీరాన్ని తాకుతున్న లేత సూర్యకిరణాల్ని ఫీలవ్వాలి. ఇలా చేయడం వల్ల ఆలోచనలకి బ్రేక్ పడుతుంది.
ప్రకృతిని ఆస్వాదించాలి
ప్రకృతిలో ఉన్నప్పుడు అన్నింటినీ మర్చిపోయి పదిహేను సెకన్లు ఆనందాన్ని ఆస్వాదించగలిగితే అద్భుతమైన మూడ్ బూస్టర్గా పనిచేస్తుంది. దాన్ని ఎక్స్పీరియెన్స్ చేసేందుకు పెద్ద పార్క్లకి వెళ్లక్కర్లేదు. మీ ఇంటి చుట్టు పక్కల ఉన్న చెట్లు, ఆకాశం, సూర్యోదయం చూస్తే చాలు. అప్పుడు కలిగే భావన... ఫోన్ మాట్లాడితేనో, జూమ్ కాల్ అటెండ్ అయితేనో రాదు. ఆ ఫీలింగ్ నాడీ వ్యవస్థను కూల్ చేస్తుంది. ప్రశాంతతను ఇస్తుంది.
డ్రాయింగ్ ప్రాక్టీస్
ఆర్ట్స్, క్రాఫ్ట్స్ లాంటి హాబీస్ మనసును ప్రశాంతంగా ఉంచుతాయి. డ్రాయింగ్ వేసేటప్పుడు... బ్రెయిన్ పూర్తిగా ఎంగేజ్ అవుతుంది. వేరే ఆలోచనలేవీ రావు. ఎందుకంటే కాన్సన్ట్రేషన్ అంతా డ్రాయింగ్ మీదనే ఉంటుంది కాబట్టి.
ఇంటి పని కూడా రెమెడీనే!
ఆ క్షణాన్ని లేదా చేస్తున్న పనిని ఫీలవుతూ ఉంటే... అది మెడిటేటివ్ మోడ్లోకి తీసుకెళ్తుంది. నిజానికి రెగ్యులర్గా చేసే ఇంటి పనుల్ని ఆటో పైలట్ మోడ్లో... అంటే యాధృచ్ఛికంగా చేస్తుంటాం. అందుకే ఒక పక్క పనిచేస్తున్నా మైండ్లో ఆలోచనలు గిర్రున తిరుగుతుంటాయి. వాటిని ఆపేసి చేస్తున్న పని మీద దృష్టి పెడితే ఆలోచనలకు బ్రేక్ పడుతుంది.
ఉదాహరణకు... ఉతికిన బట్టలు మడత పెట్టేటప్పుడు.. ఆ పనిని హడావిడిగా చేయొద్దు. బట్టల నుంచి వస్తున్న లాండ్రీ డిటర్జెంట్ వాసన, బట్టల టెక్చర్ ఎలా ఉందో గమనించాలి. అలాగే ఎలా మడత పెడుతున్నారనే దాని మీద దృష్టి పెట్టాలి. ఇందులో ఏముంది అనుకుంటున్నారేమో! కానీ ఇది కూడా మైండ్ని రిలాక్స్ చేయడమే. అలాగే గిన్నెలు కడిగేటప్పుడు, వ్యాక్యూమ్ చేసేటప్పుడు కూడా మెడిటేటివ్ మోడ్లోకి వెళ్లిపోవచ్చు. ఏ పని చేస్తున్నా మనలోని ఆ పనిని ఫీలవ్వాలి. అప్పుడే చేస్తున్న పని నుంచి కూడా ప్రశాంతత దొరుకుతుంది.
పెన్నుతో పేపర్ మీద రాయాలి
ఆలోచనలు, భావోద్వేగాలకి బ్రేక్ ఇవ్వాలి. మనసులోని భావాలను పేపర్మీద రాస్తున్నప్పుడు కూడా మైండ్ మెడిటేటివ్ స్టేజ్లోనే ఉంటుంది. రాస్తున్నప్పుడు చాలాసార్లు బుర్ర జడ్జిమెంటల్గా ఆలోచిస్తుంటుంది. రాస్తున్న భావం మధ్యలోకి ఆలోచనలు చొరబడుతుంటాయి. ఇలాంటప్పుడు జడ్జిమెంట్ ఫీలింగ్స్ పక్కనపెట్టి.... ఏది వాస్తవమో అదే రాయాలి. రాస్తున్న విషయం మీదే దృష్టి నిలపాలి. రాయడం కోసం రోజుకి ఐదు నిమిషాలు ఏ డిస్టర్బెన్స్ లేని టైం తీసుకోవాలి. ఆ టైం ఉదయాన్నే కాఫీ తాగాక లేదా రాత్రి నిద్రపోయే ముందు.. ఏదైనా కావచ్చు.
సినిమాకి వెళ్లడం కూడా...
నేచర్లోకి వెళ్లినప్పుడు ‘వావ్’ అనే ఫీలింగ్ ఎలాగైతే వస్తుందో... సినిమా చూసినప్పుడు కూడా అలానే అనిపించే ఛాన్స్ ఉంది. ఆలోచనల నుంచి బ్రేక్ తీసుకునేందుకు సినిమా బెస్ట్ టూల్. సినిమా చూస్తున్నప్పుడు బయటి ప్రపంచం గురించిన ఆలోచనలేవీ ఉండవు. మరీ ముఖ్యంగా మొబైల్ఫోన్ పక్కన పెడతారు. ఆలోచనలు రీ డైరెక్ట్ అవుతాయి. అదెలాగంటే... సినిమా చూస్తున్నప్పుడు నెక్స్ట్ సీన్ ఏం జరుగుతుంది? ఎండింగ్ ఇలా ఉంటుందేమో? అని బ్రెయిన్... తెర మీద కనపడుతున్న స్టోరీ గురించే ఆలోచిస్తుంటుంది. అంటే అదీ మెడిటేషనే కదా!
ఛాలెంజింగ్ క్రాఫ్ట్ ట్రై చేయాలి
ఛాలెంజింగ్గా ఉండే స్కిల్ నేర్చుకుంటే ఆ క్షణానికి అందులో పూర్తిగా లీనమవడం సహజం. సెల్ఫ్ క్రిటికల్ థాట్స్... అంటే ఎవరి మీద వాళ్లకి నమ్మకం కోల్పోయే ఆలోచనలు.. కొన్నిసార్లు ఈ స్థితి బాగా ఇబ్బంది పెడుతుంది. అలాంటప్పుడు మైండ్ సెట్చేసి రీఫోకస్ చేసేందుకు ఇది బాగా పనిచేస్తుంది. ఉదాహరణకు కుమ్మరి చక్రం గురించి చెప్పుకోవచ్చు. కుండ చేస్తున్నప్పుడు చేత్తో పట్టుకున్న మట్టి టెక్చర్, టెంపరేచర్ను సెన్స్ చేయాలి. చక్రం తిరుగుతున్నప్పుడు వస్తున్న సౌండ్ను ఏకాగ్రతతో వినాలి. ఆలోచనల్ని పక్కకు నెట్టి ఆ చక్రం చేస్తున్న సౌండ్ మీదకు దృష్టి మళ్లించాలి.
రకరకాల ఆలోచనలతో బుర్రంతా గందరగోళం... విపరీతమైన ఒత్తిడి... ఆందోళన... వీటినుంచి బయటపడాలంటే మెడిటేషన్ బెస్ట్. ‘‘నిజానికి ఇవన్నీ మనసుకు సంబంధించిన అంశాలు. ఎప్పుడైతే మనసును స్థిరంగా ఉంచుతామో.. అప్పుడే సరిగ్గా ఆలోచించగలం’’ అని యోగ, మైండ్ఫుల్నెస్ కోచ్లు చెప్తుంటారు.
