నగల తయారీలో బంగారం వాడతారని తెలుసు. కానీ, ఈ మధ్య బంగారంతో వంటలు కూడా చేస్తున్నారు. మొన్నామధ్య స్వీట్స్ వ్యాపారం బాగా సాగాలని, ఒక వ్యాపారి బంగారు రేకుతో స్వీట్స్ తయారుచేయించిన విషయం తెలిసిందే. ఇప్పుడు కూడా కస్టమర్లని ఆకర్షించడానికి దుబాయిలోని ఒక రెస్టారెంట్ వాళ్లు కూడా బంగారంతో ఒక ఎక్స్పెరిమెంట్ చేశారు.
ముంబైవాసుల ఫేవరేట్ స్ట్రీట్ ఫుడ్ వడాపావ్. అది ఇప్పుడు దుబాయి వీధుల్లో కనువిందు చేస్తోంది. అయితే ఇది మామూలు వడాపావ్ కాదు, బంగారు వడాపావ్. నమ్మకం కలగట్లేదా! కానీ, ఇది నిజం. ప్రపంచంలోనే మొట్టమొదటి గోల్డ్ వడాపావ్ ఇది. ఇందులో బటర్, చీజ్లు వేసి ఎంతో టేస్టీగా తయారుచేశారు. దాని పైన ఏకంగా 22 క్యారెట్ల బంగారు పూత పూసారు. నోరూరించే ఈ వడాపావ్ తినాలంటే దుబాయి కరెన్సీ ప్రకారం100 దీనార్లు చెల్లించాలి. అంటే, మన కరెన్సీలో అక్షరాల రెండువేలన్నమాట. దీన్ని ఒక అందమైన బాక్స్లో పెట్టి ఉంచారు. ఆ బాక్స్ మూత తెరవగానే పొగలు కక్కుతున్న వేడి వేడి టేస్టీ వడాపావ్ కనిపిస్తుంది. ఒక వ్యక్తి దీన్ని చూపిస్తూ, టేస్ట్ చేస్తాడు. ఇదంతా వీడియో తీసి, సోషల్ మీడియాలో అప్లోడ్ చేశారు. ఆ వీడియోలో దాన్ని తయారుచేసిన ప్రాసెస్ కూడా చూపించారు. ఆ వీడియోని ఒక మహిళ తన ట్విట్టర్ అకౌంట్లో పోస్ట్ చేసింది.