కరోనా కట్టడిలో పడి.. ఫ్లూను మరవొద్దు
కమ్యూనిటీ లెవెల్లో వ్యాక్సిన్ ఇవ్వాలంటున్న సైంటిస్టులు
జనాల నిర్లక్ష్యంతో ఫ్లూ కేసులు పెరుగుతున్నాయని ఆందోళన
వాషింగ్టన్: ప్రపంచం మొత్తం ఇప్పుడు కరోనా వ్యాక్సిన్ కోసమే చూస్తోంది. కానీ, అంతకుమించిన ప్రమాదం కాచుకు కూర్చుంది. అదే ఫ్లూ! మన దేశంలో దాని ప్రభావం అంతగా లేకపోయినా.. అమెరికా, యూరప్ దేశాలకు వణుకు పుట్టించే వైరస్ అది. ఒక్క అమెరికాలోనే ఏటా 6 లక్షల మంది దాకా చనిపోతున్నారంటే దాని ముప్పు ఎంతగా ఉందో అర్థం చేసుకోవచ్చు. చెప్పాలంటే కరోనా మరణాల కన్నా ఎక్కువే అది. యూరప్లోనూ దాదాపు అదే పరిస్థితి. ఇప్పుడు ఆ దేశాల్లో ఫ్లూ సీజన్ రాబోతోంది. అందుకే కరోనా గురించి ఆలోచిస్తూ ఫ్లూ ముప్పును మరిచిపోవద్దని సైంటిస్టులు హెచ్చరిస్తున్నారు. ఫ్లూ వ్యాక్సిన్ వేసుకోవాలని సూచిస్తున్నారు. 2018లో అమెరికా హాస్పిటళ్లలో బెడ్లు చాలక.. పార్కింగ్ ప్లేసుల్లో టెంట్లు వేసి ఫ్లూ ట్రీట్మెంట్ చేసిన సందర్భాలను గుర్తు చేస్తున్నారు. ఇప్పుడు కరోనా కేసులు కూడా ఎక్కువున్నాయి. ఈ టైంలో ఫ్లూ కేసులు కూడా వాటికి తోడైతే హెల్త్కేర్ సిస్టమ్ మీద పెద్ద ప్రభావం పడుతుందని హెచ్చరిస్తున్నారు. దాని వల్ల ఇటు కరోనా, అటు ఫ్లూతో మరిన్ని ప్రాణాలు పోయే ప్రమాదం ఉందని ఆందోళన వ్యక్తం చేస్తున్నారు. కాబట్టి కమ్యూనిటీ లెవెల్లో ఫ్లూ వ్యాక్సినేషన్ చేయాలని సూచిస్తున్నారు. ప్రపంచం మొత్తం ఫ్లూ వ్యాక్సినేషన్ ప్రోగ్రామ్ నిర్వహించాలంటున్నారు.
నిర్లక్ష్యం వద్దు
ఫ్లూ వ్యాక్సినేషన్పై తప్పుడు సమాచారంతో పాటు జనాల నిర్లక్ష్యమూ తోడవుతుండడంతో అమెరికాతో పాటు యూరప్ దేశాల్లో కేసులు, మరణాలు ఎక్కువగా ఉంటున్నాయని నిపుణులు చెబుతున్నారు. ఆరు నెలలలోపు పిల్లలందరికీ ఫ్లూ వ్యాక్సిన్ను కచ్చితంగా వేయించాలని అమెరికా సెంటర్స్ ఫర్ డిసీజ్ కంట్రోల్ అండ్ ప్రివెన్షన్ సిఫార్సు చేసింది. కానీ, ఆ టార్గెట్ మాత్రం చేరలేదు. ఇక, 18 ఏళ్లుపైబడిన వాళ్లలో 45% మందే పోయినసారి ఫ్లూ వ్యాక్సిన్ వేసుకున్నారట. యూరప్ దేశాల్లో 75% టార్గెట్ పెట్టినా.. సగం కూడా అందుకోలేదు.
యూనివర్సల్ ఫ్లూ వ్యాక్సిన్ కావాల్సిందే
1918లో ప్రపంచాన్ని వణికించింది స్పానిష్ ఫ్లూ మహమ్మారి. దాదాపు 5 కోట్ల మందికిపైగా బలి తీసుకుంది. మన దేశంలోనే 2 కోట్ల మందికిపైగా చనిపోయారు. అప్పటికే ఉన్న ఫ్లూలలో ఇది కొత్త రకం వైరస్. ఆ తర్వాత 1957, 1968, 1977, 2009లలో రకరకాల చిన్నపాటి ఫ్లూ ప్యాండెమిక్లు ప్రపంచాన్ని తిప్పలు పెట్టాయి. 2 కోట్ల నుంచి నాలుగున్నర కోట్ల మందిని చంపేశాయి. వాటికి వ్యాక్సిన్లు వచ్చినా అన్నింటికీ వేర్వేరుగానే ఉన్నాయి. దీంతో ఎప్పుడు ఏ రకం ఫ్లూ జనంపై దాడి చేస్తుందో తెలియని పరిస్థితి. ఏ రకం ఫ్లూ అయినా.. ఒకే ఒక్క యూనివర్సల్ వ్యాక్సిన్ ఉండాలని సైంటిస్టులు చెబుతున్నారు. అలాంటి వ్యాక్సిన్ ఒకటి వస్తే ప్యాండెమిక్లు రాకుండా అడ్డుకోవచ్చని అంటున్నారు. తక్కువ, మీడియం ఆదాయం ఉన్న దేశాలకు సరైన టైమ్కు వ్యాక్సిన్లు అందించే అవకాశం ఉందని సూచిస్తున్నారు.
For More News..
