హైదరాబాద్: ఒక మైనార్టీకి మంత్రి పదవి ఇస్తామంటే బీజేపీ అడ్డుకుంటుందని టీపీసీసీ చీఫ్ మహేష్ గౌడ్ ఆగ్రహం వ్యక్తం చేశారు. జూబ్లీహిల్స్ ఉప ఎన్నికలో బీఆర్ఎస్ను గెలిపించాలనే లోపాయికారీ ఒప్పందంలో భాగంగా బీజేపీ రాజకీయాలు చేస్తోందని అన్నారు. ఎమ్మెల్సీ కవిత చెప్పినట్లుగా బీజేపీ, బీఆర్ఎస్ కుమ్మక్కు రాజకీయాలు చేస్తున్నాయని ఆరోపించారు. కాగా, జూబ్లీహిల్స్ ఉప ఎన్నిక వేళ అజారుద్దీన్కు మంత్రి పదవి ఇవ్వడంపై బీజేపీ తీవ్ర అభ్యంతరం వ్యక్తం చేసిన విషయం తెలిసిందే. ఈ మేరకు బీజేపీ నేతలు రాష్ట్ర ఎన్నికల ప్రధానాధికారికి ఫిర్యాదు చేశారు.
ఈ సందర్భంగా గురువారం (అక్టోబర్ 30) మహేష్ గౌడ్ మీడియాతో మాట్లాడుతూ.. క్రీడాకారుడిగా, రాజకీయ నేతగా అజారుద్దీన్ ప్రజలకు సేవలదించారని అన్నారు. ఈ క్రమంలోనే అజారుద్దీన్కు ఎమ్మెల్సీ పదవి ఇచ్చి గౌరవించామని తెలిపారు. ఇప్పుడు మైనార్టీకి మంత్రి పదవి ఇస్తామంటే బీజేపీ అడ్డుకుంటుందని.. మైనార్టీని మంత్రిని చేస్తున్నారనే అక్కసుతో బీజేపీ రాజకీయం చేస్తోందని విమర్శించారు.
►ALSO READ | BRS తప్పుడు ప్రచారం చేస్తోంది.. పార్టీ మార్పు వార్తలపై రాజగోపాల్ రెడ్డి క్లారిటీ
బీజేపీ పాలిత రాజస్థాన్లో 20 రోజుల్లో ఎలక్షన్ ఉందనగా సురేంద్ర పాల్ను మంత్రి చేశారని.. మరీ పోటీలో ఉన్న వ్యక్తిని మంత్రిని ఎలా చేశారని ప్రశ్నించారు. మంత్రిని చేసినా సురేంద్ర పాల్ ఎన్నికల్లో ఓడిపోయారని గుర్తు చేశారు. మరీ పోటీలో లేని అజారుద్దీన్ను మంత్రిని చేస్తే తప్పయిందా..? అని నిలదీశారు. బీజేపీ ద్వంద వైఖరి అవలంభిస్తోందని ఆగ్రహం వ్యక్తం చేశారు. జూబ్లీహిల్స్లో బీఆర్ఎస్ను గెలిపించడానికి బీజేపీ కుమ్మక్కు రాజకీయాలు చేస్తోందని ఫైర్ అయ్యారు.
