ఫుల్ ట్రాఫిక్.. అప్పుడే రెడ్ సిగ్నల్ పడింది. వెంటనే బైక్ మీద నుంచి ఓ యువకుడు కిందికి రోడ్డు మీద డాన్స్ చేస్తున్నాడు. మళ్లీ గ్రీన్ సిగ్నల్ పడేవరకు అక్కడున్నవాళ్ల చూపును తనవైపు నుంచి తిప్పుకోనీయకుండా చేశాడు... ఇలాంటి వీడియోలు ఆ మధ్య సోషల్ మీడియాలో బాగా వైరల్ అయ్యాయి. కానీ.. అలా డాన్స్ చేసిన వ్యక్తి ఎవరనేది చాలామందికి తెలియదు. అతని పేరు సుబోధ్ లోంధే. ట్రాఫిక్ రూల్స్ గురించి అందరికీ తెలియాలనే ఉద్దేశంతోనే అలా డాన్స్ చేస్తుంటాడు.
సుబోధ్ లోంధే ఇప్పుడు ఫేమస్ యూట్యూబర్. సోషల్ మీడియా స్టార్. అయితే.. అతన్ని స్టార్ని చేసింది మాత్రం అతని మంచితనమే. అందరూ ట్రాఫిక్ రూల్స్ పాటించాలి. రోడ్డు భద్రత గురించి అందరికీ తెలియాలని అతను చేసిన ప్రయత్నాలే అతనికి స్టార్ హోదా ఇచ్చాయి. సుబోధ్ లోంధే అసలు పేరు సుబోధ్ సునంద బాపు లోంధే. అతను మహారాష్ట్రలోని కళ్యాణ్లో 1996లో పుట్టాడు. అతనికి చిన్నప్పటినుంచి డాన్స్ అంటే బాగా ఇష్టం.
ఎందుకంటే..
సుబోధ్ కళ్యాణ్ ఏరియాలో ఉంటాడు. 2021లో ఆ ఏరియాలో ట్రాఫిక్ పెరగడంతో కొత్తగా సిగ్నల్స్ని ఇన్స్టాల్ చేశారు. కానీ.. అక్కడివాళ్లు వాటిని ఎప్పుడూ పట్టించుకోలేదు. రెడ్ సిగ్నల్ పడినా వెహికిల్స్ని ఆపేవాళ్లే కాదు. దాంతో.. చిన్న చిన్న ప్రమాదాలు కూడా జరిగేవి. అలాంటి సంఘటనలు చూసిన సుబోధ్ ఆ ప్రమాదాలను ఎలాగైనా ఆపాలి అనుకున్నాడు. అందుకోసం ఏదైనా డిఫరెంట్గా చేయాలి అని డిసైడ్ అయ్యాడు. అతను అప్పటికే మంచి డ్యాన్సర్. కాబట్టి తనకు తెలసిన ఆర్ట్తోనే ప్రజలకు అవగాహన కల్పించాలి అనుకున్నాడు. అప్పుడే అతనికి ఈ సిగ్నల్ డ్యాన్సింగ్ ఐడియా వచ్చింది. దాంతో అతను ట్రాఫిక్ సిగ్నల్ దగ్గర ఇరుక్కుపోయిన ప్రతిసారి బైక్ దిగి, డాన్స్ చేసేవాడు. అంతేకాకుండా ప్రయాణికులకు ఏ ఇబ్బంది కలగకుండా గ్రీన్ సిగ్నల్ పడకముందే డాన్స్ కంప్లీట్ చేసేవాడు. అలా చేసినందుకే ఎంతో మంది స్టార్స్ ప్రశంసలు అందుకున్నాడు.
హెల్మెట్ గయ్
సిగ్నల్ దగ్గర డాన్స్ చేస్తుండడంతో ఆ ఏరియాలో బాగా ఫేమస్ అయిపోయాడు సుబోధ్. పోలీసులు కూడా అతను చేస్తున్న పనిని మెచ్చుకున్నారు. బాగా డాన్స్ చేస్తాడనే పేరొచ్చింది. దాంతో సుబోధ్ ఓ అడుగు ముందుకేసి అతను డాన్స్ చేస్తున్నప్పుడు తన ఫ్రెండ్స్తో వీడియో రికార్డ్ చేయించాడు. ఆ వీడియోలను యూట్యూబ్లో అప్లోడ్ చేసేవాడు. అలా మొదటి వీడియోని 2021లో అప్లోడ్ చేశాడు. సింగిల్ టేక్లో అద్భుతంగా డాన్స్ చేయడం, ట్రాఫిక్ రూల్స్ మీద అవగాహన కల్పించడంతో ఆ వీడియోలు బాగా వైరల్ అయ్యాయి. కానీ. అప్పటికి అతని పేరు ఎవరికీ పెద్దగా తెలియకపోవడంతో అందరూ ‘‘హెల్మెట్ గయ్”అని పిలిచేవాళ్లు. ఎందుకంటే.. అతను డాన్స్ చేస్తున్నప్పుడు కూడా హెల్మెట్ తీసేవాడు కాదు.
కాస్త కష్టమే
సుబోధ్ ఇదివరకు ఎక్కడా డాన్స్ నేర్చుకోలేదు. కానీ.. చాలా బాగా డాన్స్ చేస్తాడు. అయినా.. ట్రాఫిక్ సిగ్నల్ దగ్గర డాన్స్ చేయడం కాస్త కష్టమనే అంటున్నాడు సుబోధ్. ‘‘అంతమంది జనాల ముందు డాన్స్ చేయాలి. పైగా అదే టైంలో కెమెరాకు ఫేవర్గా ఉండాలి. సిగ్నల్ పడేలోపు ప్లాన్ చేసుకున్న స్టెప్స్ కంప్లీట్ చేయాలి. అందుకే ప్రతీది ముందే ప్లాన్ చేస్తా. ఎక్కడ డాన్స్ చేయాలి? కెమెరా ఎక్కడ పెట్టాలి? అనేది ముందే చూసుకుంటా. ఎందుకంటే.. అనుకున్న టైంలోపు డాన్స్ కంప్లీట్ చేయలేకపోతే అక్కడున్నవాళ్లకు చాలా ఇబ్బంది కలుగుతుంది” అంటున్నాడు సుబోధ్.
ఛానెల్
అతను ‘‘సుబోధ్ లోధే” పేరుతో ఛానెల్ నడుపుతున్నాడు. ఛానెల్ని 2017లోనే మొదలుపెట్టినా రెగ్యులర్గా వీడియోలు అప్లోడ్ చేసింది మాత్రం 2021 నుంచే. మరో విషయం ఏంటంటే.. సుబోధ్ ఎక్కువగా షార్ట్ వీడియోలు మాత్రమే అప్లోడ్ చేస్తున్నాడు. పది నిమిషాల కంటే ఎక్కువ డ్యురేషన్ ఉన్న వీడియోలు పదికి మించి లేవు. అయినా.. ఛానెల్ను 1.79 మిలియన్ల మంది సబ్స్క్రయిబ్ చేసుకున్నారు. అంతేకాదు.. సుబోధ్ ఆ షార్ట్ వీడియోల్లోనే యాడ్ ప్రమోషన్స్ కూడా చేస్తున్నాడు.