- దుర్గామాత విగ్రహాల నిమజ్జనం నేపథ్యంలో వెహికల్స్ దారి మళ్లింపు
- ఈ నెల 26వ తేదీ వరకు అమలు
- ఎన్టీఆర్ మార్గ్ వైపు నో ఎంట్రీ
హైదరాబాద్, వెలుగు : దుర్గామాత విగ్రహాల నేపథ్యంలో నేటి నుంచి ఈ నెల 26వ తేదీ వరకు ట్యాంక్బండ్ పరిసర ప్రాంతాల్లో పోలీసులు ట్రాఫిక్ ఆంక్షలు విధించారు. ఎన్టీఆర్ మార్గ్, గార్డెన్ పాయింట్, జల విహార్, సంజీవయ్య పార్క్ వద్ద ఉన్న బేబీ పాండ్స్ రూట్లలో సోమవారం నుంచి గురువారం వరకు వెహికల్స్ ను దారి మళ్లించనున్నారు. ఈ మేరకు సిటీ ట్రాఫిక్ చీఫ్ సుధీర్ బాబు ఆదివారం నోటిఫికేషన్ రిలీజ్ చేశారు. దుర్గామాత మండపాల నిర్వాహకులు, వాహనదారులు ట్రాఫిక్ పోలీసులు సూచించిన మార్గాల్లో ట్రావెల్ చేయాలన్నారు. అంబేద్కర్ విగ్రహం వైపు నుంచి ఎన్టీఆర్ మార్గ్ వైపు ట్రాఫిక్కు పర్మిషన్ లేదన్నారు. ఎమర్జెన్సీ అయితే ట్రాఫిక్ హెల్ప్ లైన్ నం. 9010203626కు కాల్ చేయాలని సూచించారు.
ట్రాఫిక్ డైవర్షన్ ఇలా..
- పంజాగుట్ట, రాజ్భవన్ నుంచి ఖైరతాబాద్ ఫ్లైఓవర్ వైపు వచ్చే వెహికల్స్ ను వీవీ విగ్రహం వద్ద షాదన్ కాలేజీ, నిరంకారి భవన్ వైపు దారి మళ్లించనున్నారు.
- నిరంకారి జంక్షన్ నుంచి ఇక్బాల్ మినార్ వైపు వచ్చే ట్రాఫిక్ను సైఫాబాద్ ఓల్డ్ పోలీస్ స్టేషన్, రవీంద్రభారతి మీదుగా పంపిస్తారు.
- కంట్రోల్ రూమ్, సైఫాబాద్ ఓల్డ్ పోలీస్ స్టేషన్ రూట్లో ఇక్బాల్ మినార్ వైపు వచ్చే ట్రాఫిక్ను రవీంద్రభారతి, లక్డీకపూల్ వైపు దారి మళ్లించనున్నారు.
- ఇక్బాల్ మినార్ నుంచి ట్యాంక్బండ్ మీదుగా తెలుగుతల్లి ఫ్లై ఓవర్ వైపు వచ్చే వెహికల్స్ను కట్టమైసమ్మ మీదుగా పంపిస్తారు.
- మినిస్టర్ రోడ్, రాణిగంజ్ నుంచి పీవీ మార్గ్, నెక్లెస్ రోడ్ వైపు వచ్చే వెహికల్స్ ను నల్లగుట్ట రైల్వే బ్రిడ్జి మీదుగా దారి మళ్లిస్తారు.
- బుద్ధభవన్ నుంచి నల్లగుట్ట బ్రిడ్జి, పీవీ మార్గ్ వైపు ట్రాఫిక్కు అనుమతి లేదు. సోనాబి అబ్దుల్లా మసీదు వద్ద ట్రాఫిక్ను డైవర్ట్ చేస్తారు.
- నాంపల్లి,ట్రాఫిక్ కంట్రోల్ రూమ్ నుంచి బీజేఆర్ సర్కిల్ వైపు ట్రాఫిక్ను అనుమతించరు. రవీంద్రభారతి వైపు దారి మళ్లిస్తారు.
