కొడంగల్, వెలుగు: లారీ చక్రాల కిందపడి ఆరేండ్ల చిన్నారి మృతి చెందింది. వికారాబాద్ జిల్లా కొడంగల్ పట్టణానికి చెందిన చాంద్ పాషా, రెహానా దంపతులకు సంతానం లేకపోవడంతో అయేషా (6) అనే చిన్నారిని దత్తత తీసుకుని అల్లారుముద్దుగా పెంచుకుంటున్నారు. ఎల్కేజీ చదువుతున్న చిన్నారిని రోజుమాదిరిగానే తల్లి రెహానా స్కూల్కు తీసుకెళ్తుండగా, ఎన్హెచ్ 163పై లారీ రూపంలో మృత్యువు కబళించింది.
రోడ్డు దాటుతున్న క్రమంలో వేగంగా వచ్చిన లారీ చిన్నారి అయేషాపైకి దూసుకెళ్లడంతో, ఆ పసిప్రాణం తల్లి కళ్లముందే లారీ చక్రాల కింద నలిగిపోయింది. రక్తపు మడుగులో పడి ఉన్న బిడ్డను చూసి ఆ తల్లి గుండెలవిసేలా రోదిస్తున్న తీరు స్థానికులను కలిచివేసింది. సమాచారం అందుకున్న ఎస్సై సత్యనారాయణ ఘటనా స్థలానికి చేరుకుని లారీని స్వాధీనం చేసుకున్నారు. డ్రైవర్ పై కేసు నమోదు చేసి దర్యాప్తు ప్రారంభించినట్లు తెలిపారు.
