ఇంగ్లాండ్‎పై హెడ్ ఊచకోత.. టెస్టుల్లో ప్రపంచ రికార్డ్ సృష్టించిన ఆస్ట్రేలియా

మెల్‎బోర్న్:పెర్త్ వేదికగా జరిగిన యాషెస్ తొలి టెస్టులో ఆస్ట్రేలియా ఇంగ్లాండ్‎ను చిత్తు చేసింది. కేవలం రెండు రోజుల్లోనే ముగిసిన ఈ టెస్టులో 8 వికెట్ల తేడాతో ఇంగ్లాండ్‎పై ఘన విజయం సాధించింది. ఇంగ్లాండ్ విధించిన 205 పరుగుల లక్ష్యాన్ని ఆస్ట్రేలియా కేవలం రెండు వికెట్లు మాత్రమే కోల్పోయి అలవోక విజయాన్ని అందుకుంది. ఓపెనర్ ట్రావిస్ హెడ్ (83 బంతుల్లోనే 123) సెంచరీతో చెలరేగి జట్టుకు వేగంగా గెలుపును అందించాడు.

ఈ విజయం ద్వారా టెస్ట్ క్రికెట్‎లో ఆస్ట్రేలియా ప్రపంచ రికార్డ్ సృష్టించింది. టెస్ట్ క్రికెట్ చరిత్రలో అత్యంత వేగంగా 200 పరుగులకు పైగా రన్-ఛేజింగ్ చేసిన జట్టుగా రికార్డ్ క్రియేట్ చేసింది. ఇంగ్లాండ్ విధించిన 205 పరుగుల లక్ష్యాన్ని కేవలం 28.2 ఓవర్లలో 7.23 ఓవర్-రన్ రేటుతో లక్ష్యాన్ని ఛేదించింది ఆస్ట్రేలియా. ఇప్పటి వరకు ఈ రికార్డు (రన్ రేట్ పరంగా) ఇంగ్లాండ్ పేరిట ఉండేది. న్యూజిలాండ్‌పై 50 ఓవర్లలో 5.98 రన్ రేట్‌తో 299 పరుగుల టార్గెట్‎ను ఛేజ్ చేసింది ఇంగ్లాండ్.