బెల్లంపల్లి రూరల్, వెలుగు: క్రీడా మైదానం ఏర్పాటుతో తన భూమి పోతుందని తెలిసిన ఓ రైతు అధికారులను బెదిరించి మరీ పనులు అడ్డుకోవాలని చూశాడు. మాటలతో వినడం లేదని గొడ్డలి పట్టుకొని తన భూమిని కాపాడుకునే ప్రయత్నం చేశాడు. బుధవారం మంచిర్యాల జిల్లా భీమిని మండలం అక్కళ్లపల్లిలో ఈ ఘటన చోటు చేసుకుంది. గ్రామంలోని సర్వే నం.69లో 20 గుంటల భూమిని అధికారులు క్రీడా మైదానం కోసం గుర్తించారు. అయితే, ఆ భూమి తనదేనని అదే గ్రామానికి చెందిన అశోక్ అనే గిరిజన రైతు చెప్తున్నాడు. తనకున్న కొద్దిపాటి భూమిని అధికారులు స్పోర్ట్స్ గ్రౌండ్కు గుర్తించడంపై ముందు నుంచీ అడ్డగిస్తూనే వస్తున్నాడు.
బుధవారం ఉదయం స్థానిక గ్రామపంచాయతీ అధికారులు క్రీడా మైదానం పనులు చేసేందుకు అక్కడికి చేరుకోగా.. ముందే గమనించిన అశోక్ గొడ్డలి చేతబట్టుకొని అధికారుల వద్దకు చేరుకున్నాడు. తన భూమిలో అడుగు పెడితే ఊరుకోనని గొడ్డలి చూపిస్తూ బెదిరించాడు. వెంటనే అక్కడ ఉన్న డీఎల్పీవో ఫణీందర్ జెడ్పీ సీఈవో నరేందర్ పోలీసులకు సమాచారం అందించారు. వెంటనే అక్కడికి చేరుకున్న పోలీసులు ఆశోక్ను సముదాయించారు. రెవెన్యూ అధికారులు గుర్తించిన భూమిలోనే పనులు చేస్తున్నామని ఆఫీసర్లు చెప్పారు. అయితే, భద్రాద్రి కొత్తగూడెం జిల్లాలో పోడు భూమి కోసం గొత్తికోయలు ఫారెస్ట్ ఆఫీసర్ ను హత్య చేసిన ఘటన మరుసటి రోజే ఈ ఘటన జరగడం చర్చనీయాంశమైంది.
