శంషాబాద్, వెలుగు : వరల్డ్ డెఫ్‌ షూటింగ్ చాంపియన్‌‌‌‌‌‌‌‌షిప్‌‌‌‌‌‌‌‌లో మూడు స్వర్ణ పతకాలు గెలిచిన సిటీ షూటర్ ధనుష్ శ్రీకాంత్కు ఘన స్వాగతం లభించింది. జర్మనీలోని హనోవెర్‌‌‌‌‌‌‌‌‌‌‌‌‌‌‌‌లో జరిగిన ఈ టోర్నీలో సత్తా చాటిన శ్రీకాంత్ సోమవారం సిటీకి తిరిగొచ్చాడు. శంషాబాద్ ఎయిర్‌‌‌‌‌‌‌‌‌‌‌‌‌‌‌‌పోర్టులో కుటుంబ సభ్యులు, శ్రీకాంత్శిక్షణ పొందుతున్న గన్‌ ఫర్ గ్లోరీ అకాడమీ కోచ్‌‌‌‌‌‌‌‌లు, స్టూడెంట్లు ఘన స్వాగతం పలికారు.
ధనుష్‌‌‌‌‌‌‌‌ను చూడగానే అతని తల్లి ఆశ శ్రీకాంత్ భావోద్వేగానికి గురయ్యారు. కొడుకును హత్తుకొని కన్నీళ్లు పెట్టుకున్నారు. ఈ టోర్నీలో ధనుష్ ఒక పతకం నెగ్గుతాడని అనుకుంటే ఏకంగా మూడు స్వర్ణాలు సాధించడంతో తామెంతో గర్వపడుతున్నామని చెప్పారు. వైకల్యంతో కుంగిపోకుండా ఎంతో కష్టపడి ఈ స్థాయికి ఎదిగిన ధనుష్ శ్రీకాంత్కు రాష్ట్ర ప్రభుత్వం నుంచి సహాయం లభిస్తుందని ఆశిస్తున్నామని కోచ్‌ నిరంజన్ రెడ్డి అన్నారు.
