ముంబై: దేశ ఆర్ధిక రాజధాని ముంబైలో ఘోర రోడ్డు ప్రమాదం జరిగింది. ఓ ట్రక్ అదుపు తప్పి 20 నుంచి 25 వాహనాలను ఢీకొట్టింది. ఈ ఘటన శనివారం (జూలై 26) రాయ్‌గఢ్ జిల్లాలోని ఖలాపూర్ తాలూకా ఖోపోలి పోలీస్ స్టేషన్ పరిధిలోని అదోషి సొరంగం సమీపంలోని ముంబై-పుణే ఎక్స్‌ప్రెస్‌వేపై జరిగింది. ట్రక్ సృష్టించిన బీభత్సానికి ఒక వ్యక్తి అక్కడికక్కడే మరణించగా.. 20 మందికి పైగా తీవ్రంగా గాయపడ్డారు. 20 నుంచి 25 వాహనాలు తీవ్రంగా ధ్వంసం అయ్యాయి.
ALSO READ | పిల్లలు చచ్చిపోయిన మీరు మారరా..? రాజస్థాన్లో కూలిన మరో ప్రభుత్వ పాఠశాల పైకప్పు
సమాచారం అందుకున్న పోలీసులు హుటాహుటిన ఘటన స్థలానికి చేరుకున్న పోలీసులు సహయక చర్యలు చేపట్టారు. క్షతగాత్రులను చికిత్స నిమిత్తం ఆసుపత్రికి తరలించారు. రోడ్డుపై వాహనాలు చెల్లాచెదురుగా పడటంతో ముంబై-పుణే ఎక్స్‌ప్రెస్‌వేపై కిలోమీటర్ల మేరకు ట్రాఫిక్ జామ్ అయ్యింది. దీంతో ట్రాఫిక్ పోలీసులు వాహనాల రద్దీని క్లియర్ చేశారు. కంటైనర్ బ్రేక్ ఫెయిల్ కావడంతో ఈ ప్రమాదం జరిగినట్లు ప్రాథమికంగా నిర్ధారించామని పోలీసులు తెలిపారు.
ట్రక్ 20 నుంచి 25 వాహనాలను ఢీకొట్టిందని వాటిలో బీఎండబ్ల్యూ, మెర్సిడెస్ బెంజ్ వంటి లగ్జరీ కార్లు కూడా ఉన్నాయని చెప్పారు. ట్రక్ డ్రైవర్ను అదుపులోకి తీసుకున్నామని తెలిపారు. డ్రైవర్కు డ్రంక్ అండ్ డ్రైవ్ టెస్టులు చేయగా.. అతడు మద్యం సేవించలేదని తేలిందని చెప్పారు. ఈ ఘటనపై కేసు నమోదు చేసుకుని దర్యాప్తు చేస్తున్నామని.. పూర్తి వివరాలు విచారణ అనంతరం వెల్లడిస్తామని తెలిపారు.
