వికారాబాద్, వెలుగు: అనుమానాస్పదంగా రోడ్డు పక్కన పడి ఓ వ్యక్తి మృతిచెందాడు. నవాబుపేట ఎస్సై పుండ్లిక్ తెలిపిన ప్రకారం.. నవాబుపేట మండలంలోని చిట్టిగిద్ద గ్రామానికి చెందిన అటుగాళ్ల ఆనందం(42) బుధవారం ఉదయం మాంసం తీసుకువస్తానని చెప్పి వికారాబాద్ కు బైక్పై వెళ్లాడు. రాత్రయినా ఇంటికి రాలేదు. గురువారం ఉదయం కేశవపల్లి గ్రామ సమీపంలో రోడ్డు పక్కన అనుమానాస్పదంగా మృతిచెంది కనిపించాడు. పోలీసులు కేసు దర్యాప్తు చేస్తున్నారు.
అంకిరెడ్డిపల్లిలో మరొకరు..
కీసర: యాదాద్రి జిల్లా బొమ్మలరామారానికి చెందిన వల్లపు రమేశ్ కొంతకాలంగా అంకిరెడ్డిపల్లి గ్రామానికి చెందిన గుర్రాల మల్లేశ్ వ్యవసాయ పొలం వద్ద పశువుల కాపరిగా పనిచేస్తున్నాడు. గురువారం సాయంత్రం పశువుల కొట్టం వద్ద రక్తపు మడుగులో అతడి మృతదేహం కనిపించింది. దీంతో మృతుడి బంధువులు యజమాని మల్లేశ్ పనేనని అనుమానించి ఆయన ఇంటి వద్ద ఆందోళన చేశారు.
