హైదరాబాద్, వెలుగు: రాబోయే రెండు రోజుల పాటు రాష్ట్రంలో తేలికపాటి నుంచి మోస్తరు వర్షాలు కురుస్తాయని వాతావరణ శాఖ తెలిపింది. నిర్మల్, నిజామాబాద్, రాజన్న సిరిసిల్ల, భద్రాద్రి కొత్తగూడెం, ఖమ్మం, నల్గొండ, సూర్యాపేట, మహబూబాబాద్, వరంగల్, హనుమకొండ, జనగామ, సిద్దిపేట, కామారెడ్డి, నాగర్కర్నూల్, వనపర్తి జిల్లాల్లో ఉరుములు, మెరుపులతో కూడిన జల్లులు పడుతాయని చెప్పింది. అలాగే, బంగాళాఖాతంలో తుఫాను ఏర్పడుతుందని వాతావరణ శాఖ కన్ఫర్మ్ చేసింది.
ఈ నెల 6న ఉపరితల ఆవర్తనం ఏర్పడి.. 7వ తేదీ నాటికి అల్పపీడనంగా మారుతుందని గురువారం విడుదల చేసిన బులెటిన్లో పేర్కొంది. 8న వాయుగుండంగా మారి.. తుఫానుగా రూపాంతరం చెందుతుందని తెలిపింది. అయితే, తుఫాను తీవ్రత, అది ప్రయాణించే మార్గం, తీరంలో ల్యాండ్ అయ్యే పరిస్థితులు అల్పపీడనం ఏర్పడిన తర్వాతే తెలుస్తాయని పేర్కొంది. దీని ప్రభావంతో రాష్ట్రంలో 8వ తేదీ నుంచి పగటి ఉష్ణోగ్రతలు పెరుగుతాయని వెల్లడించింది.
