- వైజాగ్లో ఘటన.. సీసీ కెమెరాలో రికార్డ్
- హోంవర్క్చేయకపోవడమే తప్పయింది!
- భయంభయంగా టీచర్ముందుకు ఆరేండ్ల చిన్నారి
- తనను కొట్టవద్దని ఏడుస్తూ ప్రాధేయపడిన స్టూడెంట్
- ముందుకు లాగి చెంపదెబ్బ కొట్టిన ఉపాధ్యాయురాలు
- ఒక్కసారిగా గుండె ఆగి బాలుడి మృతి
- ఏపీలోని వైజాగ్లో ఘటన..
హైదరాబాద్, వెలుగు: హోంవర్క్ చేయకపోవడంతో ఎలాగైనా టీచర్ కొడుతుందని యూకేజీ చదువుతున్న ఆ చిన్నారి భయపడ్డాడు. భయం భయంగా టీచర్ముందుకు రాగా, ఆమె చిన్నారి చొక్కా పట్టి లాగి, చెంప దెబ్బ కొట్టడంతో క్లాస్రూమ్లోనే కుప్పకూలాడు. ఈ ఘటన ఏపీలోని వైజాగ్లోని లిటిల్ గార్డెన్ స్కూల్లో జరిగింది. ఈ దుర్ఘటన మొత్తం క్లాస్ రూమ్లోని సీసీ కెమెరాలో రికార్డయ్యింది.
గురువారం ఉదయం క్లాస్ రూమ్లో టీచర్ స్టూడెంట్ల హోంవర్క్ పరిశీలిస్తోంది. అప్పటికే భయంతో వణికిపోతున్న ప్రణయ్ తేజ్(6) టీచర్ ముందుకొచ్చాడు. చేతులు అడ్డంగా ఊపుతూ తనను కొట్టవద్దని ప్రాధేయపడినప్పటికీ, టీచర్ చిన్నారి చొక్కా పట్టుకొని ముందుకు లాగి చెంపపై కొట్టింది. దీంతో చిన్నారి గుండె ఆగిపోవడంతో టీచర్పైనే కుప్పకూలాడు.
టీచర్ తేరుకొని స్కూల్ యాజమాన్యం సహకారంతో సిటీలోని కింగ్ జార్జ్ హాస్పిటల్కు తరలించగా, అప్పటికే చనిపోయినట్టు డాక్టర్లు ప్రకటించారు. విషయం తెలిసి మృతుడి కుటుంబీకులు, బంధువులు హాస్పిటల్కు చేరుకొని ఆందోళనకు దిగారు. టీచర్ కొట్టడం వల్లే ప్రణయ్ తేజ్చనిపోయాడని కుటుంబ సభ్యులు ఆరోపించారు. బాధ్యులపై కఠిన చర్యలు తీసుకోవాలని డిమాండ్ చేశారు. కాగా, ఈ ఘటనపై ఏపీ విద్యాశాఖ మంత్రి నారా లోకేశ్ స్పందించారు. విచారణ చేపట్టి స్కూల్ యాజమాన్యం, బాధ్యులపై చర్యలు తీసుకుంటామని హామీ ఇచ్చారు.
