విభజన సమస్యలు తీరాలని లేదా?
సీఎస్పై కేంద్ర కేబినెట్ సెక్రటరీ అసహనం
ఈ-సమీక్ష పోర్టల్లో వివరాలెందుకు పెడ్తలేరని ఫైర్
హైదరాబాద్, వెలుగు : రాష్ట్ర విభజనకు సంబంధించిన సమస్యలు, హామీలు పరిష్కారం కావాలని తెలంగాణ ప్రభుత్వానికి లేనట్లు ఉందని కేంద్రం సీరియస్ అయింది. రెండు తెలుగు రాష్ట్రాలకు సంబంధించి విభజన అంశాలతో పాటు ఇతర హామీల అమలుపై ఎప్పటికప్పుడు వివరాలను ఈ–సమీక్ష పోర్టల్లో ఎందుకు అప్డేట్ చేయడం లేదని ప్రశ్నించింది. ఇలాగైతే రాష్ట్రానికి రావాల్సినవి ఎలా వస్తాయని అసహనం వ్యక్తం చేసింది. కేంద్ర కేబినెట్ సెక్రటరీ (కోఆర్డినేషన్) రాష్ట్ర ప్రభుత్వ చీఫ్ సెక్రటరీ సోమేశ్ కుమార్తో బుధవారం వీడియో కాన్ఫరెన్స్ నిర్వహించారు. కేంద్రం, రాష్ట్రం మధ్య కోఆర్డినేషన్ అంశాలపై చర్చించారు. దాదాపు 40 నిమిషాల పాటు సాగిన ఈ సమావేశంలో రాష్ట్ర సర్కార్ తీరుపై తీవ్ర అసహనం వ్యక్తం చేసినట్లు తెలిసింది.
8 ఏండ్ల నాటి అంశాలనూ అప్డేట్ చేయరా?
2014లో లేవనెత్తిన అంశాలను కూడా ఈ–సమీక్ష పోర్టల్ అప్డేట్ చేయకపోవడం ఏంటని కేంద్ర కేబినెట్ సెక్రటరీ ప్రశ్నించినట్లు తెలిసింది. ఇందులో ఎన్డీఆర్ఎఫ్ కింద రూ.3,064 కోట్లు కావాలని 2016లో రాష్ట్ర ప్రభుత్వం అడిగింది. వెనకబడిన జిల్లాలకు సంబంధించి రూ.450 కోట్లు ఇవ్వాలని కోరారు. ఐటీఐఆర్ తో పాటు ఎలక్ట్రానిక్మ్యానుఫాక్చరింగ్ క్లస్టర్స్, కొత్త ఎయిర్పోర్టులు, ఐఐఎం ఏర్పాటు, బయ్యారం స్టీల్ ప్లాంట్, ట్రైబల్ యూనివర్సిటీ ఏర్పాటు వంటివి కూడా ఉన్నాయి. వీటన్నింటిపై వివరాలు అప్లోడ్ చేయాలని, దేని స్టేటస్ఎక్కడ ఉందో అప్డేట్ చేయాలని కేంద్ర కేబినెట్ సెక్రటరీ సూచించారు.
ఒకవేళ ఏదైనా అంశాన్ని తిరస్కరించినట్లయితే.. ఆ విషయాన్ని కూడా పొందుపర్చాలన్నారు. మీటింగ్ ఉదయం10.30 గంటలకు మొదలు కాగా, సమయానికి సీఎస్ రాలేదని తెలిసింది. ఆయనకు బదులు జీఏడీ సెక్రటరీ శేషాద్రి అటెండ్ అయ్యారని, దీంతో కనీసం సీఎస్కు టైంకు రావడం కూడా తెలియదా? అంటూ కేంద్ర కేబినెట్ సెక్రటరీ అసంతృప్తి వ్యక్తం చేసినట్లు సమాచారం.
