దేశ రక్షణలోనూ కీలక పాత్ర పోషిస్తున్నది: బండి సంజయ్

• ఎన్డీఆర్ఎఫ్ త్యాగాలు మరువం
• ఎలాంటి విపత్తులైన ధైర్యంగా ఎదుర్కోగల సత్తా ఉంది
• ఎన్డీఆర్ఎఫ్ అమరుల సంస్మరణ సభకు హాజరు

న్యూఢిల్లీ, వెలుగు: దేశ విపత్తు నిర్వహణ వ్యవస్థకు నేషనల్ డిజాస్టర్ రిలీఫ్ ఫోర్స్ (ఎన్​డీఆర్ఎఫ్) వెన్నెముక వంటిదని కేంద్ర మంత్రి బండి సంజయ్ అన్నారు. అడవుల్లో అగ్నిప్రమాదాలు, పర్వత రక్షణ చర్యలు, కెమికల్, బయోలాజికల్, రేడియోలాజికల్, న్యూక్లియర్ (సీబీఆర్ఎన్) వంటి విపత్తులను ఎదుర్కోవడానికి ఎన్​డీఆర్ఎఫ్ సిద్ధమైందని చెప్పారు. ఢిల్లీలో ఎన్​డీఆర్ఎఫ్ అమరవీరుల సంస్మరణ సభకు బండి సంజయ్ చీఫ్ గెస్ట్​గా హాజరయ్యారు. ఈ సందర్భంగా అమరవీరుల స్తూపం వద్ద నివాళులర్పించారు. విధి నిర్వహణలో ప్రాణాలు కోల్పోయిన సిబ్బంది కుటుంబ సభ్యులతో ఆయన మాట్లాడారు. ప్రజలను కాపాడే సమయంలో ప్రాణాలు కోల్పోయిన ఎన్డీఆర్ఎఫ్ సిబ్బంది త్యాగాలు దేశం ఎన్నటికీ మరువదన్నారు.

దేశంలో ప్రతి చోటా సహాయక చర్యలు

ఈ స్మారక చిహ్నం.. కేవలం రాతి నిర్మాణం కాదని.. ఎన్డీఆర్ఎఫ్ సైనిక దళాలు, రాష్ట్ర పోలీస్ బలగాల వీరత్వం, నిబద్ధతకు ప్రతీక అని సంజయ్ అన్నారు. దేశవ్యాప్తంగా 16 బెటాలియన్లు, 28 రీజినల్ రెస్పాన్స్ సెంటర్లు (ఆర్ఆర్సీ) ద్వారా ఈ దళం ప్రతిచోటా సహాయక చర్యలు అందిస్తున్నదన్నారు. ‘‘ఎన్‌‌‌‌‌‌‌‌‌‌‌‌‌‌‌‌డీఆర్ఎఫ్ బృందాలు ప్రమాద స్థలానికి చేరుకుంటే చాలు.. పరిస్థితి అదుపులోకి వస్తుందనే నమ్మకం ప్రజల్లో ఉంది. తాజాగా మయన్మార్​లో భూకంపం వస్తే.. “ఆపరేషన్ బ్రహ్మ”పేరిట ఎన్​డీఆర్ఎఫ్ బృందం సహాయక చర్యలు చేపట్టింది. ఢిల్లీ, పంజాబ్, హిమాచల్, ఉత్తరాఖండ్, సిక్కిం, ఏపీ, తెలంగాణ వంటి రాష్ట్రాల్లో చోటుచేసుకున్న వర్షాలు, వరదలు వంటి విపత్తుల్లో అసాధారణ సేవలందించింది’’అని బండి సంజయ్ అన్నారు.