వచ్చే ఏడాది నుంచి పల్లె విద్యార్థులకు ఇంటి వద్దకే వర్సిటీలు

‘వీ6 వెలుగు’ ఇంటర్వ్యూలో యూజీసీ చైర్మన్ జగదీశ్కుమార్
ఆన్లైన్ చదువులతో వర్సిటీలను దగ్గర చేస్తం
అందుకోసం మంచి వర్సిటీలు, కాలేజీలను ఎంపిక చేసినం
వచ్చే ఏడాది నుంచే అమలు చేస్తం
ఉద్యోగాల కోసమే డ్యుయల్ డిగ్రీ తీసుకొచ్చినం
డిజిటల్ వర్సిటీ చదువులపై అనుమానాలొద్దు
సొంత భాషలో ప్రొఫెషనల్ కోర్సులని వెల్లడి
వీ6, వెలుగు ఇంటర్వ్యూలో యూజీసీ చైర్మన్ జగదీశ్ కుమార్

న్యూఢిల్లీ, వెలుగు: విద్యారంగం, ఆన్లైన్ ఎడ్యుకేషన్లో మార్పులు తీసుకొస్తున్నామని, దానికి సంబంధించిన గైడ్లైన్స్ను ఇప్పటికే యూనివర్సిటీల వీసీలకు పంపించా మని యూనివర్సిటీ గ్రాంట్స్ కమిష న్ (యూజీసీ) చైర్మన్ జగదీశ్ కుమార్ చెప్పారు. దేశంలో 1,050 వర్సిటీలున్నా.. అందరికీ అందులో సీట్లిచ్చే అవకాశాల్లేవన్నారు. ముఖ్యంగా గ్రామీణ ప్రాంత స్టూడెంట్లకు ఇబ్బందవుతోందని, చదవాలనుకున్నా చదువుకునే పరిస్థితులు వారికి ఉండకపోవచ్చని చెప్పారు. అందుకే ఆన్లైన్ చదువుల ద్వారా అలాంటి వాళ్ల ఇంటి వద్దకే వర్సిటీలను తీసుకెళ్లాలని అనుకుంటున్నామని తెలిపారు.

ఎన్ఆర్ఐఎఫ్ ర్యాంకింగ్స్లో 100 లోపు, న్యాక్ గ్రేడ్ 3.0 ఉండే యూనివర్సిటీలు, కాలేజీలను ఎంపిక చేశామన్నారు. ఈ డిగ్రీకి కేవలం ఇంటర్ ఉంటే చాలని, పాస్ పర్సంటేజ్తో సంబంధం లేదని పేర్కొన్నారు. వచ్చే ఏడాది నుంచి వర్సిటీలు, కాలేజీల్లో ఆన్లైన్ విధానాన్ని ప్రవేశపెట్టేందుకు అవకాశం కల్పిస్తామన్నారు. ఆదివారం ఆయన ‘వీ6 వెలుగు’కు ప్రత్యేక ఇంటర్వ్యూ ఇచ్చారు. ఆ విశేషాలు ఆయన మాటల్లోనే..
డిగ్రీ స్టూడెంట్లకు అవకాశాలు ఉండట్లే..
ఇంజనీరింగ్, మెడిసిన్, ఇతర ప్రొఫెషనల్ కోర్సులు చేసినోళ్లకే ఎక్కువ ఉద్యోగ అవకాశాలు వస్తున్నాయి. 70 శాతం ఉన్న డిగ్రీ స్టూడెంట్లకు ఉద్యోగాలు రావడం గగనమవుతోంది. అలాంటి వాళ్లకు ఉద్యోగ అవకాశాలను మెరుగుపరిచేందుకే డ్యుయల్ డిగ్రీ కోర్సులను తీసుకొచ్చాం. అందులో భాగంగా ఉదయం ఒక డిగ్రీ, సాయంత్రం మరో డిగ్రీ చదువుకునే వెసులుబాటు ఉంటుంది. లేదా ఒక డిగ్రీని క్లాసులో.. మరో డిగ్రీని ఆన్లైన్లో చదువుకోవచ్చు. అదీ కాదంటే రెండు డిగ్రీలను ఒకేసారి ఆన్లైన్లో చదువుకునే వీలు కూడా ఉంటుంది.
ఐఐటీ, ఎన్ఐటీల్లాగా డిజిటల్ వర్సిటీ
ఐఐటీ, ఎన్ఐటీల్లాగానే నేషనల్ డిజిటల్ యూనివర్సిటీని తీసుకురాబోతున్నాం. ఇంజనీరింగ్, మెడిసిన్, ప్రొఫెషనల్ కోర్సులు తప్ప దేశ విదేశాల్లోని డిజిటల్ కోర్సులన్నీ ఈ వర్సిటీలో అందుబాటులో ఉంటాయి. కొత్త యూనివర్సిటీలు కట్టాలంటే భారీగా నిధులు కావాల్సి ఉంటుంది. పైగా 60% ఉద్యోగాలకు చాలా సంస్థలు డిగ్రీ పట్టాలను లెక్కలోకి తీసుకోవట్లేదని సర్వేలే చెప్తున్నాయి. అందుకే అందరికీ అందుబాటులో ఉండేలా డిజిటల్ యూనివర్సిటీని తీసుకొస్తున్నాం. ఫిజికల్ డిగ్రీ, ఓపెన్ డిగ్రీకి ఎలాంటి తేడా లేదు. ఈ విషయంలో విద్యార్థులు, వారి తల్లిదండ్రులు ఎలాంటి అనుమానాలు పెట్టుకోవద్దు. నాణ్యమైన చదువు చెప్తారు.
వర్సిటీల్లో 35% ఖాళీలు
దేశంలోని అన్ని యూనివర్సిటీల్లో 35 శాతం ఖాళీలున్నాయి. ఉద్యోగాల భర్తీ నిరంతర ప్రక్రియ కాబట్టి.. ఎప్పుడూ 100 శాతం భర్తీ చేయలేం. మంచి అర్హతలున్న లెక్చరర్ల కోసం పీహెచ్డీ రీసెర్చ్ను బలోపేతం చేయడంపై దృష్టి పెట్టాం. టీచర్లు తక్కువున్నా డిజిటల్ యూనివర్సిటీ ద్వారా లక్షలాది మందికి మంచి విద్యను అందించేందుకు అవకాశం ఉంటుంది.
సొంత భాషలో చదువులు
ఇంగ్లీష్ అన్నది కేవలం కమ్యూనికేషన్కోసం వాడే భాష. సొంత భాషలో చదువుకుంటే సబ్జెక్ట్తో పాటు క్రియేటివిటీ కూడా పెరుగుతోంది. నోబెల్ వచ్చిన వాళ్లలో ఎక్కువ మంది పీహెచ్డీ వరకు సొంత భాషలో చదువుకున్నోళ్లే. సొంత భాషలో చదువు చెప్పడాన్ని యూనివర్సిటీలకు ఎలా అప్లై చేయాలన్నదానిపై ఆలోచిస్తున్నాం. 10 ఇంజనీరింగ్ కాలేజీల్లో సొంత భాషలో కోర్సులను చెప్పేందుకు ఇప్పటికే ఓకే చెప్పాం" అని జగదీశ్ కుమార్ అన్నారు.
నేను పక్కా తెలంగాణ
‘‘నేను పక్కా తెలంగాణ బిడ్డను. మాది నల్గొండ జిల్లా నకిరేకల్కు దగ్గర్లోని మామిడాల. ఆ ఊరి పేరే మా ఇంటి పేరైంది. ఆ రోజుల్లో చదువుకోవడం చాలా కష్టంగా ఉండేది. మా నాన్న నన్ను అప్పులు చేసి చదివించారు. రూ.10 ట్యూషన్ ఫీజు కోసం అప్పు తెచ్చి కట్టేవారు. ఊర్లో పీహెచ్డీ చేసిన ఫస్ట్ వ్యక్తిని నేనే. మా అమ్మానాన్న కష్టం, ప్రోత్సాహంతోనే నేను ఈ స్థాయికి వచ్చాను. మా ఊర్లో వందేండ్ల నాటి మా ఇల్లు ఇప్పటికీ ఉంది. నేను ఊరికి వెళ్తే అందరూ వచ్చి మాట్లాడతారు’’ అని జగదీశ్ కుమార్ చెప్పారు.
ఒక్కటే సబ్జెక్ట్ వద్దు
‘‘పదేండ్ల తర్వాత ఉద్యోగాలు ఎలా ఉంటాయో ఎవరికీ తెలియదు. కాబట్టి విద్యార్థులకు ఒకే సబ్జెక్ట్పై ట్రైనింగ్ ఇవ్వకూడదు. మల్టిపుల్ సబ్జెక్టుల్లో విషయ జ్ఞానం ఉండేలా తీర్చిదిద్దాలి. అలాగైతే పదేండ్ల తర్వాత ఎలాంటి ఉద్యోగాలున్నా.. బేసిక్ ట్రైనింగ్తో ఉద్యోగం పొందే అవకాశం ఉంటుంది. అవసరాన్ని బట్టి మారాలి. లేదంటే ఉద్యోగాలు కోల్పోయే ప్రమాదం ఉంది. అందుకే జీవితాంతం లెర్నర్స్గానే ఉండాలంటూ కొత్త ఎడ్యుకేషన్ పాలసీ చెప్తోంది. ఉద్యోగం చేస్తూనే అన్ని విషయాలనూ నేర్చుకోవాలి.