అమరావతి: ఇటీవల ఆంధ్రప్రదేశ్లోని కర్నూల్ జిల్లాలో ఘోర బస్సు ప్రమాదం జరిగిన విషయం తెలిసిందే. చిన్నటేకూరు దగ్గర వేమూరి కావేరి ప్రైవేట్ ట్రావెల్స్ బస్సులో మంటలు చెలరేగి 19 మంది మరణించారు. ఈ తీవ్ర విషాద ఘటన మరువకముందే ఏపీలో మరో బస్సు ప్రమాదం జరిగింది. సోమవారం (నవంబర్ 3) రాత్రి ఏలూరు జిల్లా లింగపాలెం మండలం జూబ్లీనగర్‌ దగ్గర ప్రైవేట్ ట్రావెల్స్ బస్సు బోల్తా పడింది. ఈ
ప్రమాదంలో ఒకరు మరణించగా.. పలువురు తీవ్రంగా గాయపడ్డట్లు తెలుస్తోంది. స్థానికుల ద్వారా సమాచారం అందుకున్న పోలీసులు హుటాహుటిన ఘటన స్థలానికి చేరుకుని సహయక చర్యలు చేపట్టారు. క్షతగాత్రులను చికిత్స నిమిత్తం ఆసుపత్రులకు తరలించారు. ప్రమాదానికి గురైన బస్సు భారతి ట్రావెల్స్కు చెందినదిగా పోలీసులు గుర్తించారు. ప్రమాద సమయంలో బస్సులో 20 మంది ప్రయాణికులు ఉన్నట్లు సమాచారం.
బస్సు ఏలూరు నుంచి హైదరాబాద్ వస్తుండగా ఈ దుర్ఘటన చోటు చేసుకుంది. ఈ ఘటనలో పలువురు ప్రయాణికులు తీవ్రంగా గాయపడటంతో మరణాల సంఖ్య మరింత పెరిగే అవకాశం ఉన్నట్లు సమాచారం. ఈ ఘటనపై కేసు నమోదు చేసుకుని దర్యాప్తు చేపట్టిన పోలీసులు.. ప్రమాదానికి గల కారణాలపై ఆరా తీస్తున్నారు. ప్రైవేట్ ట్రావెల్స్ బస్సుల వరుస ప్రమాదాలు ప్రయాణికులను ఆందోళనకు గురి చేస్తున్నాయి.
