- రెండు మిత్రదేశాలకు ఫైటర్ జెట్స్ ఇచ్చే విషయంపై అమెరికా తీరొక్క ప్రకటనలు
వాషింగ్టన్/సియోల్: యుద్ధ విమానాలు కావాలని అడిగిన ఉక్రెయిన్, దక్షిణ కొరియాలకు అమెరికా ఒకేరోజులో తీరొక్క ఆన్సర్ చెప్పింది. ఉత్తర కొరియా నుంచి అణ్వాయుధ ముప్పును ఎదుర్కొంటున్న దక్షిణ కొరియాకు ‘యస్’ చెప్పిన అగ్రరాజ్యం.. రష్యాతో యుద్ధంలో ఉన్న ఉక్రెయిన్ కు మాత్రం ‘నో’ చెప్పింది. ఈ రెండు ప్రకటనలు కూడా మంగళవారం రోజు కొన్ని గంటల తేడాతో వెలువడ్డాయి. గగనతలంలో రష్యాను తిప్పికొట్టేందుకు తమకు ఎఫ్–16 ఫైటర్ జెట్స్ కావాలంటూ ఉక్రెయిన్ చేసిన రిక్వెస్ట్ను అమెరికా అధ్యక్షుడు జో బైడెన్ తిరస్కరించారు. ఆ విమానాలు అందించలేమని స్పష్టం చేశారు. అనంతరం బైడెన్ నిర్ణయాన్ని సమర్ధిస్తూ అమెరికా జాతీయ భద్రతా మండలి కోఆర్డినేటర్ (స్ట్రాటజిక్ కమ్యూనికేషన్స్) జాన్ కిర్బీ ఓ ప్రకటన విడుదల చేశారు. రష్యాతో యుద్ధం మొదలైనప్పటి నుంచి ఉక్రెయిన్ కు రూ.2 లక్షల కోట్లు విలువైన సైనిక సహాయాన్ని అందించామని గుర్తు చేశారు. బ్రాడ్లీ ఫైటింగ్ వెహికిల్స్ రకానికి చెందిన యుద్ధ ట్యాంకుల షిప్మెంట్ గతవారమే అమెరికా నుంచి ఉక్రెయిన్ కు బయలుదేరిందని చెప్పారు. అయితే ఉక్రెయిన్ కు యుద్ధ విమానాల సరఫరాపై జర్మనీ నో చెప్పిన మరుసటిరోజే.. అమెరికా కూడా అదేవిధమైన ప్రకటన చేసింది. రష్యా మండిపాటు వల్లే ఇవి యుద్ధ విమానాలను ఉక్రెయిన్కు ఇవ్వడం లేదని పరిశీలకులు అభిప్రాయపడుతున్నారు.
ఉత్తర కొరియాకు కళ్లెం వేసేందుకు..
దక్షిణ కొరియాలో అత్యాధునిక ఆయుధాల మోహరింపును మరింత పెంచుతామని అమెరికా రక్షణ మంత్రి లాయిడ్ఆస్టిన్ ప్రకటించారు. ఉత్తరకొరియా నుంచి అణ్వాయుధ ముప్పు పెరిగిన నేపథ్యంలో దక్షిణ కొరియాకు సైనికంగా అండగా నిలబడతామన్నారు. ఇందులో భాగంగా అత్యాధునిక ఎఫ్–22, ఎఫ్–35 వంటి ఫైటర్ జెట్స్ తో సంయుక్త సైనిక విన్యాసాలను కొనసాగిస్తామని తెలిపారు. దక్షిణ కొరియా రక్షణమంత్రి లీ జాంగ్ సుప్ తో కలిసి మంగళవారం సియోల్ లో నిర్వహించిన మీడియా సమావేశంలో ఆయన ఈవివరాలను వెల్లడించారు.
పుతిన్తో టచ్లో ఉన్నా: జర్మనీ చాన్స్లర్
ఉక్రెయిన్ కు యుద్ధ ట్యాంకులను పంపుతామని వారం కిందట జర్మనీ, అమెరికా, పలు యూరప్ దేశాలు ప్రకటన చేయగానే రష్యా మండిపడింది. నాటో దేశాల జోక్యాన్ని సహించబోమని, ఇలాంటి చర్యలను తీవ్రంగా పరిగణిస్తామని హెచ్చరించింది. దీంతో వెంటనే జర్మనీ చాన్స్లర్ ఓలఫ్ షోల్జ్ మాట మార్చారు. ఉక్రెయిన్కు ఫైటర్స్ జెట్స్ ఇవ్వబోమని సోమవారం చెప్పారు. నాటో దేశాలు, రష్యా మధ్య యుద్ధం రాబోదని.. టెన్షన్లు పెరిగేందుకు చాన్స్ ఇవ్వబోమని వెల్లడించారు. “నేను పుతిన్తో టచ్లో ఉన్నాను. డిసెంబరు మొదటి వారంలోనే ఫోన్లో ఆయనతో మాట్లాడాను. మరోసారి ఫోన్లో మాట్లాడతాను” అని జర్మనీ చాన్స్లర్ చెప్పారు.
