బెంగళూరు: ప్రముఖ సినీ నటి జయంతి (79) కన్నుమూశారు. రెండేళ్లుగా శ్వాసకోశ సమస్యలతో బాధపడుతున్న జయంతి.. బెంగళూరులోని తన ఇంట్లో మృతి చెందారు. తెలుగు, కన్నడ, తమిళ భాషలతోపాటు మలయాళ, హిందీ చిత్ర సీమల్లోనూ జయంతి సత్తా చాటారు. మొత్తంగా ఆమె 500కు పైగా మూవీల్లో నటించారు. ఎంజీఆర్, ఎన్టీఆర్, రాజ్‌కుమార్, రజనీకాంత్ లాంటి దిగ్గజ నటులతో ఆమె నటించి ఆకట్టుకున్నారు. ముఖ్యంగా కన్నడ ఇండస్ట్రీలో జయంతి మంచి పేరు దక్కించుకున్నారు. నటనకు దేవత అంటూ అభిమాన శారదగా జయంతిని కన్నడ ఫ్యాన్స్ పిలుస్తుంటారు. జయంతి ఏడు మార్లు కర్నాటక స్టేట్ ఫిల్మ్ అవార్డులను, రెండు సార్లు ఫిల్మ్‌ఫేర్ అవార్డును దక్కించుకున్నారు.
