- v6-వెలుగుతో వివేక్ వెంకట స్వామి
- అందరూ వద్దంటున్నా సాగర్లో సభ పెట్టారు
- సర్కారు నిర్లక్ష్యం వల్లే ఒక్కరోజులో 10 వేల కేసులు
- ప్రధాని లాగా సీఎం కూడా వ్యాక్సిన్ వేసుకుంటే జనాల్లో భరోసా పెరిగేది
- మున్సిపల్ ఎన్నికలను వాయిదా వేస్తే బాగుండేదని కామెంట్
కరోనా కట్టడిలో రాష్ట్ర సర్కార్ నిర్లక్ష్యం వల్లే కేసులు ఒక్కరోజులోనే 10 వేలు దాటాయని, సీఎం సాగర్ సభతోనే కరోనా తీవ్రత పెరిగిందని మాజీ ఎంపీ, బీజేపీ కోర్ కమిటీ సభ్యుడు వివేక్ వెంకటస్వామి ఆరోపించారు. సీఎం కేసీఆర్కు ప్రజలపై పట్టింపు లేదని, ధ్యాసంతా ఎన్నికలు, గెలుపుపైనేనని ఆగ్రహం వ్యక్తం చేశారు. మంగళవారం ‘వీ6 –వెలుగు’తో ఆయన పలు విషయాలపై మాట్లాడారు. ఐసోలేషన్ తర్వాత సీఎం కేసీఆర్ ఫాం హౌస్ నుంచి బయటకు రావాలని, ప్రజల వద్దకు వెళ్లి సమస్యలు తెలుసుకోవాలని సూచించారు. అన్ని జిల్లా దవాఖాన్లను ముందే అప్గ్రేడ్ చేసి ఉంటే.. రాష్ట్రంలో ఈ పరిస్థితులు వచ్చేవి కాదన్నారు. డాక్టర్లు, నర్సుల నియామకాలను ముందే చేపట్టి ఉంటే ఉపయోగంగా ఉండేదన్నారు. వాటిని పట్టించుకోకుండా సర్కార్ నిర్లక్ష్యం చేసిందని ఫైర్ అయ్యారు.
కేంద్రానికి తప్పుడు లెక్కలు
కరోనా కేసులు, మరణాలపై కేంద్రానికి రాష్ట్ర సర్కార్ తప్పుడు లెక్కలు చెప్తోందని వివేక్ వెంకటస్వామి విమర్శించారు. కరెక్ట్ లెక్కలు పంపితే దానికి తగ్గట్టు సాయం అందుతుందన్నారు. ఆక్సిజన్ లేదంటూ మంత్రులు కేటీఆర్, ఈట రాజేందర్ గగ్గోలు పెట్టారని, తర్వాతి రోజే ఒడిశా నుంచి ప్రధాని ట్యాంకర్లు తెప్పించారని అన్నారు. రాష్ట్ర ప్రభుత్వమే కరోనా కట్టడిపై నిర్లక్ష్యంగా వ్యవహరిస్తోందన్నారు. ఎన్ని బెడ్లున్నాయి.. వెంటిలేటర్లు ఎన్ని ఉన్నాయి.. ఆక్సిజన్ కొరత ఎంతుంది.. వంటి వివరాలపై సీఎం కేసీఆర్ ఒక్కసారైనా రివ్యూ పెట్టలేదని మండిపడ్డారు.
ఎవరూ ఊహించలె
కరోనా కట్టడికి రెమ్డెసివిర్ పరిష్కారం కాదని, అది యాంటీ వైరల్ డ్రగ్ మాత్రమేనని వివేక్ వెంకటస్వామి అన్నారు. రోజూ మూడున్నర లక్షల కేసులు వస్తాయని ఎవరూ ఊహించలేదని చెప్పారు. 60 ఏండ్లు నిండినోళ్లందరికీ కేంద్ర ప్రభుత్వం ఫ్రీగా వ్యాక్సిన్ ఇచ్చిందని గుర్తు చేశారు. దానిని రాష్ర్టాలు సరిగా వాడుకోలేదన్నారు. ప్రధాని నరేంద్ర మోడీలాగా సీఎం కేసీఆర్ కూడా వ్యాక్సిన్ వేసుకుని ఉంటే ప్రజల్లో భరోసా వచ్చేదన్నారు. సీఎం కేసీఆర్ వ్యాక్సిన్ వేసుకోకపోవడంతోనే రాష్ట్రంలో వ్యాక్సినేషన్పై నిర్లక్ష్యం పెరిగిందని, 10 శాతం టీకాలు వృథా అయ్యాయని చెప్పారు.
ఫ్రీ వ్యాక్సిన్లకు 2 వేల కోట్లియ్యలేరా?
వ్యాక్సినేషన్పై కేంద్ర, రాష్ట్ర ప్రభుత్వాలు కలిసి పనిచేయాలని వివేక్ వెంకటస్వామి సూచించారు. రాష్ట్ర ప్రభుత్వం రూ.36 వేల కోట్ల కాళేశ్వరం ప్రాజెక్టును రూ.1.25 లక్షల కోట్లకు పెంచినప్పుడు.. వ్యాక్సిన్లకు రూ.2 వేల కోట్లిస్తే వచ్చే నష్టమేంటని ఆయన ప్రశ్నించారు. సెక్రటేరియట్ను కూల్చొద్దని ఆనాడే చెప్పానని, దానిని ఐసోలేషన్ సెంటర్గా మారిస్తే ప్రజలకు ఎంతో ఉపయోగపడేదని అన్నారు. డిజాస్టర్ మేనేజ్మెంట్ చట్టం కింద రాష్ట్రాలకు కేంద్ర ప్రభుత్వం అన్ని అధికారాలూ ఇచ్చిందని ఆయన గుర్తు చేశారు. ఆక్సిజన్ ప్లాంట్ల ఏర్పాటు, రెమ్డెసివిర్ ఉత్పత్తి కెపాసిటీ పెంపు, వెంటిలేటర్లు, టెస్టింగ్ కిట్ల దిగుమతి వంటి వాటికి అనుమతులు ఇచ్చిందన్నారు. 30 ఆక్సిజన్ ప్లాంట్ల ఏర్పాటుకు కేంద్రం అనుమతిచ్చినా రాష్ట్ర సర్కార్ చర్యలు చేపట్టలేదన్నారు.
ప్రచారంలో ఎడం పాటించట్లె
నాగార్జునసాగర్లో ప్రచారానికి రావొద్దని అక్కడి వారు చెప్పినా వినిపించుకోకుండా సీఎం సభ పెట్టారని వివేక్ వెంకటస్వామి విమర్శించారు. సాగర్లో సభ పెట్టి సీఎం కేసీఆర్ కరోనాను విపరీతంగా స్ప్రెడ్ చేశారని ఫైర్ అయ్యారు. ఎన్నికల ప్రచారాల్లో ఎక్కడా ఫిజికల్ డిస్టెన్స్ పాటించట్లేదన్నారు. కొందరు మాస్కులు పెట్టుకుంటున్నా.. ఇంకొందరు మాత్రం పెట్టుకోవట్లేదన్నారు. మున్సిపల్ ఎన్నికలను వాయిదా వేస్తే బాగుండేదని చెప్పుకొచ్చారు.
రాష్ట్రం చేతిలోనే హాస్పిటల్స్ వ్యవస్థ
హాస్పిటళ్ల వ్యవస్థ అంతా రాష్ట్ర సర్కార్ చేతుల్లోనే ఉందని వివేక్ వెంకటస్వామి అన్నారు. ఆయుష్మాన్ భారత్ను అమలు చేస్తే ఒక్కొక్కరికి రూ.5 లక్షల దాకా కరోనా సహా అన్ని ట్రీట్మెంట్లు ఫ్రీగా అందే అవకాశం ఉండేదన్నారు. ఆయుష్మాన్ భారత్లో చేరుతున్నామంటూ ఇటీవల ప్రకటించినా.. ఇప్పటిదాకా ముందడుగు పడలేదని విమర్శించారు.