నల్గొండ ప్రభుత్వ హాస్పిటల్కు తరలింపు, పరిస్థితి విషమం
నల్గొండ అర్బన్‌, వెలుగు: ప్రభుత్వం పే స్కేలు ఇస్తామన్న హామీ తీర్చకపోగా.. సమ్మె చేసిన రోజులకు జీతం ఇవ్వకపోవడంతో మనస్తాపం చెందిన ఓ వీఆర్ఏ ఆత్మహత్యకు యత్నించాడు. నల్గొండ జిల్లా రాములబండ గ్రామంలో బుధవారం ఈ ఘటన జరిగింది. కాకుల కొండారంలో వీఆర్ఏగా విధులు నిర్వహిస్తున్న మంత్రి వెంకటేశ్వర్లు(39).. పేస్కేలు అమలు చేయాలనే డిమాండ్తో వీఆర్ఏల సంఘం నిర్వహించిన 80 రోజుల సమ్మెలో పాల్గొన్నారు. ప్రభుత్వం ఆ హామీ అమలు చేయకపోగా.. సమ్మె కాలానికి సంబంధించిన వేతనం కూడా నిలిపివేసింది.
అటు వేతనం రాక, పే స్కేల్ అమలు కాకపోవడంతో వెంకటేశ్వర్లు మనస్తాపం చెందారు. ఆర్థిక ఇబ్బందులూ పెరిగాయి. నెలవారీ ఈఎంఐలు కట్టలేని పరిస్థితిలో ఫైనాన్స్ వాళ్ల వేధింపులు ఎక్కువయ్యాయి. బుధవారం ఆయన భార్య ఇంటిముందు పనుల్లో ఉండగా.. వెంకటేశ్వర్లు ఇంట్లో ఫ్యాన్కు తాడు బిగించి ఉరివేసుకునేందుకు యత్నించారు. ఆయన భార్య ఇది గమనించి కేకలు పెట్టడంతో చుట్టుపక్కలవాళ్లు వచ్చి వెంకటేశ్వర్లును నల్లగొండ ప్రభుత్వ ఆస్పత్రికి తరలించారు. ప్రస్తుతం ఆయన కండిషన్ సీరియస్గా ఉందని డాక్టర్లు తెలిపారు. వెంకటేశ్వర్లుకు భార్య, ఇద్దరు కొడుకులు ఉన్నారు.
