స్నేహితుడు దేవేందర్ రెడ్డి పరిస్థితి విషమం
ములుగు జిల్లాలో ఘటన
ములుగు, వెలుగు: వరంగల్ ప్రెస్ క్లబ్ ట్రెజరర్, ఫొటో జర్నలిస్ట్ బొమ్మినేని సునీల్ రెడ్డి (38) దారుణ హత్యకు గురయ్యాడు. ఇచ్చిన అప్పును తీర్చమని అడిగేందుకు స్నేహితుడు దేవేందర్రెడ్డి, సునీల్ రెడ్డి వెళ్లగా వారిపై కత్తులతో దాడి జరిగింది. దేవేందర్రెడ్డి పరిస్థితి కూడా విషమంగా ఉంది. ములుగు జిల్లా గోవిందరావుపేట మండలం పస్రా గ్రామంలో సోమవారం రాత్రి ఈ ఘటన జరిగింది. స్థానికులు తెలిపిన సమాచారం ప్రకారం.. పస్రాలో బెంగళూరు బేకరీ నిర్వహిస్తున్న దయకు.. వరంగల్‌కు చెందిన ఫైనాన్షియర్ దేవేందర్ రెడ్డి రూ.8 లక్షలు అప్పు ఇచ్చాడు. అప్పు తిరిగి చెల్లించే విషయంలో వీరి మధ్య వివాదం చెలరేగింది. అప్పు వసూలు చేసుకునేందుకు దేవేందర్ రెడ్డి, సునీల్ రెడ్డి పస్రా వచ్చారు. దేవేందర్ రెడ్డిని మాట్లాడదామని బేకరీ వెనక్కి పిలిచిన దయ, అనుచరులతో కలసి అతడిపై కత్తులతో దాడి చేశాడు. తప్పించుకునేందుకు దేవేందర్రెడ్డి బయటకు పరిగెత్తాడు. స్నేహితుడి కోసం బేకరీలోకి వెళ్లిన సునీల్ రెడ్డిని ఓ గదిలోకి లాక్కె ళ్లి కత్తులతో విచక్షణారహితంగా దాడి చేశారు. స్థానికులు అందించిన సమాచారంతో ఘటనా స్థలానికి వచ్చిన పోలీసులు.. రక్తపు మడుగులో పడి ఉన్న సునీల్ రెడ్డిని గుర్తించారు. తీవ్రంగా గాయపడిన దేవేందర్ రెడ్డిని మెరుగైన ట్రీట్‌మెంట్ కోసం ఎంజీఎంకు తరలించారు. ఫైనాన్స్ వ్యవహారమేనా లేక ఇంకేమైనా గొడవలున్నాయా అనే కోణంలో పోలీసులు దర్యాప్తు చేస్తున్నారు. నిందితులను అదుపులోకి తీసుకుని విచారిస్తున్నట్లు తెలిసింది.
For More News..
