హైదరాబాద్ సిటీలో మ్యాన్ హోళ్లపై వాటర్ బోర్డు స్పెషల్ ఫోకస్

• ప్రమాదాలు జరగకుండా ముందస్తు చర్యలు
• డీప్ మ్యాన్​హోళ్లకు సేఫ్టీ గ్రిల్స్​ ఏర్పాటు
• మ్యాన్​హోళ్ల మూతలు తెరిస్తే కఠిన చర్యలు
• ఎం‌‌సీసీకి వచ్చే ఫిర్యాదులపై ప్రత్యేక పర్యవేక్షణ

హైదరాబాద్ ​సిటీ, వెలుగు: గ్రేటర్ ​పరిధిలో మ్యాన్​హోళ్లపై మెట్రో వాటర్​బోర్డు ప్రత్యేక దృష్టి సారించింది. భారీ వర్షాల సమయంలో మ్యాన్​హోళ్ల మూతలు తీసే వారిపై కఠిన చర్యలకు సిద్ధమైంది. అలాగే సీవ‌‌రేజి త‌‌ర‌‌చూ ఓవ‌‌ర్​ఫ్లో అయ్యే ప్రాంతాల ప‌‌ట్ల అధికారులు ఫోకస్ పెడుతున్నారు. ఇటీవల పాతబస్తీలోని మ్యాన్​హోల్లో ఓ బాలిక పడిపోయిన నేపథ్యంలో వాటర్​బోర్డు అధికారులు సైతం అప్రమత్తం అయ్యారు. ఈ సంఘటనతో వాటర్​బోర్డుకు సంబంధం లేకపోయినా అలాంటి సంఘటన మళ్లీ జరగకుండా ఉండేందుకే అధికారులను ఆయా డివిజన్ల పరిధిలో పరిశీలించాలని బోర్డు ఎండీ అశోక్​రెడ్డి ఆదేశించారు. దెబ్బతిన్న, ధ్వంసమైన మాన్​హాళ్లు, వాటి కవర్లను పునర్నిర్మించాలన్నారు.

ఏ ప్రాంతంలోనూ మ్యాన్​హోళ్లకు మూతలు లేకుండా ఉండొద్దని, ప్రతి డివిజన్, సెక్షన్ల పరిధిలో ప్రత్యేక బృందాలతో తనిఖీలు నిర్వహించనున్నట్టు వెల్లడించారు. ముఖ్యంగా లోతైన మాన్​హోళ్లకు సేఫ్టీ గ్రిల్లులు ఏర్పాటు చేయాలని, స్థానికుల  నుంచి ఎం‌‌సీసీ (మెట్రో కస్టమర్ కేర్​)కు వచ్చే ఫిర్యాదులపై ప్రత్యేక పర్యవేక్షణ చేయాలని కూడా నిర్ణయించారు. చాలా మంది ప్రజ‌‌లు వర్షాలు కురుస్తున్న సమయంలో వర్షపునీరు వెళ్లడానికి మ్యాన్​హోళ్లను తెరుస్తుంటారు. ఎట్టి ప‌‌రిస్థితుల్లోనూ మ్యాన్​హోల్ మూత‌‌ల‌‌ను తెర‌‌వ‌‌వ‌‌ద్దని, అలా తెరిచిన వారిని గుర్తించి వాటర్​బోర్డు చట్టంలోని సెక్షన్​–74 ప్రకారం నేరంగా వారిపై క్రిమినల్​ కేసులు కూడా పెట్టనున్నట్టు అధికారులు తెలిపారు.

5.20 లక్షల మ్యాన్​హోళ్లు​
గ్రేటర్​పరిధిలో రకరకాల మ్యాన్​హోళ్లు ఉన్నాయి. ఇందులో కొన్ని జీహెచ్ఎంసీకి చెందినవి కాగా, మరికొన్ని మెట్రోవాటర్​బోర్డుకు చెందినవి ఉన్నాయి. ఒక్కమెట్రో వాటర్​బోర్డుకు చెందిన మ్యాన్​హోళ్లు​ 5.20 లక్షల వరకు ఉన్నట్టు అధికారులు తెలిపారు. వీటిలో దాదాపు 21 వేల డీప్​మ్యాన్​హోళ్లు (ఒక మీటర్​నుంచి ఐదు మీటర్ల లోతైనవి) ఉన్నాయి. ఇలాంటి మ్యాన్​హోళ్లలో పడితే బతకడం కష్టం. ఎందుకంటే లోతు ఎక్కువగా ఉండడంతోపాటు, పడిన వారు కొట్టుకుపోయే అవకాశం ఎక్కువగా ఉంటుంది. అధికారులు ఇప్పుడు వర్షాకాలంలో ఇలాంటి మ్యాన్​హోళ్లపై ప్రత్యేక దృష్టి పెట్టారు. ఇలాంటి మ్యాన్​హోళ్లు​ఎక్కువగా మెయిన్​ రోడ్లపైన, కాలనీలు, బస్తీల్లోని రోడ్లకు మధ్యలో ఉంటాయి.

ప్రస్తుతం గ్రేటర్​ పరిధిలో ఉన్న మ్యాన్​హోళ్ల​కండిషన్​పై అధికారులు ఆరా తీస్తున్నారు. ప్రమాదకరంగా ఉన్న మ్యాన్​హోళ్లకుకు కవర్​తో పాటు దానికి ఒక అడుగు కింద సేఫ్టీ గ్రిల్స్​ ఏర్పాటు చేస్తున్నారు. ఒక వేళ ఎవరైనా ప్రమాదవశాత్తూ ఇందులో పడి పోయినా పూర్తిగా మునిగిపోకుండా సేఫ్టీగ్రిల్​కాపాడుతుంది. ప్రస్తుతం గ్రేటర్​ పరిధిలోని 30 శాతం మ్యాన్​హోళ్లకు మాత్రమే సేఫ్టీగ్రిల్స్​ ఏర్పాటు చేశారు. త్వరలోనే మిగిలిన వాటికి కూడా ఏర్పాటు చేసేందుకు అధికారులు సన్నాహాలు చేస్తున్నారు. నగరంలోని అన్ని మ్యాన్​హోల్స్​ పై తప్పని సరిగా కవర్లు ఉండేలా చర్యలు తీసుకోవాలని ఉన్నతాధికారులు లోకల్​అధికారులను ఆదేశించారు.