వాట్సాప్, టెలిగ్రామ్ యాప్స్కు కేంద్ర ప్రభుత్వం కీలక ఆదేశాలు జారీ చేసింది. సిమ్ యాక్టివ్గా లేకుండా వాట్సాప్, టెలిగ్రామ్ సేవలు అందించొద్దని డిపార్ట్మెంట్ ఆఫ్ టెలికమ్యూనికేషన్స్ (DoT) ఈ యాప్ ఆధారిత సర్వీస్ ప్రొవైడర్లకు స్పష్టం చేసింది. టెలీ కమ్యునికేషన్ సైబర్ సెక్యురిటీ నియమాల సవరణ చట్టం 2025 ప్రకారం.. సైబర్ క్రైమ్స్ను అరికట్టే ఉద్దేశంతోనే కేంద్ర ప్రభుత్వం కొత్తగా ఈ రూల్ తీసుకొచ్చింది.
ప్రస్తుతం ఏంటంటే.. వాట్సాప్, టెలిగ్రామ్ ఇన్ స్టాల్ చేసుకున్నప్పుడు మాత్రమే వెరిఫికేషన్, ఓటీపీలను సదరు యాప్స్ అడుగుతుంటాయి. ఒక్కసారి లాగిన్ అయిన తర్వాత ఆ సిమ్ డీయాక్టివేట్ అయినా సరే లాగౌట్ చేయనంత వరకూ ఆ మొబైల్ నంబర్పై వాట్సాప్, టెలిగ్రామ్ పనిచేస్తూనే ఉంటాయి.
కేంద్రం తీసుకొచ్చిన కొత్త రూల్ ప్రకారం.. ఇకపై ఇలా కుదరదు. సిమ్ యాక్టివ్గా లేని మరు క్షణం వాట్సాప్, టెలిగ్రామ్ సేవలు కూడా బంద్ అవుతాయి. బ్యాంకింగ్ యాప్స్, యూపీఐ యాప్స్ సిమ్ యాక్టివ్గా ఉంటే మాత్రమే ఎలా పనిచేస్తాయో.. ఇకపై వాట్సాప్, టెలిగ్రామ్ కూడా అలానే సేవలు అందించాల్సి ఉంటుంది.
ఈ మేరకు వాట్సాప్ , టెలిగ్రామ్ యాప్స్కు కేంద్ర ప్రభుత్వం 90 రోజుల డెడ్ లైన్ విధించింది. ఈ 90 రోజుల్లోపు తమ యాప్స్కు ఇంటర్ లింక్ చేసిన మొబైల్ నంబర్స్ యాక్టివ్గా ఉన్నాయో.. లేదో సదరు యాప్స్ చెక్ చేసుకుని నిర్ధారించుకోవాలి. ఒకవేళ.. సిమ్ కార్డ్ యాక్టివ్గా లేకుండా సేవలు కొనసాగుతున్నట్లయితే తక్షణమే సేవలను నిలిపివేయాలి. 120 రోజుల్లోపు ఈ డేటాను DoTకు సమర్పించాలి.
