హైదరాబాద్, వెలుగు: మేడ్చల్‌ మల్కాజిగిరి జిల్లా శామీర్‌‌‌‌‌‌‌‌పేట మండలం దేవరయంజాల్‌ గ్రామంలో సీతారామ స్వామి ఆలయానికి చెందిన 1,521.13 ఎకరాల భూవివాదంలో రికార్డులను ఎందుకు సమర్పించడం లేదని ఎండోమెంట్‌ కమిషనర్‌‌‌‌‌‌‌‌ను శుక్రవారం హైకోర్టు ప్రశ్నించింది. 1925–-26 నుంచి ఇప్పటివరకు ఒరిజినల్‌ రికార్డులతో హాజరుకావాలని చెబితే.. కేవలం 1925-–26 పహాణితో వస్తే ఎలా అని, మిగిలిన వివరాల మాటేమిటని అడిగింది.
ట్రిబ్యునల్‌ లో ఎన్ని ఓఏ (ఒరిజినల్‌ అప్లికేషన్స్‌)లు పెండింగ్‌‌‌‌‌‌‌‌లో ఉన్నాయి? ఎన్నింటిలో ఉత్తర్వులు జారీ అయ్యాయి? ఏయే సర్వే నంబర్లు, ఎంత విస్తీర్ణం? తదితర వివరాలను సమర్పించాలని ఆదేశించింది.
దేవర యంజాల్‌ భూములపై హక్కులకు సంబంధించి దాఖలైన సుమారు 54 పిటిషన్‌‌‌‌‌‌‌‌లపై జస్టిస్‌ జూకంటి అనిల్‌‌‌‌‌‌‌‌కుమార్‌ శుక్రవారం విచారణ చేపట్టారు. గత ఆదేశాల మేరకు ఎండోమెంట్‌ కమిషనర్‌ వ్యక్తిగతంగా హాజరయ్యారు. ప్రభుత్వ న్యాయవాదులు కాట్రం మురళీధర్‌‌‌‌‌‌‌‌రెడ్డి, భూక్యా మంగీలాల్‌ నాయక్‌ వాదనలు వినిపిస్తూ.. రెండు నెలల క్రితమే కమిషనర్‌ బాధ్యతలు స్వీకరించారని, అందువల్ల ఈ భూమికి సంబంధించిన వివరాలను సమర్పించలేకపోతున్నట్టు తెలిపారు. ఇది పురాతనమైన ఆలయమని, ఆలయానికి చెందిన భూముల వివరాలు లేకపోవడంతో సమస్య తలెత్తిందన్నారు.
ఆలయ భూములకు సంబంధించి జరిగిన మోసం రెవెన్యూ, దేవాదాయశాఖల దృష్టికి రాలేదన్నారు. ప్రస్తుతం పిటిషనర్లకు హక్కులు ఎలా వచ్చాయన్న విషయం తెలియడంలేదన్నారు. కొంత గడువు ఇస్తే పూర్తి వివరాలతో రికార్డులు సమర్పిస్తామని తెలిపారు.
వాదనలను విన్న న్యాయమూర్తి.. దేవాలయానికి చెందిన భూములని చెబితే సరిపోదని, ప్రభుత్వం కూడా ఆధారాలు చూపకపోవడం సరికాదన్నారు. ఈ భూములకు సంబంధించి 2011లో సింగిల్‌ జడ్జి జారీ చేసిన ఉత్తర్వులను తమ దృష్టికి తీసుకురాలేదన్నారు. తదుపరి విచారణకు పెండింగ్‌ పిటిషన్‌‌‌‌‌‌‌‌తో పాటు పూర్తి రికార్డులతో కౌంటర్ దాఖలు చేయాలని ఆదేశిస్తూ విచారణను వాయిదా వేశారు. దేవాదాయశాఖ కమిషనర్‌ హాజరును మినహాయింపునిస్తూ ఉత్తర్వులు జారీ చేశారు.
