మనిషి పుట్టినప్పటి నుంచి చనిపోయే వరకు చేసే ప్రతి పనికి లెక్క ఉంటుందని హిందూ పురాణాలు చెబుతాయి. మనం చేసే మంచి పనులు పుణ్యాలుగా, చెడు పనులు పాపాలుగా లెక్కించబడతాయని నమ్మకం. ఈ పాపపుణ్యాల లెక్కలు చూసే బాధ్యత చిత్రగుప్తుడికి ఉంటుందని పురాణాల్లో చెప్పబడింది.
ఒక మనిషి చనిపోయిన తర్వాత అతను చేసిన మంచి, చెడు పనుల ఆధారంగా స్వర్గానికి వెళ్లాలా? నరకానికి వెళ్లాలా? అనేది యమధర్మరాజు నిర్ణయిస్తాడని హిందువుల విశ్వాసం.
అయితే అసలు చిత్రగుప్తుడు ఎవరు? ఆయన ఎలా జన్మించారు? యమధర్మరాజుకు ఆయన ఎందుకు సహాయకుడిగా మారారు? ఆయన నిజమైన రూపం ఎలా ఉంటుంది? అనే విషయాలను ఇప్పుడు తెలుసుకుందాం...
చిత్రగుప్తుడిని ఎందుకు పూజిస్తారు?
హిందూ సంప్రదాయంలో చిత్రగుప్తుడికి ప్రత్యేక స్థానం ఉంది. ముఖ్యంగా ఉత్తర భారతదేశంలోని కొన్ని ప్రాంతాల్లో దీపావళి తర్వాత వచ్చే భాయ్ దూజ్ రోజున చిత్రగుప్త పూజను ఘనంగా నిర్వహిస్తారు.
పురాణాల ప్రకారం, చిత్రగుప్తుడు ప్రతి మనిషి జీవితంలో చేసే మంచి, చెడు పనుల వివరాలను రాస్తుంటాడు. అంటే మనిషి ఎవరికి సహాయం చేశాడు? ఎవరికి కష్టం కలిగించాడు? ఎలాంటి మంచి పనులు చేశాడు? ఎలాంటి తప్పులు చేశాడు? ఇలా ప్రతి ఒక్కరి కర్మల లెక్కను చిత్రగుప్తుడు రాస్తుంటాడని నమ్ముతారు.
మనిషి మరణించిన తర్వాత ఈ లెక్కలను యమధర్మరాజు ముందు ఉంచుతాడని పురాణ కథలు చెబుతాయి. వాటి ఆధారంగా ఆ వ్యక్తికి ఎలాంటి ఫలితం దక్కాలో నిర్ణయిస్తారని హిందూ ధర్మ విశ్వాసం.
చిత్రగుప్తుడు ఎలా జన్మించారు?
పురాణాల్లో చిత్రగుప్తుడి జననం వెనుక ఒక ఆసక్తికరమైన కథ ఉంది. పురాణాల ప్రకారం, బ్రహ్మదేవుడు ఈ సృష్టిని ప్రారంభించి సమస్త జీవరాశులను సృష్టించిన తర్వాత ఒక ముఖ్యమైన సమస్య ఎదురైంది. ఈ ప్రపంచంలో పుట్టిన ప్రతి జీవి చేసే మంచి, చెడు పనులను ఎవరు గమనించాలి? వారి కర్మలకు తగిన ఫలితాలను ఎవరు అందించాలి? అనే ప్రశ్న వచ్చింది.
అప్పుడు జీవుల మరణం తర్వాత వారి కర్మలకు తగిన ఫలితాలు అందించే బాధ్యతను నిర్వహించడానికి బ్రహ్మదేవుడు యమధర్మరాజును సృష్టించాడని పురాణాలు చెబుతున్నాయి. యమధర్మరాజుకు మనుషుల పాపపుణ్యాలను బట్టి న్యాయం చేసే బాధ్యతను అప్పగించారు.
►ALSO READ | తరచూ అజీర్తి, జీర్ణ సమస్యలు వస్తున్నాయా..? అయితే.. మీ లివర్ ఈ సిగ్నల్ ఇస్తున్నట్లే..!
కానీ రోజులు గడిచేకొద్దీ భూమిపై మనుషుల సంఖ్య పెరిగింది. ప్రతి ఒక్కరూ ఎన్నో రకాల పనులు చేయడం మొదలుపెట్టారు. ఇంతమంది మనుషుల పనులను గమనించడం, వారి పాపపుణ్యాల లెక్కలను నిర్వహించడం యమధర్మరాజుకు కష్టంగా మారింది. దీంతో ఆయన బ్రహ్మదేవుడిని కలిసి తనకు ఒక సమర్థుడైన సహాయకుడిని ఇవ్వాలని కోరాడు.
బ్రహ్మదేవుడి తపస్సు.. చిత్రగుప్తుడి ఆవిర్భావం!
యమధర్మరాజు కోరిక విన్న బ్రహ్మదేవుడు లోకంలోని జీవుల కర్మలను సరిగ్గా లెక్కించే వ్యక్తి అవసరమని భావించాడు. దీంతో ఆయన కొంతకాలం ధ్యానం, తపస్సు చేశాడు. ఆ తపస్సు ఫలితంగా బ్రహ్మదేవుడి నుంచి ఒక తేజస్సుతో నిండిన దివ్య పురుషుడు ఆవిర్భవించాడని పురాణ కథనం. ఆయనే చిత్రగుప్తుడు.
అలా జన్మించిన చిత్రగుప్తుడికి మనుషుల పాపపుణ్యాల లెక్కలు రాసే బాధ్యతను అప్పగించారు. అప్పటి నుంచి ఆయన యమధర్మరాజుకు ముఖ్యమైన సహాయకుడిగా మారాడు.
ప్రతి మనిషి చేసిన మంచి, చెడు పనుల వివరాలను నమోదు చేస్తూ, మరణం తర్వాత ఆ వివరాలను యమధర్మరాజుకు అందిస్తుంటాడని పురాణాలు చెబుతున్నాయి. చిత్రగుప్తుడి జననానికి సంబంధించిన కథలు బ్రహ్మవైవర్త పురాణం, పద్మ పురాణం, గరుడ పురాణం వంటి పురాణ గ్రంథాల్లో ప్రస్తావించబడ్డాయి.
చిత్రగుప్తుడి అసలు రూపం ఎలా ఉంటుంది?
చిత్రగుప్తుడిని సాధారణ వ్యక్తిలా కాకుండా దివ్యమైన తేజస్సుతో కనిపించే దేవుడిగా పురాణాలు వర్ణిస్తాయి. ఆయన ముఖంలో ప్రశాంతత, గంభీరత కనిపిస్తాయని చెబుతారు. ముఖ్యంగా న్యాయానికి ప్రతీకగా చిత్రగుప్తుడిని భావిస్తారు. సాధారణంగా చిత్రగుప్తుడిని నాలుగు చేతులు ఉన్న రూపంలో చిత్రిస్తారు.
ఆయన చేతుల్లో కలం, సిరాబుడ్డి, కర్మల వివరాలు రాసే పుస్తకం వంటి వస్తువులు ఉంటాయి. ఇవి మనుషుల పనులను లెక్కించడం, వాటిని నమోదు చేయడం అనేవి ఆయన బాధ్యతకు గుర్తులుగా భావిస్తారు. అంతేకాదు, ఆయన రాజవస్త్రాలు ధరించి, తలపై బంగారు కిరీటం, చెవులకు ఆభరణాలు, మెడలో రత్నాల హారంతో దివ్యంగా కనిపిస్తారని చిత్రాల్లో చూపిస్తారు.
చిత్రగుప్తుడి పూజ వెనుక ఉన్న అసలు భావం ఏమిటి?
చిత్రగుప్తుడిని పూజించడం అంటే కేవలం ఒక దేవుడిని ఆరాధించడం మాత్రమే కాదు. మనం చేసే ప్రతి పనికి బాధ్యత వహించాలనే మంచి సందేశం కూడా ఇందులో ఉందని చెప్పవచ్చు. మన జీవితంలో ఇతరులకు సహాయం చేయడం, నిజాయితీగా ఉండడం, ఎవరినీ బాధపెట్టకుండా జీవించడం వంటి మంచి పనులు చేయాలని ఈ పూజ గుర్తుచేస్తుంది.
మనిషి చేసే ప్రతి పనికి ఏదో ఒక ఫలితం ఉంటుందని, అందుకే మంచి మార్గంలో నడవాలని చిత్రగుప్తుడి కథ మనకు తెలియజేస్తుంది. మనిషి జీవితంలో చేసే ప్రతి పనికి లెక్క ఉంటుందనే నమ్మకానికి చిత్రగుప్తుడు ప్రతీక. అందుకే హిందూ సంప్రదాయంలో ఆయనకు ప్రత్యేకమైన స్థానం ఉంది.
