హైదరాబాద్‌లో రెండు రోజుల పాటు వైన్ షాపులు బంద్ కానుండటంతో మద్యం ప్రియులు వైన్స్ షాపులకు పోటెత్తారు. బోనాల జాతర సందర్భంగా హైదరాబాద్‌లో జులై 16 ఆదివారం నుంచి 18 వ తేదీ వరకు మద్యం దుకాణాలు మూసివేయనున్నారు. ముఖ్యంగా ఎల్బీ నగర్ డివిజన్ ఫరిధిలో జులై 16వ తేదీ ఉదయం 6 గంటల నుంచి 18 వ తేదీ ఉదయం 6 గంటల వరకు రెండు రోజుల పాటు మూసివేస్తారు. దీంతో ముందుగా మద్యాన్ని కొనుగోలు చేసేందుకు ఎల్బీనగర్ వైన్స్ ల దగ్గరకు పెద్ద సంఖ్యలో చేరుకున్నారు. దీంతో ఆ ప్రాంతమంతా ఫుల్ ట్రాఫిక్ జామ్ అయింది.
ఎల్బీనగర్ ప్రధాన రోడ్డులోని వైన్స్ షాపులకు జనాలు పెద్ద ఎత్తున వచ్చారు. మద్యం కొనుగోలు చేసేందుకు లైన్లలో నిలబడ్డారు. కొందరు రోడ్డు పక్కనే నిర్లక్ష్యంగా తమ వాహనాలను పార్క్ చేశారు. దీంతో ఆ ప్రాంతంలో వెళ్లే వాహనదారులు తీవ్ర ఇబ్బందులు పడుతున్నారు. భారీగా ట్రాఫిక్ జామ్ అయినా కూడా ట్రాఫిక్ పోలీసులు పట్టించుకోలేదు. దీంతో వాహనదారులు తీవ్ర ఆగ్రహం వ్యక్తం చేస్తున్నారు.
