హైదరాబాద్: బేగంపేట్ ఎయిర్పోర్టులో ‘వింగ్స్ ఇండియా-2026’ ప్రదర్శన మూడో రోజూ ఉత్సాహంగా కొనసాగింది. ఆఖరి రెండ్రోజులు సాధారణ ప్రజలకు అనుమతి ఇవ్వడంతో శుక్రవారం పెద్దసంఖ్యలో సందర్శకులు తరలివచ్చారు. ఎయిర్షోలు, ఏరోబాటిక్ డిస్ప్లేలు, ఎగ్జిబిషన్లను ఆస్వాదించారు. భారత వాయుసేనకు చెందిన సూర్యకిరణ్ ఏరోబాటిక్ టీమ్ మధ్యాహ్నం 11:30 గంటల నుంచి అద్భుతమైన ఏరోబాటిక్ డిస్ప్లే చేసింది.
ట్రైకలర్ స్మోక్ ట్రయిల్స్, డీఎన్ఏ మాన్యువర్లతో ప్రేక్షకులను మంత్రముగ్ధులను చేసింది. యూకే నుంచి వచ్చిన గ్లోబల్ స్టార్స్ ఏరోబాటిక్ టీమ్ డెత్ డిఫైయింగ్ మూవ్స్, రోల్స్, లూప్స్, వర్టికల్ డ్రాప్స్తో ఆకట్టుకుంది. సాయంత్రం సింగర్ ఉషా ఉతుప్ సంగీత ప్రదర్శన ఉర్రూతలూగించింది. శుక్రవారం దాదాపు 9 నుంచి 10 వేల మంది ప్రజలు ఎయిర్షోను వీక్షించేందుకు వచ్చారని అంచనా. నేటితో ఎయిర్షో ముగియనుంది. -
