- కర్నాటకలోని చిత్రదుర్గ జిల్లాలో ఘటన
బెంగళూరు:
బెట్టింగ్ వ్యసనంతో అప్పులపాలైన భర్త, మరోవైపు ఆ అప్పులిచ్చినోళ్ల వేధింపులకు 23 ఏండ్ల మహిళ బలైంది. తీవ్ర మనస్థాపంతో ఇంట్లోనే ఉరేసుకుని ఆత్మహత్య చేసుకుంది. కర్నాటకలోని చిత్రదుర్గ జిల్లా హోసదుర్గలో మార్చి18 న ఈ ఘటన జరిగింది. ఇరిగేషన్ డిపార్ట్మెంట్లో అసిస్టెంట్ ఇంజినీర్గా పనిచేస్తున్న దర్శన్ బాబుకు రంజితతో 2020లో పెండ్లయింది. దర్శన్ బెట్టింగ్ పెడుతున్నాడని ఏడాది తర్వాత గుర్తించిన భార్య రంజిత.. వద్దని వారించినా అతడు వినిపించుకోలేదు. అలా 2021 నుంచి 2023 మధ్య ఐపీఎల్ మ్యాచ్లలో బెట్టింగ్ పెడుతూ రూ.1.50 కోట్లకు పైగా దర్శన్ అప్పులు చేశాడు. ఉన్న ఆస్తులన్నీ అమ్ముకుని రూ. కోటిదాకా అప్పులు తీర్చాడు. అయినా రూ.84 లక్షల అప్పు మిగిలిపోయింది. ఆ డబ్బు ఇచ్చినవాళ్లంతా.. తిరిగి చెల్లించాలని అడుగుతుండటంతో దర్శన్ ఇంట్లో ఉండకుండా తప్పించుకు తిరుగుతున్నాడు. ఈ క్రమంలో అప్పులవాళ్ల వేధింపులతో రంజిత తీవ్ర మనస్థాపానికి గురై ఈ నెల 18న ఇంట్లోనే ఉరేసుకుని ప్రాణాలు తీసుకుంది. తన భర్తకు డబ్బులిచ్చినవాళ్లు వేధిస్తున్నారని సూసైడ్ నోట్లో పేర్కొంది. ఆమె తండ్రి ఇచ్చిన ఫిర్యాదుతో పోలీసులు 13 మందిని అరెస్ట్ చేశారు. వాళ్లే అప్పులు ఇప్పిస్తూ తన అల్లుడిని బెట్టింగ్కు బానిసను చేశారని ఫిర్యాదులో పేర్కొన్నారు.
