- చత్తీస్ గఢ్ఎన్వోసీ కోసం అధికారుల ప్రయత్నాలు
- ఆ రాష్ట్రంతో మరోసారి చర్చలకు ఏర్పాట్లు
హైదరాబాద్, వెలుగు: సమ్మక్క సాగర్ప్రాజెక్టు అనుమతుల విషయంలో సర్కారు జాగ్రత్తగా అడుగులు వేస్తున్నది. ఆయకట్టును పూర్తిగా చూపించలేదని పేర్కొంటూ కొద్దిరోజుల క్రితం సెంట్రల్వాటర్కమిషన్(సీడబ్ల్యూసీ) ప్రాజెక్టు డీపీఆర్ను తిప్పిపంపిన సంగతి తెలిసిందే. ఈ నేపథ్యంలోనే మళ్లీ ఎక్కడా లోపాలు లేకుండా చూసుకుంటూ రివైజ్డ్డీపీఆర్ను సమర్పించేందుకు ఇరిగేషన్అధికారులు సిద్ధమవుతున్నారు. ఇందులో భాగంగా ఆయకట్టు వివరాలను అప్డేట్చేయనున్నారు.
శ్రీరాంసాగర్ ప్రాజెక్ట్ (ఎస్సారెస్పీ) స్టేజీ–2 కింద ఉన్న 4.40 లక్షల ఎకరాలకు సాగునీరు స్థిరీకరించడంతోపాటు రామప్ప–పాకాల లింక్ ద్వారా మరో 30 వేల ఎకరాల ఆయకట్టును డీపీఆర్లో చేర్చి ఇరిగేషన్ శాఖ సెంట్రల్డిజైన్స్ఆర్గనైజేషన్(సీడీవో)తో సర్టిఫై చేయించాలని యోచిస్తున్నారు. ఈ క్రమంలో అన్ని టెక్నికల్అంశాలను పరిశీలిస్తున్నారు. దీనిపై ఇప్పటికే ఇరిగేషన్శాఖ అధికారులు కసరత్తు ప్రారంభించారు. వీలైనంత త్వరగా మళ్లీ డీపీఆర్ను అప్రైజల్కు పంపేలా ప్రయత్నిస్తున్నారు.
చత్తీస్గఢ్ ఎన్వోసీపైనా వేగం..
మరోవైపు సమ్మక్క సాగర్ ప్రాజెక్టుకు పొరుగు రాష్ట్రమైన చత్తీస్గఢ్ నుంచి నో అబ్జెక్షన్సర్టిఫికెట్ (ఎన్వోసీ)ని సాధించేందుకు చర్యలు వేగవంతం చేయనున్నారు. అవసరమైతే మరోసారి ఆ రాష్ట్ర ప్రభుత్వంతో చర్చలు జరపాలన్న యోచనలోనూ ఉన్నట్టు సమాచారం. బ్యారేజీలో పూర్తి స్థాయిలో నీటిని నిల్వ చేస్తే చత్తీస్‌‌గఢ్‌‌లోని బీజాపూర్ జిల్లా పరిధిలో బ్యాక్‌‌వాటర్ వల్ల కొంత భూభాగం ముంపునకు గురవుతుంది. ముంపు నిర్ధారణ కోసం చత్తీస్గఢ్ జలవనరుల విభాగానికి ఇప్పటికే తెలంగాణ ప్రభుత్వం నిధులు చెల్లించి జాయింట్సర్వేను కూడా పూర్తి చేయించింది.
ముంపునకు గురయ్యే భూములు, ఆస్తులకు తగిన పరిహారం, పునరావాస వ్యయాన్ని భరించేందుకు తెలంగాణ ప్రభుత్వం సిద్ధంగా ఉందని ఇప్పటికే వెల్లడించింది. దీనిపై మూడుసార్లు ఆ రాష్ట్ర సీఎం విష్ణుదేవ్సాయ్తో మంత్రి ఉత్తమ్కుమార్రెడ్డి భేటీ అయ్యారు. కానీ ఇంతవరకు ఆ రాష్ట్రం నుంచి మళ్లీ ఎలాంటి సమాచారం రాలేదు. ఇటు చత్తీస్గఢ్ నుంచి ఎన్వోసీ వస్తేనే అనుమతులు ఇస్తామని సీడబ్ల్యూసీ చెప్పడంతో.. ఇప్పుడు ఆ పని కూడా అనివార్యమైంది. ఈ నేపథ్యంలోనే వీలైనంత త్వరగా ఎన్వోసీని సాధించేందుకు అధికారులు ప్రయత్నాలు ముమ్మరం చేశారు.
